ភ្នំពេញ៖ និយាយពីឈ្មោះ ម៉ៃ សុគន្ធ អ្នកណាៗដែលថាមិនស្គាល់នោះ ដែលមហាជនទូទៅបានផ្តល់រហ្សនាមឲ្យថា តារាកំពូលទើស ដ៏មានប្រជាប្រិយភាពខ្លាំងនៅលើបណ្តាញសង្គមហ្វេសប៊ុក ដែលទទួលបានទាំងការស្អប់ និងស្រលាញ់ចូលចិត្តព្រមៗគ្នា ជារឿងធម្មតាទៅហើយ។
ទោះយ៉ាងណា ក្រៅពីចូលចិត្តទើសគេ តារាប្រុសរូបនេះ ក៏ត្រូវបានគេដឹងថា ជាហ្វេនបាល់ទាត់ផ្កាប់មុខម្នាក់ ដែលតែងឃើញផុសបង្ហាញពីការប្រកួតគូនេះគូនោះ នៅលើបណ្តាញសង្គមពុំអាក់ខានម្តងណាទេ។
ដោយឡែក ថ្មីៗនេះ តារាចម្រៀងរហ្សនាមកំពូលទើសលោក ម៉ៃ សុគន្ធ បានធ្វើឲ្យហ្វេនៗ នាំគ្នាផ្ទុះការភ្ញាក់ផ្អើលសាជាថ្មី បន្ទាប់ពីបានឃើញរូបភាព១សន្លឹក ខណៈដែលរូបលោកទៅវត្តឲ្យព្រះសង្ឃកោរសក់ និងស្រោចទឹកចេញ ដែលធ្វើឲ្យហ្វេនៗនិយាយលេងសើចបែបនេះ «សង្ស័យប្រហែលចាញ់បាល់ទៀតហើយ លោកបង ម៉ៃ សុគន្ធ, កោរសក់ស្រោចទឹកចឹងបាន Arsenal ឈ្នះយប់មិញ»។ ដោយក្នុងនោះផងដែរ គេសូម្បីយករូបជើងខ្លាំងបាល់ទាត់ ចាន់ វឌ្ឍនាកា មកផ្គូរ ព្រោះមើលទៅមុខដូចព្រះសង្ឃដែលបានស្រោចទឹកឲ្យ ដែលចង់មានន័យថា ពេលនេះ ចាន់ វឌ្ឍនាកា ស្រោចទឹកឲ្យហើយ។
ទោះយ៉ាងណា បើតាមលោក ម៉ៃ សុគន្ធ ការកោរសក់នេះ គឺគ្រាន់តែដើម្បីឲ្យចិត្តជ្រះថ្លាប៉ុណ្ណោះ ព្រោះថា នេះមិនមែនជាលើកទី១ទេ ដែលរូបលោកទៅវត្តកោរសក់ឲ្យព្រះសង្ឃស្រោចទឹក ដែលកន្លងមក លោកធ្លាប់បានធ្វើរឿងនេះរួចម្តងមកហើយ ដើម្បីឲ្យជ្រះអស់នូវរឿងអាក្រក់ៗទាំងឡាយ និងនាំមកនូវរឿងល្អៗនៅក្នុងជីវិត៕ ដោយ៖ លឹម ហុង
