ខេត្តស្វាយរៀង៖លោក ម៉ែន វិបុល អភិបាលខេត្តស្វាយរៀង អមដំណើរដោយ លោកអភិបាលរងខេត្ត លោកស្នងការនគរបាលខេត្ត លោកអភិបាលក្រុងបាវិត និងមន្ត្រីពាក់ព័ន្ធមួយចំនួនទៀត នៅព្រឹកថ្ងៃទី១០ ខែតុលា ឆ្នាំ២០២០នេះ បានអញ្ជើញចុះពិនិត្យមើលស្ថានភាពភាព និងការអភិវឌ្ឍនានារួមមាន៖
១-ពិនិត្យប្រព័ន្ធលូរំដោះទឹកនៅក្នុងក្រុងស្វាយរៀង និងស្ថានភាពកំពស់ទឹកភ្លៀងដើម្បីបង្ការហានិភ័យដែលអាចកើតឡើងដោយសារជំនន់ទឹកភ្លៀង នារយះពេលប៉ុន្មានថ្ងៃកន្លងមកនេះ ដែលប្រទេសកម្ពុជាទទួលរងនូវឥទ្ធិពលព្យុះពីប្រទេសជិតខាង។
២-ពិនិត្យមើលហេដ្ឋារចនាសម្ព័ន្ធផ្លូវ ខ្សែក្រវាត់ព្រំដែន ផ្លូវវាងសម្រាប់ឡានកុងតឺន័រដឹកទំនិញចេញចូលនៅក្រុងបាវិត និងរៀបចំអភិវឌ្ឍន៍ទីតាំងចំណតកុងតឺន៍រវាង កម្ពុជា នឹងវៀតណាមដើម្បីបញ្ជៀសការកកស្ទះទំនិញ។
៣-ពិនិត្យហេដ្ឋារចនាសម្ព័ន្ធផ្លូវបេតុងនានាដែលបានស្ថាបនារួចរាល់១០០%។
៤-ពិនិត្យមើលទីតាំងអាងចម្រោះទឹកកខ្វក់ ទីតាំងញែកសំរាម ទីតាំងផលិតអាងចម្រោះទឹកកខ្វក់ក្នុងក្រុងបាវិត ដែលនឹងចាប់ផ្តើមដំណើរការសាងសង់នាពេលខាងមុខ។
៥- ពិនិត្យមើលដំណើរការសាងសង់សាលាសង្កាត់ ប៉ុស្តិ៍រដ្ឋបាលក្រុងបាវិត និងមូលដ្ឋានកងរាជអាវុធហត្ថក្រុងបាវិត ដែលកំពុងសាងសង់សម្រេចបានប្រមាណ៨៥%ហើយ។
សូមជម្រាបជូនថា ក្នុងអាណត្តិដឹកនាំរបស់លោក ម៉ែន វិបុល អភិបាលខេត្តស្វាយរៀង លោកបាននឹងកំពុងដាក់ចេញនូវទិសដៅសំខាន់ៗជាច្រើនទៀតដែលជាត្រីវិស័យក្នុងការអភិវឌ្ឍខេត្តស្វាយរៀង ស្របតាមទិសដៅយុទ្ធសាស្ត្រចតុកោណរបស់រាជរដ្ឋាភិបាលកម្ពុជា៕ដោយ៖វ៉ៃកូ
