ខេត្តស្វាយរៀង៖ យ៉ាងហោចណាស់ ស្ត្រី៣នាក់បានរងរបួសធ្ងន់និងស្រាល ដោយសារគ្រោះថ្នាក់ចរាចរណ៍ រវាងរថយន្តនិងម៉ូតូ នៅក្រុងបាវិត ខេត្តស្វាយរៀង។
សមត្ថកិច្ចបានឲ្យដឹងថា ហេតុការណ៍ខាងលើនេះ បានកើតឡើង កាលពីថ្ងៃទី ៣០ ខែ កញ្ញា ឆ្នាំ២០២០ វេលាម៉ោង២១និង១០នាទីយប់ នៅលើផ្លូវលេខ៣១៩B (ផ្លូវកំពង់ស្ពាន) ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង មានករណីគ្រោះថ្នាក់ចរាចរណ៍មួយកើតឡើងរវាងរថយន្ត និង ម៉ូតូ ក្នុងទិសដៅបញ្ច្រាសទិសគ្នាពីជើងទៅត្បូង។
សមត្ថកិច្ចបានឲ្យដឹងទៀតថា មានរថយន្ត ១ គ្រឿង ម៉ាក Camery ហាយព្រីត ពណ៌ស ពាក់ផ្លាកលេខ កណ្តាល 2A-0636 បើកបរដោយឈ្មោះ (មិនស្គាល់អត្តសញ្ញាណ) បើកបរទិសដៅពីជើងទៅត្បូង លុះមកដល់ចំណុចកើតហេតុខាងលើ ក៏បានបុកប៉ះម៉ូតូ ១ គ្រឿង ម៉ាកវ៉េវ ពណ៌ខ្មៅលាយក្រហម ពាក់ផ្លាក លេខ ភ្នំពេញ 1FF-9184 បើកបរដោយឈ្មោះ ចាន់ បុប្ផា ភេទស្រី អាយុ ១៦ ឆ្នាំ ជនជាតិខ្មែរ មុខរបរធ្វើក្រចក មានទីលំនៅភូមិតាបិប សង្កាត់បាវិត ក្រុងបាវិត ខេត្តស្វយរៀង (គ្មានមួកសុវត្ថិភាព និង ម៉ូតូមានកញ្ចក់មើលក្រោយ) បណ្តាលឲ្យរងរបួសធ្ងន់(ត្រង់ក្បាល) និង អ្នករួមដំណើរចំនួន ២ នាក់ មានឈ្មោះ ទី១. ឈ្មោះ អាំង អៀន អាយុ ១៣ ឆ្នាំ ជនជាតិខ្មែរ មុខរបរធ្វើក្រចក មានទីលំនៅភូមិតាបិប សង្កាត់ បាវិត ក្រុងបាវិត ខេត្តស្វាយរៀង (គ្មានមួកសុវត្តិភាព) បណ្តាលឲ្យរងរបួសធ្ងន់ (បាក់ភ្លៅខាងស្តាំ)។ ទី២. ឈ្មោះ យុក ចន្ទ័ភក្តី អាយុ ១៩ ឆ្នាំ ជនជាតិខ្មែរ មុខរបរធ្វើក្រចក មានទីលំនៅភូមិតាបិប សង្កាត់បាវិត ក្រុងបាវិត ខេត្តស្វាយរៀង (គ្មានមួកសុវត្តិភាព) បណ្តាលឲ្យរងរបួសធ្ងន់ (បាក់កដៃខាងស្តាំ)។
ប្រភពដដែលបានឲ្យដឹងទៀតថា ក្រោយពីបុករួច អ្នកបើកបររថយន្ត បានបើករថយន្តរត់គេចចេញពីកន្លែងកើតហេតុ មកដល់ចំណុចផ្លូវក្រវ៉ាត់ក្រុង ស្ថិតក្នុងភូមិតាបិប សង្កាត់បាវិត ក្រុងបាវិត ខេត្តស្វាយរៀង រថយន្តក៏បានធ្លាក់ចូលប្រឡាយខាងត្បូងផ្លូវចំណែកអ្នកបើកបររថយន្ត ក៏បានរត់គេចខ្លួនបាត់ ។
បច្ចុប្បន្ន អ្នករងរបួសទាំង ៣ នាក់ ត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យរុស្ស៊ីក្រុងភ្នំពេញ ។
មូលហេតុដែលបណ្តាលឲ្យមានគ្រោះថ្នាក់ចរាចរណ៍ខាងលើនេះ គឺបណ្តាលមកពីអ្នកបើកបររថយន្តមិនប្រកាន់ស្តាំ។ មធ្យោបាយ រថយន្តខូចខាតស្រាល និង ម៉ូតូខូចខាតធ្ងន់ ។ រីឯវត្ថុតាងត្រូវបានសមត្ថកិច្ចយកមករក្សាទុក នៅអធិការដ្ឋាននគរបាលក្រុងបាវិត ដើម្បីកសាងសំណុំរឿងចាត់ការតាមនីតិវិធីច្បាប់៕ ដោយ៖វ៉ៃកូ
.