នាយករដ្ឋមន្ត្រី Narendra Modi បាននិយាយថា ប្រទេសឥណ្ឌាត្រៀមខ្លួនរួចរាល់ហើយក្នុងការផលិតវ៉ាក់សាំង COVID-19 ទ្រង់ទ្រាយធំ នៅពេលអ្នកវិទ្យាសាស្ត្រផ្តល់ការអនុញ្ញាត ហើយឥណ្ឌាកំពុងចាប់ផ្តើមគម្រោងជាតិ ដើម្បីកំណត់អត្តសញ្ញាណសម្រាប់ពលរដ្ឋម្នាក់ៗផងដែរ។
លោកប្រកាសបែបនេះ នៅក្នុងការថ្លែងក្នុងថ្ងៃទិវាឯករាជ្យនៅថ្ងៃសោរ៍នេះ។ ទិវានេះ ត្រូវបានកាត់បន្ថយទ្រងទ្រាយនៃការប្រារព្ធ ដោយសារតែបញ្ហារាតត្បាត COVID-19។
លោកបានកំណត់ថា ការពឹងផ្អែកលើវិស័យសុខាភិបាល និងសេដ្ឋកិច្ចរបស់ខ្លួនឯងជាអាទិភាពដ៏សំខាន់សម្រាប់រដ្ឋាភិបាល។
លោកមានប្រសាសន៍ថា “មិនមែនមួយ មិនមែនពីរ គឺមានវ៉ាក់សាំងកូរ៉ូណាចំនួន ៣កំពុងត្រូវធ្វើតេស្តសាកល្បងនៅក្នុងប្រទេសឥណ្ឌា”។
លោកបន្តទៀតថា “ជាមួយនឹងការត្រៀមផលិតទ្រង់ទ្រងធំ គម្រោងសម្រាប់ការចែកចាយវ៉ាក់សាំង ទៅដល់ប្រជាជនឥណ្ឌាគ្រប់រូប ក្នុងរយៈពេលដ៏តិចបំផុត ក៏បានត្រៀមរួចរាល់ហើយដែរ”។
“ឥណ្ឌាត្រៀមខ្លួនរួចរាល់ហើយ ក្នុងការផលិតវ៉ាក់សាំងទាំងនោះ ក្នុងទ្រង់ទ្រាយធំ”។
សូមបញ្ជាក់ថា ឥណ្ឌាគឺជាប្រទេសទី ៣ ដែលទទួលរងការវាយប្រហារខ្លាំងបំផុតពីវីរុសកូរ៉ូណា បន្ទាប់ពីអាមេរិច និងប្រេស៊ីល។
តួលេខចុងក្រោយបានបង្ហាញថា ឥណ្ឌាមានអ្នកឆ្លង COVID-19 សរុបជាង ២,៥៣លាននាក់ និងអ្នកស្លាប់ជាង ៤៩.០០០នាក់ ខណៈដែលអ្នកជាសះស្បើយមានជាង ១,៨១លាននាក់៕
ប្រែសម្រួលដោយ៖ សុភ័ក្រ
ប្រភព៖ Reuters
