ភ្នំពេញ៖ បុរសជាតិចិនចំនួន២នាក់បើកឆាកប្រយុទ្ធវាយតប់គ្នា ផ្អើលអ្នកដំណើរ និងដល់ប្រជាពលរដ្ឋដែលនៅក្បែរកន្លែងកើតហេតុ នាំគ្នាចោមរោមមើលយ៉ាងច្រើនកុះករ កាលពីវេលាម៉ោង១និង៣០នាទីរសៀល ថ្ងៃទី១៣ ខែសីហា ឆ្នាំ២០២០ ស្ថិតនៅតាមបណ្តោយផ្លូវ៣៧១ សង្កាត់ចាក់អង្រែលើ ខណ្ឌមានជ័យ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញជនរងគ្រោះបានជិះរថយន្តមួយគ្រឿង ម៉ាកហាយឡែនឌ័រ មករកប្រពន្ធរបស់ខ្លួន នៅចំណុចខុនដូមួយ ខណៈពេលឃើញប្រពន្ធរបស់ខ្លួន នៅជាមួយនឹងមិត្តប្រុស ក្នុងបន្ទប់របស់ជនដៃដល់ បុរសជាប្តីបានអូសដៃប្រពន្ធចូលក្នុងរថយន្ត ក្នុងគោលបំណងនាំប្រពន្ធទៅផ្ទះរបស់ខ្លួនវិញ ពេលកំពុងតែអូសដៃប្រពន្ធដាក់ក្នុងរថយន្ត បម្រុងបើកចេញមកខាងលើ ក៏ត្រូវបុរសដែលជាមិត្តប្រុសរបស់ប្រពន្ធជនរងគ្រោះ ហក់ដាល់ជនរងគ្រោះក្នុងរថយន្តបណ្តាលឲ្យបែកភ្នែកខាងឆ្វេង ហូរឈាមពាសពេញផ្ទៃមុខ ហើយជនរងគ្រោះ ក៏ស្ទុះចេញមកខាងក្រៅរថយន្ត បណ្តាលឲ្យស្ត្រីជាប្រពន្ធដែលនៅក្នុងរថយន្ត រអិលរថយន្តចុះទៅខាងក្រោមសន្លប់បាត់មាត់ឈឹង នៅក្នុងរថយន្ត ចំណែករថយន្តរងការខូចខាតយ៉ាងដំណំ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ចាក់អង្រែលើ សហការជាមួយកម្លាំងនគរបាលអន្តោប្រវេសន៍ បាននាំខ្លួនជនបរទេសទាំង៣នាក់ ទៅសាកសួនៅប៉ុស្តិ៍នគរបាលរដ្ឋបាលសង្កាត់ចាក់អង្រែលើ ចាត់ការទៅតាមនីតិវិធី៕ ដោយ៖ផាន់ណា+មីដា
