ភ្នំពេញ៖ បុរសម្នាក់បើករថយន្តក្នុងស្ថានភាពស្រវឹងជោកជាំ ក្នុងល្បឿនលឿន ស្រាប់តែមកដល់ផ្លូវបំបែកជា៤ ក៏ជ្រុលទៅបុករថយន្តសាំយ៉ុង ចំពាក់កណ្តាលពេញទំហឹង បណ្តាលឲ្យរថយន្តសាំយ៉ុងក្រឡាប់ផ្ងារជើង និងរងរបួស ៣ នាក់បញ្ជូនទៅមន្ទីរពេទ្យ។
ហេតុការណ៍នេះដែរកើតឡើងនៅវេលាម៉ោង ២ និង៣០ នាទីរំលងអធ្រាត្រឈានចូលថ្ងៃព្រហស្បតិ៍ទី១០ ខែកញ្ញា ឆ្នាំ ២០២០ ត្រង់ចំណុចមុខសាលាទឹកល្អក់ តាមបណ្តោយផ្លូវ ២៥៣ កែងនឹងផ្លូវ ២០២ ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
បើយោងតាមប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុគេបានឃើញរថយន្តម៉ាកសាំយ៉ុង ពណ៌សមួយគ្រឿង ដែលពាក់ផ្លាកលេខ កំពត 2B 0808 រួមដំណើរគ្នា ៨ នាក់ដែលបើកបរក្នុងទិសដៅពីត្បូងមកជើង ក្នុងល្បឿនមធ្យម ស្របពេលដែលមកជិតដល់ត្រង់ចំណុចកើតហេតុផ្លូវបំបែកជា៤ ស្រាប់តែគេឃើញរថយន្តមួយគ្រឿងទៀតម៉ាក RAV 4 ពណ៌ ទឹកប្រាក់ដែលពាក់ផ្លាកលេខ ភ្នំពេញ 2BC 3977 បើកបរម្នាក់ឯងក្នុងស្ថានភាពស្រវឹងស្រា ក្នុងទិសដៅពីកើតមកលិច ស្រាប់តែមកដល់ចំណុចកើតហេតុក៏ជ្រុលទៅបុករថយន្តសាំយ៉ុង ចំពាក់កណ្តាលពេញទំហឹងបណ្តាលឲ្យរថយន្ត សាំយ៉ុងក្រឡាប់ផ្ងារជើង និងរងរបួសធ្ងន់ស្រាល ៣ នាក់ ចំណែកឯរថយន្តបង្ក ក៏បានឆ្លងចរន្តឆេះ តែត្រូវបានបងប្អូនប្រជាពលរដ្ឋជួយយកបំពង់អគ្គិភ័យពន្លត់ទាន់ពេល ។
ក្រោយពេលកើតហេតុ សមត្ថកិច្ចមូលដ្ឋាន ចុះមកដល់នឹងសហការជាមួយនឹងជំនាញ ទាក់ទងទៅខាងចរាចរណ៍ក្រុង ឱ្យចុះមកវាស់វែង និងយករថយន្ត២គ្រឿង ទៅរក្សាទុកនៅចរាចរណ៍ជើងគោរង់ចាំដោះស្រាយនៅពេលក្រោយ៕ដោយ៖ សា មេត
