ភ្នំពេញ៖ បងប្អូនប្រិយមិត្តជាច្រើនប្រហែលជាធ្លាប់បានស្គាល់ហើយ ចំពោះបងប្រុសជាប្រជាការពារម្នាក់ ដែលតែងបំពេញកតព្វកិច្ចការងារយ៉ាងយកចិត្តទុកដាក់ និងតែងជួយជនរងគ្រោះក្នុងគ្រោះថ្នាក់ផ្សេងៗជារឿយៗ ជាពិសេសគឺគាត់បានប្រថុយជីវិតជួយសង្គ្រោះស្ត្រីម្នាក់ យកចេញភ្នក់ភ្លើងអគ្គិភ័យកាលពីពេលកន្លងមក។
តែអ្វីដែលគួរឲ្យសោកស្តាយនោះ នៅពេលនេះ ប្រជាការពារដ៏មានទឹកចិត្តរូបនេះ បានលាចាកលោកហើយ ដោយសារជំងឺប្រចាំកាយ។ នេះបើយោងតាមគណនីហ្វេសប៊ុកឈ្មោះ Net New បានបង្ហោះប្រាប់ឲ្យដឹងថា៖ «បងប្អូនទាំងអស់គ្នានៅចាំគាត់បានទេ គាត់ឈ្មោះ ទេព និមិត្ដ គាត់គឺជាប្រជាការពារសង្កាត់ឫស្សីកែវ ដែលតែងតែយកចិត្តទុកដាក់ជួយបងប្អូនប្រជាពលរដ្ឋ និងប្រថុយជីវិតយកនារីម្នាក់ចេញពីភ្លក់ភ្លើងក្នុងករណីអគ្គិភ័យ ហើយក៏បានព្យាយាមជួយសង្គ្រោះក្មេងប្រុសម្នាក់ ដែលលង់ទឹកនៅក្នុងវត្ត តែជាអកុសលក្មេងត្រូវស្លាប់។
នេះគឺជាទឹកចិត្តមួយដ៏ល្អដែលមិនអាចកាត់ថ្លៃបាន តែពេលនេះបងប្អូនប្រជាពលរដ្ឋទាំងអស់លែងបានឃើញមុខទៀតហើយ គាត់បានទទួលមរណភាពហើយ ដោយជំងឺប្រចាំកាយនៅថ្ងៃទី១១ ខែសីហា ឆ្នាំ២០២០ សូមវិញ្ញាណក្ខន្ធលោកបានទៅកាន់សុគតិភពកុំបីឃ្លៀងឃ្លាតឡើយ»៕ ដោយ៖ លឹម ហុង
