ខេត្តក្រចេះ ៖ កម្លាំងនគរបាលក្រុងក្រចេះ សហការជាមួយ នគរបាលស្រុកចិត្របុរី និងកម្លាំងជំនាញព្រហ្មទណ្ឌកំរិតស្រាលខេត្ត ឃាត់ខ្លួនជនសង្ស័យម្នាក់ពាក់ព័ន្ធករណីលួចម៉ូតូនៅចំណុចរមណីយដ្ឋានថ្មបាំង ស្ថិតនៅ ភូមិបន្ទាយ ឃុំគោលាប់ ស្រុកចិត្របុរី ខេត្តក្រចេះ កាលពីល្ងាចថ្ងៃទី៣០ ខែសីហា ឆ្នាំ២០២០នេះ។
យោងតាមរបាយការណ៍នគរបាលក្រុងក្រចេះ បានឲ្យដឹងថា ជនសង្ស័យឈ្មោះ ដៀង វ៉ាន់ ភេទប្រុស អាយុ៣៨ឆ្នាំ មានទីលំនៅ ភូមិថ្មី ឃុំពង្រ ស្រុកសាមគ្គីមានជ័យ ខេត្តកំពង់ឆ្នាំង ពាក់ព័ន្ធនឹងអំពើលួច ប្រព្រឹត្តនៅថ្ងៃទី៣០ ខែសីហា ស្ថិតនៅបន្ទប់ជួល ស្ថិតក្នុងភូមិដូនជ្រាំ សង្កាត់ក្រចេះ ក្រុងក្រចេះខេត្តក្រចេះ ។
មុនពេលកើតហេតុ នៅថ្ងៃទី៣០ ខែសីហា វេលម៉ោង៥ទៀបភ្លឺ ឈ្មោះ ហួត ដា បានជិះម៉ូតូខាងលើ ទៅរៀបចំអីវ៉ាន់ឲ្យប្រពន្ធលក់នៅផ្សារក្រចេះ ពេលត្រឡប់មកដល់បន្ទប់វិញ ខ្លួនបានយកម៉ូតូទុកនៅមុខបន្ទប់ និងទុកកូនសោឲ្យប្រពន្ធសម្រាប់ជិះ ទៅលក់អីវ៉ាន់នៅផ្សារ ហើយខ្លួនក៏ជិះម៉ូតូសណ្ដោងរ៉ឺម៉កមកកន្លែងធ្វើការ រហូតដល់ម៉ោង៧ព្រឹកប្រពន្ធខ្លួនចេញមកយកម៉ូតូទើបដឹងថាបាត់ម៉ូតូ។
បន្ទាប់ពីទទួលបានព័ត៌មានភ្លាមៗ កម្លាំងនគរបាលក្រុងក្រចេះ សហការជាមួយនគរបាលចិត្របុរី និងនគរបាលជំនាញខេត្ត បានធ្វើការស៊ើបអង្កេត ស្រាវជ្រាវជាបន្តបន្ទាប់ និងឈានទៅឃាត់ខ្លួនជនសង្ស័យខាងលើ ខណៈដែលជនសង្ស័យរូបនេះ ព្យាយាមរត់គេចពីសមត្ថកិច្ច មកសម្ងំលាក់ខ្លួននៅចំណុចឃាត់ខ្លួនខាងលើ ចំណែកបក្ខពួកម្នាក់ទៀតបានរត់គេចខ្លួនបាត់។
សមត្ថកិច្ចបានធ្វើការដកហូតម៉ូតូចំនួន២គ្រឿង មធ្យោបាយរបស់ជនសង្ស័យ១គ្រឿង និងម៉ូតូជនរងគ្រោះ១គ្រឿង និងឧបករណ៍កាច់សោម៉ូតូ១សម្រាប់។ ជនសង្ស័យរួមទាំងវត្ថុតាង កំពុងឃាត់ខ្លួន និងរក្សាទុកបណ្ដោះអាសន្ន នៅស្នងការដ្ឋាន នគរបាលខេត្តដើម្បីចាត់ការតាមនីតិវិធីច្បាប់បន្ត៕ ដោយ៖សុខុម
