បាត់ដំបង ៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បញ្ជូនប្រុសស្រី១០នាក់ ជួញដូររក្សាទុកនិងថ្នាំម៉ាទឹកកក៣៦ថង់ ម៉ូតូ២គ្រឿង ជញ្ជីងថ្លឹងថ្នាំញៀនមួយគ្រឿង សម្ភារពាក់ព័ន្ធមួយចំនួន នៅកន្លែងផ្សេងគ្នា កសាងសំណុំរឿងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី១ ខែសីហា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ១០នាក់នេះ បានធ្វើឡើងកាលពី ថ្ងៃទី៣០-៣១ ខែកក្កដា ឆ្នាំ២០២០ នៅចំណុចផ្សេងគ្នា ក្នុងស្រុកមោងឫស្សី ស្រុកបាណន់ និងក្រុងបាត់ដំបង ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ១០នាក់ ដែលចាប់ឃាត់ខ្លួន ករណីទី១ ឈ្មោះណែម សំណាង ភេទប្រុស អាយុ២៩ឆ្នាំ រស់នៅភូមិគារ៣ ឃុំគារ ស្រុកមោងឫស្សី ខេត្តបាត់ដំបង និងឈ្មោះធឿន ប៊ុនថន ភេទប្រុស អាយុ១៨ឆ្នាំ រស់នៅភូមិគារ៣ ឃុំគារ ស្រុកមោងឫស្សី ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកកមួយថង់ ម៉ូតូមូយគ្រឿង សម្ភារមួយចំនួនទៀត ហើយចាប់ឃាត់ខ្លួន កាលពីម៉ោង១៤និង១៥នាទី ថ្ងៃទី៣០ ខែកក្កដា ឆ្នាំ២០២០ នៅចំណុចក្រុមទី០៩ ភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង។ ក្រោយពីសាកសួរឈ្មោះធឿន ប៊ុនថន កម្លាំងបានចុះទៅចាប់មនុស្សប្រុសស្រី៤នាក់ទៀត មានទី១ ឈ្មោះឡុត ធារិទ្ធ ហៅលីន ភេទស្រី អាយុ៣៣ឆ្នាំ ស្នាក់នៅផ្ទះជួលភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង។ ទី២ ឈ្មោះសួង ស្រីរ័ត្ន ភេទស្រី អាយុ៣០ឆ្នាំ រស់នៅភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង។ ទី៣ ឈ្មោះតាន់ សុភ័ត្រ ភេទស្រី អាយុ២៥ឆ្នាំ រស់នៅភូមិមោង ឃុំមោង ស្រុកមោងឫស្សី ខេត្តបាត់ដំបង។ ទី៤ ឈ្មោះវណ្ណា ពិសី ភេទ
ប្រុស អាយុ២១ឆ្នាំ រស់នៅភូមិអន្លង់តាម៉ុក ឃុំរបស់មង្គល ស្រុកមោងឫស្សី ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបាន សម្ភារប្រើប្រាស់ថ្នាំញៀនមួយចំនួន ហើយចាប់ឃាត់ខ្លួនកាលពីម៉ោង១៥និង០០នាទី ថ្ងៃទី៣១ ខែកក្កដា ឆ្នាំ២០២០ នៅចំណុចក្រុមទី០៩ ភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង។
ករណីទី២ ឈ្មោះវឹង វិសាល ភេទប្រុស អាយុ៣១ឆ្នាំ រស់នៅភូមិឥន្ទជិត ឃុំឈើទាល ស្រុកបាណន់ ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក០៣ថង់ សម្ភារប្រើប្រាស់ថ្នាំញៀនមួយចំនួន ហើយចាប់ឃាត់ខ្លួន កាលពីម៉ោង១៦និង១៥នាទី ថ្ងៃទី៣១ ខែកក្កដា ឆ្នាំ២០២០ នៅចំណុចក្រុមទី០២ ភូមិឥន្ទជិត ឃុំឈើទាល ស្រុកបាណន់ ខេត្តបាត់ដំបង។ ក្រោយពីសាកសួរឈ្មោះវឹង វិសាល កម្លាំងបានចុះទៅចាប់ឈ្មោះណាត បូណា ភេទប្រុស អាយុ២៥ឆ្នាំរស់នៅភូមិលំពង់ឆ្លង ឃុំឈើទាល ស្រុកបាណន់ ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក០៤ថង់ សម្ភារប្រើប្រាស់ថ្នាំញៀនមួយចំនួន ហើយចាប់ឃាត់ខ្លួន កាលពីម៉ោង១៦និង៣០នាទី ថ្ងៃទី៣១ ខែកក្កដា ឆ្នាំ២០២០ នៅចំណុចក្រុមទី០២ ភូមិឥន្ទជិត ឃុំឈើទាល ស្រុកបាណន់ ខេត្តបាត់ដំបង។
ករណីទី៣ ឈ្មោះរុំ ប៊ុនរិទ្ធ ហៅរ៉ាក់ ហៅញ៉ាញ់ ភេទប្រុស អាយុ៣៥ឆ្នាំ រស់នៅភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង និងឈ្មោះស៊ូ តាំ ភេទប្រុស អាយុ៦០ឆ្នាំ រស់នៅភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក២៨ថង់ ម៉ូតូមូយគ្រឿង សម្ភារមួយចំនួនទៀត ហើយចាប់ឃាត់ខ្លួន កាលពីម៉ោង០០និង២៦នាទី ថ្ងៃទី៣១ ខែកក្កដា ឆ្នាំ២០២០ នៅចំណុចក្រុមទី០៧ ភូមិដំណាក់ហ្លួង សង្កាត់វត្តគរ ក្រុងបាត់ដំបង ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ក្រុង ចុះបង្ក្រាបបានករណីរទាំង៣នេះ ហើយចាប់ឃាត់ខ្លួនជនសង្ស័យ១០នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យ និងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី០១ ខែសីហា ឆ្នាំ២០២០ហើយ៕ ដោយ៖ អ៊ុងសារុំ
