ខួបកំណើតកូនស្រី Love Riya ភ្ញៀវកិត្តិយសសុទ្ធតែកំពូលអ្នកលក់តាម Online ពិសេសចែម៉ី យាយសួយ កូរអស់ទាស់ហ្មង (វីដេអូ)

October 13, 2020

ភ្នំពេញ៖ ដូចដែលបងប្អូនអ្នកប្រើប្រាស់បណ្តាញសង្គមបានស្គាល់ហើយ អ្នកលក់ឡេសាច់សខ្ចីកំពុងល្បីឈ្មោះ Love Riya ឃើញថាមុខជំនួញអនឡាញរបស់នាងបច្ចុប្បន្ន ហាក់កំពុងឡើងកូដជាលំដាប់ ព្រោះថាពីមួយថ្ងៃទៅមួយថ្ងៃ គេតែងសង្កេតឃើញអ្នកមេម៉ាយកូន១រូបស្រស់នេះ បង្ហាញពីជីវិតដ៏សែនហ៊ីហា ហើយបើនិយាយពីសម្រស់វិញគឺរឹតតែខ្ចីឡើងៗតែម្តង។

ពិតមែនហើយ អ្នកនាង Love Riya គឺមានកូនស្រីជាទីស្រឡាញ់ម្នាក់ឈ្មោះ Chheng Ariya Kelly (ហៅ ទែន ទែន) ដែលត្រូវបានដឹងថាជាតំណក់ឈាមជាមួយអតីតស្វាមីគឺលោក ហេន ឌ្រី បន្ទាប់ពីអ្នកទាំងពីរបានរៀបមង្គលការកាលពីថ្ងៃទី១៨ ខែមីនា ឆ្នាំ២០១៩ កន្លងទៅជាង១ឆ្នាំមកនេះ។

បើទោះជាជាប់រវល់ការងាររកស៊ីសឹងតែរកពេលសម្រាកពុំបានយ៉ាងណា ក៏អ្នកនាង Love Riya មិនដែលភ្លេចឡើយ ក្នុងការផ្តល់ភាពកក់ក្តៅក្នុងនាមជាម្តាយគេ និងនាំកូនស្រីដ៏គួរឲ្យគ្រឺតម្នាក់នេះ ទៅដើរលេងតាមទីកន្លែងជិតឆ្ងាយមិនដែលដាច់ឡើយ។

យ៉ាងណាមិញ កាលពីល្ងាចថ្ងៃទី១២ ខែតុលា ឆ្នាំ២០២០ អ្នកនាង Love Riya បានធ្វើពិធីខួបកំណើតឲ្យកូនស្រីឡើងគគ្រឹកគគ្រេងតែម្តង ដោយមានការរៀបចំតុបតែងលម្អក្នុងគេហដ្ឋានធំស្កឹមស្កៃ និងព្រមទាំងការស្លៀកពាក់បែបកូនក្រមុំ ជាមួយគូស្នេហ៍យ៉ាងស្រស់ស្អាតតែម្តង។

អ្វីដែលគួរឲ្យភ្ញាក់ផ្អើលនោះ គឺនៅក្នុងកម្មវិធីនេះ គេក៏បានឃើញវត្តមានសុទ្ធតែកំពូលអ្នកលក់ឡេតាមអនឡាញជាច្រើនរូប បានមកចូលរួម ដែលក្នុងនោះជាពិសេសយាយ សួយ, អ្នកស្រី អ៊ាន សៀវម៉ី ដែលក៏ជាតារាហ្វេសប៊ុកដ៏ល្បីឈ្មោះខ្លាំងនាពេលបច្ចុប្បន្នផងដែរ៕ ដោយ៖ លឹម ហុង