ភ្នំពេញ៖ ចោរឆក់ម្នាក់ក្នុងចំណោមបក្ខពួក២នាក់ ដែលជិះម៉ូតូម្នាក់១គ្រឿង ធ្វើសកម្មភាពឆក់ខ្សែកបុរសម្នាក់កំពុងបោសដីមុខផ្ទះមុខនៅម្តុំផ្សារដេប៉ូ១ បានសម្រេចទាំងព្រឹកថ្ងៃមុន ត្រូវបានចាប់ខ្លួនហើយកាលពីព្រឹកថ្ងៃទី៨ ខែតុលា ឆ្នាំ២០២០ ស្ថិតនៅបុរីហុងឆេង ភូមិទួលម័ល សង្កាត់ដង្កោ ខណ្ឌដង្កោ រាជធានីភ្នំពេញ។
ជនសង្ស័យត្រូវបានចាប់ខ្លួននេះ មានឈ្មោះ ឃាង វណ្ណៈ ភេទប្រុស អាយុ ២៨ ឆ្នាំ មុខរបរមិនពិតប្រាកដ ស្នាក់នៅផ្ទះក្នុងបុរីហុកឆេង ភូមិម័ល សង្កាត់ដង្កោ ខណ្ឌដង្កោ និងមានស្រុកកំណើតនៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ។ តាមរយៈម៉ូតូដែលត្រូវបានរឹបអូស ដែលមានម៉ាកហុងដា PCX ពណ៌ស ស៊េរីឆ្នាំ២០១៩ ពាក់ផ្លាកលេខ 1IK-5814 នោះរូបគេគឺជាអ្នកជិះបិទគូទ នេះបើយោងតាមរយៈវីដេអូធ្វើសកម្មភាព។
គួររំលឹកផងដែរថា កាលពីវេលាម៉ោងប្រមាណជាង ៦ ព្រឹកថ្ងៃទី៧ ខែតុលា ឆ្នាំ២០២០ ជនសង្ស័យខាងលើដែលជាអ្នកជិះម៉ូតូម៉ាក PCX ជាអ្នកចាំបិទគូទ និងដៃគូម្នាក់ខ្លួនម្នាក់ទៀតជិះម៉ូតូ Honda Dream (ជាអ្នកឆក់ពុំទាន់ត្រូវបានឃាត់ខ្លួនទេ) បានធ្វើសកម្មភាពឆក់ខ្សែកបុរសម្នាក់បានសម្រេចទាំងព្រឹក ខណៈគាត់កំពុងឈរបោសសំរាមមុខផ្ទះ ស្ថិតនៅម្តុំផ្សារដេប៉ូ ក្នុងសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ។
ជនសង្ស័យខាងលើ ត្រូវបានសមត្ថកិច្ចនាំយកទៅសាកសួរនៅប៉ុស្តិ៍ និងកសាងសំណុំរឿងប្រគល់ឲ្យនគរបាលព្រហ្មទណ្ឌកម្រិតស្រាលរាជធានីភ្នំពេញ ដើម្បីចាត់ការតាមនីតិវិធីច្បាប់ ខណៈជនសង្ស័យម្នាក់ទៀត ជាអ្នកឆក់ សមត្ថកិច្ចក៏កំពុងធ្វើការតាមជំនាញ ដើម្បីចាប់ខ្លួនយកមកផ្តន្ទាទោសជាបន្តផងដែរ៕ ដោយ៖ លឹម ហុង
