ភ្នំពេញ ៖ ជនសង្ស័យម្នាក់ជាចុងភៅបានសហការរួមគំនិតជាមួយប្រពន្ធគេ បានដាក់ថ្នាំងងុកដេក ដាក់ក្នុងម្ហូបអាហារឲ្យប្តីពិសា ដើម្បីមករួមរ័ក្សជាមួយប្រពន្ធបុរសនោះជាច្រើនលើក ប៉ុន្តែក្រោយមានការសង្ស័យបុរសជាប្តីបានធ្វើការស៊ើបអង្កេតតាមដានដឹងថាប្រពន្ធរបស់ខ្លួន បានរួមគំនិតជាមួយបុរសជាចុងភៅនោះ ដាក់ថ្នាំសណ្តំលើខ្លួនដើម្បីបានរួមរ័ក្សគ្នាយ៉ាងសប្បាយ ហើយបានចាប់បុរសនោះប្រគល់ឲ្យនគរបាលចាត់ការតាមផ្លូវច្បាប់។
ហេតុការណ៍កើតឡើង កាលវេលាម៉ោង១និង០០នាទីកណ្ដាលអធ្រាត្រឈានចូលថ្ងៃទី២៥ ខែ សីហា ឆ្នាំ ២០២០នៅសង្កាត់បឹងទំពុនទី១ ខណ្ឌមានជ័យ ។
ជនរងគ្រោះមានឈ្មោះ ហ្វុង លីម ភេទប្រុស អាយុ ៣០ឆ្នាំ មុខរបរ បុគ្គលិកក្រុមហ៊ុនឯកជន ស្នាក់នៅភូមិចំរើនផល សង្កាត់ បឹងទំពន់ទី១ ខណ្ឌមានជ័យ ។
ជនសង្ស័យទី១ ឈ្មោះ ស្រេង ចាន់ណា ភេទប្រុស អាយុ ២១ឆ្នាំ មុខរបរ ចុងភៅ ស្នាក់នៅផ្ទះកើតហេតុខាងលើ ភូមិព្រៃសំបួរកើត ឃុំមៀន ស្រុកអូរាំងឪ ខេត្តកំពង់ចាម ជនសង្ស័យជាប្រពន្ធទី២ ឈ្មោះ តាំង លីណា អាយុ២៥ (រត់គេចខ្លួន) ។
លោក គឹម កល្យាណ អធិការរងទទួលផែនព្រហ្មទណ្ឌខណ្ឌ បានឲ្យដឹងថា នគរបាលប៉ុស្តិ៍បានទទួលបណ្ដឹងពីជនរងគ្រោះ និងទទួលជនសង្ស័យម្នាក់ ដោយបុរសរងគ្រោះ ចាប់ប្រគល់ឲ្យ ដោយចោទពីបទសហការជាមួយប្រពន្ធរបស់ខ្លួនអាងខ្លួនចុងភៅក្នុងផ្ទះ យកថ្នាំសណ្ដំមកដាក់ក្នុងម្ហូបអាហារ ពេលធ្វើឆ្អិនរួចហើយ យកមកឲ្យបុរសរងគ្រោះហូប រួចចុងភៅនោះមកដេកជាមួយប្រពន្ធខ្លួនមិនដឹងពីពេលណាមក ។
ប្រភពព័ត៌មានពីបុរសជាប្តី បានរៀបរាប់សមត្ថកិច្ចថា នៅខែសីហានេះ មិនចាំថ្ងៃ ដោយមានសុខភាពមិនសូវល្អ ពេលខ្លះហូបបាយមិនទាន់អស់ពីចានផង ក៏ងងុយដេក ហើយពេលខ្លះហូបបាយរួច ក៏ងងុយដេករហូតដល់ព្រឹក ទើបភ្ញាក់ខ្លួន ហើយក៏ទៅពេទ្យពិនិត្យសុខភាព ។ លោកគ្រូពេទ្យ បានប្រាប់ថា គាត់មានជំងឺក្រពះ ដោយសារលេបថ្នាំងងុយដេកច្រើនពេក តែគាត់ប្រាប់ពេទ្យថា គាត់មិនដែលលេបថ្នាំងងុយដេកទេ ។ អ៊ីចឹងគ្រូពេទ្យប្រាប់វិញថា តាមការឆ្លុះអេកូ ឃើញមានប៉ះពាល់ថ្នាំងងុយដេកច្រើនពេក ប៉ះពាល់ក្រពះ ។ បុរសជាប្តីបន្តថា គាត់បានតាមដានប្រពន្ធគាត់ សហការជាមួយចុងភៅប្រុសម្នាក់ រស់នៅក្នុងផ្ទះដែលស្រឡាញ់គ្នា ជាមួយប្រពន្ធគាត់ បានដាក់ថ្នាំងងុយដេក ដើម្បីបានផ្អែមល្ហែមស្និទ្ធស្នាលជាមួយគ្នា រហូតឈានដល់ការរួមរ័ក្សរាល់ពេលយប់ ។
ក្រោយមក នៅយប់ថ្ងៃទី២៤ ខែសីហា ឆ្នាំ២០២០ បុរសជាប្តីបានប្តឹងសមត្ថកិច្ច ធ្វើការឃាត់ខ្លួនបុរសចុងភៅ ប្រគល់ឲ្យនគរបាលប៉ុស្តិ៍ ដែលធ្វើទំនាក់ទំនងជាមួយប្រពន្ធ និងបានដាក់ថ្នាំមកលើរូបគាត់ទៀត ។
ជនសង្ស័យ ត្រូវនគរបាលឃាត់ខ្លួន ពីបទប្រើហិង្សាដោយចេតនាមានស្ថានទម្ងន់ទោស (ដាក់ថ្នាំងងុកដេកក្នុងចំណីអាហារ) និងកសាងសំណុំរឿងបញ្ជូលទៅតុលាការ ចាត់ការបន្តតាមនីតិវិធីច្បាប់ និងស្រាវជ្រាវរកស្ត្រីជាប្រពន្ធរបស់ជនរងគ្រោះ ដែលបក្ខពួកជនសង្ស័យចាត់ការបន្តទៀត៕ ដោយ៖កូឡាប
