ព្រះសីហនុ៖ កម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ សហការជាមួយកម្លាំងជំនាញ នៃអធិការដ្ឋាននគរបាលស្រុកព្រៃនប់ បើកប្រតិបត្ដិការ ចុះឆែកឆេរលំនៅដ្ឋានមួយកន្លែង បានប្រមូលសម្ភារវត្ថុតាងម៉ូតូ១៧គ្រឿង រថយន្តមួយគ្រឿង និងនាំខ្លួនជនសង្ស័យចំនួន៣នាក់ ដែលជាប់ពាក់ព័ន្ធនឹងករណីទទួលផលចោរកម្ម នៅល្ងាចថ្ងៃទី៤ ខែកញ្ញា ឆ្នាំ២០២០ ចំណុចផ្ទះឈ្មោះ នួន ស៊ីណាត អាយុ៤៥ឆ្នាំ ស្ថិតក្នុងក្រុមទី៩ ភូមិអណ្ដូងថ្ម ឃុំអណ្ដូងថ្ម ស្រុកព្រៃនប់ ខេត្ដព្រះសីហនុ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងថា លទ្ធផលក្រុមប្រតិបត្ដិការ បានប្រមូលសម្ភារវត្ថុតាង និងនាំខ្លួនជនសង្ស័យចំនួន៣នាក់ ដែលជាប់ពាក់ព័ន្ធនឹងករណីទទួលផលចោរកម្ម មកកាន់អធិការដ្ឋាននគរបាលស្រុកព្រៃនប់ ដើម្បីចាត់ការតាមនីតិវិធី។ ជនសង្ស័យទាំង៣នាក់ ទី១ ឈ្មោះ នួន ស៊ីណាត អាយុ៤៥ឆ្នាំ ជាម្ចាស់ផ្ទះ មានទីលំនៅក្រុម៩ ភូមិអណ្ដូងថ្ម ឃុំអណ្ដូងថ្ម ស្រុកព្រៃនប់ ខេត្ដព្រះសីហនុ ជាប្ដី ទី២ ឈ្មោះ ង៉ាន ភៀវ អាយុ៤២ឆ្នាំ ជាប្រពន្ធ និងទី៣ ឈ្មោះ ហ៊ាន ស៊ីប៉ាន់ អាយុ១៨ឆ្នាំ ជាកូន ដែលជនសង្ស័យទាំង៣នាក់នេះ ពាក់ព័ន្ធនឹងករណីទទួលបញ្ចាំខុសច្បាប់ និងទទួលផលចោរកម្ម។
ស្នងការនគរបាលខេត្តព្រះសីហនុ បានអំពាវនាវដល់ប្រជាពលរដ្ឋ ដែលបាត់ម៉ូតូនាពេលកន្លងទៅ សូមយកឯកសារមកផ្ទៀងផ្ទាត់ និងពិនិត្យមើលម៉ូតូ នៅអធិការដ្ឋាននគរបាលស្រុកព្រៃនប់ ។
វត្ថុតាងចាប់យកបាន ម៉ូតូ១៧គ្រឿង រថយន្ដ១គ្រឿង ម៉ាក Visto ពណ៌ខ្មៅ ពាក់ផ្លាកលេខភ្នំពេញ2T-7830 ផ្លាកលេខរថយន្ដ៣សន្លឹក សម្ភារជួសជុល និងគ្រឿងបន្លាស់ម៉ូតូមួយចំនួន បញ្ជីទិញ-លក់ម៉ូតូ១ក្បាល កាតគ្រីម៉ូតូចំនួន៤សន្លឹក និងប័ណ្ណបើកបររថយន្ដ៣សន្លឹក។ កម្លាំងសមត្ថកិច្ចជំនាញ កំពុងកសាងសំណុំរឿង ដើម្បីចាត់ការបន្ដតាមនីតិវិធី៕ដោយ៖បញ្ញាស័ក្តិ
