ខេត្តស្វាយរៀង៖ រថយន្តមួយគ្រឿងត្រូវបានអគ្គិភ័យឆាបឆេះទាំងយប់ ខណៈពេលដែលកំពុងបើកបរ បានបណ្តាលឱ្យមានការភ្ញាក់ផ្អើល ដល់ប្រជាពលរដ្ឋរួមនឹងសមត្ថកិច្ច បានយករថយន្តពន្លត់អគ្គិភ័យចំនួន២គ្រឿង មកបាញ់ទឹកពន្លត់ ដែលហេតុការណ៍ខាងលើនេះ បានកើតឡើងកាលពីថ្ងៃទី៨ ខែសីហា ឆ្នាំ២០២០ វេលាម៉ោង១និង១០នាទី រំលងអធ្រាត្រ នៅលើផ្លូវជាតិលេខ១ ស្ថិតក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង ។
សមត្ថកិច្ចបានឱ្យដឹងថា មានករណីអគ្គិភ័យបានឆាបឆេះរថយន្ត១គ្រឿងម៉ាកកាម៉ារីឆ្លាម ពណ៌ស្ករ ពាក់ផ្លាកលេខភ្នំពេញ 2X-2578 ដែលជាកម្មសិទ្ធិរបស់ឈ្មោះសេក សុខុន ភេទប្រុស អាយុ52ឆ្នាំជនជាតិខ្មែរ មុខរបរបុគ្គលិកក្រុមហ៊ុនផែតេង ឡាយ ។
ប្រភពដដែលបានបន្តថា នៅក្នុងហេតុការណ៍ខាងលើនេះ កម្លាំងចម្រុះបានជួយអន្តរាគមន៍ ដោយប្រើប្រាស់រថយន្តពន្លត់អគ្គិភ័យចំនួន២គ្រឿង ក្នុងនោះរថយន្តកងរាជអាវុតហត្ថក្រុងបាវិត១គ្រឿង រថយន្តអធិការដ្ឋាននគរបាលស្រុកស្វាយទាប១គ្រឿង ប្រើប្រាស់ទឹកអស់ចំនួន២ឡាន។ រថយន្តរងការខូតខាតទាំងស្រុង តែ មិនបណ្ដាលឲ្យគ្រោះថ្នាក់ដល់មនុស្ស និង មិនប៉ះពល់ដល់ទ្រព្យសម្បត្តិអ្នកដទៃឡើយ ហើយមូលហេតុ បណ្តាលមកពីឆ្លងប្រព័ន្ធភ្លើង៕ដោយ៖វ៉ៃកូ
