ភ្នំពេញ ÷ បុរសម្នាក់បានស្លាប់បាត់បង់ជីវិត ពេលបញ្ជូនទៅសង្គ្រោះនៅឯមន្ទីរពេទ្យក្នុងហេតុការណ៍គ្រោះថ្នាក់ចរាចរណ៍រវាងរថយន្ត និងម៉ូតូ នៅជាប់របងសាលាបឋមសិក្សាទួលគោក តាមបណ្តោយផ្លូវ២៨៩ កែង៥៦៦ ស្ថិតក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ នៅវេលាម៉ោង១០និង០០នាទី ថ្ងៃទី១២ ខែសីហា ឆ្នាំ២០២០ ។
សពជនរងគ្រោះមានឈ្មោះលៀតលឿនភេទប្រុសអាយុ៣២ឆ្នាំមុខរបរជាងកាត់ដេរខោអាវម៉ូតស្នាក់នៅផ្សារ៧មករាខណ្ឌទួលគោកមានស្រុកកំណើតស្រុកសីធរកណ្ដាលខេត្តព្រៃវែង។
ប្រភពពីកន្លែងកើតហេតុបានប្រាប់ឲ្យដឹងថា រថយន្តម៉ាកនីសាន់ ពណ៌ខ្មៅ ពាក់ផ្លាកលេខ ភ្នំពេញ 2-AN-8344 បើកបរដោយបុរសម្នាក់ ធ្វើដំណើរពីត្បូងទៅជើងក្នងល្បឿនលឿនខណៈមកដល់ចំណុចស្តុបទួលគោកបានបត់ឆ្វេងបណ្ដាលជ្រុលទៅបុកម៉ូតូ ម៉ាកហុងដា សេ១២៥ ពណ៌ខ្មៅ ពាក់ផ្លាកលេខ កំពង់ចាម 1G-4305 ជិះដោយបុរសម្នាក់ធ្វើដំណើរពីជើងទៅត្បូងពេញទំហឹងបោកផ្ទប់នឹងថ្នល់បណ្ដាលឲ្យរបួសធ្ងន់ត្រូវររថយន្តសង្គ្រោះព្យាយាមដឹកទៅសង្គ្រោះនៅមន្ទីរពេទ្យតែអកុសលជនរងបានដាច់ខ្យល់ស្លាប់តាមផ្លូវបាត់ទៅហើយរួចដឹកត្រឡប់មកចំណុចកើតហេតុវិញ។
ក្រោយពេលកើតហេតុសមត្ថកិច្ចជំនាញចរាចរណ៍បានមកដល់ភ្លាមៗ ធ្វើការវាស់វែងនិងធ្វើកំណត់ហេតុ ចំណែកអ្នកបើករថយន្តមិនបានរត់គេចទៅណាទេ រង់ចាំដោះស្រាយទៅតាមច្បាប់។
ដោយឡែកសពរងគ្រោះក្រោយពីសមត្ថកិច្ចធ្វើកំណត់ហេតុរួចប្រគល់ឲ្យក្រុមគ្រួសារដឹកយកទៅស្រុកកំណើតធ្វើបុណ្យតាមប្រពៃណី៕ ដោយ៖សា មេត
