ក្រចេះ៖ជនរងគ្រោះមួយគ្រួសារ គឺឪពុក ម្តាយ និងកូនប្រុសតូច បានស្លាប់បាត់បង់ជីវិតភ្លាមៗនៅកន្លែងកើតហេតុ ដោយគ្រោះថ្នាក់ចរាចរណ៍ដ៏រន្ធត់មួយ បង្កឡើងរវាងរថយន្ត បុកម៉ូតូ នៅវេលាម៉ោង៦និង១៥នាទីយប់ថ្ងៃទី៧ ខែតុលា ឆ្នាំ២០២០នេះ តាមបណ្តោយផ្លូវជាតិលេខ៧ ភូមិសង្គម ឃុំសណ្ដាន់ ស្រុកសំបូរ ខេត្តក្រចេះ ។
សេចក្តីរាយការណ៍បឋមបន្តថា រថយន្តបង្កម៉ាក camary ពណ៌សម្បកឪឡឹក ពាក់ផ្លាកលេខ ព្រះសីហនុ 2A 2100 រថយន្តទំនងជាមានល្បឿនលឿន បានបុកម៉ូតូជនរងគ្រោះខ្ទេចមើលលែងស្គាល់ ខណៈពេលបើករបរក្នុងទិសដៅបញ្ជ្រាសទិសគ្នា ដោយរថយន្តបង្កបើកបរក្នុងទិសដៅពីជើងទៅត្បូង ដល់ចំណុចកើតហេតុរថយន្ត បានបុកម៉ូតូដែលធ្វើដំណើរបញ្ច្រាសទិសគ្នា ពីត្បូង ទៅទិសខាងជើង។ គ្រោះថ្នាក់ដ៏រន្ធត់បុកពេញទំហឹងបណ្តាលឲ្យជនរងគ្រោះចំនួន៣នាក់។ ឪពុក ម្ដាយ ព្រមទាំងកូនប្រុស ស្លាប់បាត់បង់ជីវិតយ៉ាងអាណោចអាធ័ម។ សពបែកជាបំណែកៗ ហើយរថយន្តបង្ករងការខូចខាតយ៉ាងធ្ងន់ធ្ងរ និងម៉ូតូជនរងគ្រោះខូចខាតស្ទើរទាំងស្រុង រហូតមើលមិនស្គាល់ម៉ាក ។ បន្ទាប់ពីកើតហេតុភ្លាមៗនោះ អ្នកបើកបររថយន្តបានរត់គេចខ្លួនបាត់ស្រមោល ពុំទទួលខុសត្រូវឡើយ។
ចំពោះសពជនរងគ្រោះទាំង៣នាក់ ឪពុក ម្តាយ និងកូនប្រុស ខាងសមត្ថកិច្ចនៅមិនទាន់ស្គាល់អត្តសញ្ញាណនៅឡើយទេ ។
ក្រោយកើតហេតុ សមត្ថកិច្ចបានស្ទូចយករថយន្ត និងម៉ូតូ យកទៅរក្សាទុកនៅអធិការដ្ឋាននគរបាលស្រុកសំបូរ ដើម្បីស្រាវជ្រាវ និងបន្តដោះស្រាយនាពេលក្រោយ ៕ដោយ៖សុខុម
