តាកែវ៖ ឱសថ ៤មុខ ដែលក្រសួងសុខាភិបាល បានហាមឃាត់ ដែលក្នុងនោះរួមមាន ថ្នាំគ្រុនចាញ់ ថ្នាំរបេង ថ្នាំអេដស៍ ឱសថតាមមន្ទីរពេទ្យរដ្ឋដែលបានដាក់ស្លាកហាមលក់ និងឧបករណ៍ត្រួតពិនិត្យត្តេសរកជំងឺកូវីដ១៩ ។
ថ្លែងនៅក្នុង ការផ្តល់ជូនវិញ្ញាបនបត្របញ្ជិកា ឱសការីកម្ពុជា និងលិខិតថ្លែងអំណរគុណ (កូវីដ១៩ ) ដល់សមាជិក សមាជិកា ខេត្តតាកែវ កាលពីថ្ងៃ ទី ១២ ខែ តុលា ឆ្នាំ ២០២០ លោក បាន បុត្តា ប្រធានក្រុមប្រឹក្សាគណៈឱសថការីកម្ពុជា បានធ្វើការដាស់តឿននិងណែនាំដល់បងប្អូនដែលជាសមាជិក សមាជិកាឱសថការីសម្រាប់ខេត្តតាកែវ ត្រូវគោរពតាមការណែនាំរបស់ក្រសួងសុខាភិបាល ដែលបានហាមដាច់ខាតនៅតាមកន្លែងលក់ថ្នាំពេទ្យ ឬហ្វាម៉ាស៊ីនិងគ្លីនិច្ចឯកជនមិនឲ្យមានការដាក់លក់ឱសថបួនមុខ ដែលមានដូចជាថ្នាំគ្រុនចាញ់ ថ្នាំរបេង ថ្នាំអេដស៍ ឱសថតាមមន្ទីរពេទ្យរដ្ឋដែលបានដាក់ផ្លាកហាមលក់ និងឧបករណ៍ត្រួតពិនិត្យសេត្តរកជំងឺកូវីដ១៩ ជាដាច់ខាត ប្រសិនបើឱសថស្ថានណាមួយដាក់លក់ថ្នាំហាមឃាត់ទាំងអស់នេះ គឺត្រូវទទួលខុសត្រូវដោយខ្លួនឯងចំពោះច្បាប់ ។
លោកបន្តថា មូលហេតុដែលក្រសួងធ្វើការហាមឃាត់នៅការដាក់លក់ឱសថទាំងនេះ
ដោយសារប្រភេទឱសថទាំងបួនមុខនេះ គឺនៅតាមមន្ទីរពេទ្យបង្អែក មណ្ឌលសុខភាពរបស់រដ្ឋ មានស្រាប់ទុក្ខសម្រាប់ព្យាបាលជូនបងប្អូនប្រជាពលរដ្ឋដោយមិនអស់ជាថវិកានោះទេ ព្រោះមានការជួយជ្រោមជ្រែង យ៉ាងយកចិត្តទុកដាក់ពីសំណាក់រាជរដ្ឋាភិបាលកម្ពុជារបស់យើង ។
ជាមួយគ្នាដែរ លោក បាន បុត្តា ក៏បានអំពាវនាវឲ្យបងប្អូនប្រជាពលរដ្ឋដែលមានការសង្ស័យដែលខ្លួនមានអាការ ឬជំងឺណាមួយនោះសូមឲ្យទៅធ្វើការពិនិត្យឲ្យបានច្បាស់លាស់ជាមួយគ្រូពេទ្យដែលមានជំនាញ ឬនៅតាមមណ្ឌលសុខភាព និងមន្ទីរពេទ្យបង្អែករដ្ឋដែលជិតកន្លែងរស់នៅរបស់បងប្អូន ព្រោះថានៅតាមទីតាំងទាំងនោះយើងមានគ្រូពេទ្យជំនាញ និងព្យាបាលជូនបងប្អូនប្រជាពលរដ្ឋ ដោយមិនមានការគិតលុយនោះឡើយ ហើយឆាប់ជាសះស្បើយពីជំងឺថែមទៀតផង៕ ដោយ៖តាកែវ
