សៀមរាប៖ រដ្ឋបាលខេត្តសៀមរាប សូមបញ្ជាក់ថា ការផ្សព្វផ្សាយទឹកភ្នំគូលែន គឺរូបភាពឆ្នាំ២០១៧ ហើយបច្ចុប្បន្ន ទឹកមានស្ថានភាពធម្មតាដូចរូបភាពថត កាលពីព្រឹកថ្ងៃទី១៦ ខែតុលា ឆ្នាំ២០២០
ក្នុងអំឡុងពេលស្ថានភាពប្រទេសកម្ពុជា កំពុងតែជួបប្រទះនឹងជំនន់ទឹកភ្លៀង រដ្ឋបាលខេត្តសង្កេតឃើញថា មានគណនីឈ្មោះ Mai Muon និងគណនីឈ្មោះ អុក ជួរ បានយករូបភាពទឹកឡើងខ្លាំងនៅតំបន់ភ្នំគូលែនកាលពីថ្ងៃទី៧ ខែតុលា ឆ្នាំ២០១៧ មកបង្ហោះក្នុងគណនេយ្យឡើងវិញ ដែលសកម្មភាពនេះធ្វើឱ្យបងប្អូន ក៏ដូចជាសាធារណជនមានការភាន់ច្រឡំ។
ជាមួយគ្នានេះ រដ្ឋបាលខេត្តសូមបញ្ជាក់ថា ស្ថានភាពទឹកនៅតំបន់ភ្នំគូលែន មានស្ថានភាពល្អប្រសើរ និងគ្រប់គ្រងបានដែលមិនទាន់ប្រកាសអាសន្ននោះទេ ដូចមាននៅក្នុងរូបភាពដែលបានថត កាលពីព្រឹកថ្ងៃទី១៦ ខែតុលា ឆ្នាំ២០២០។
រដ្ឋបាលខេត្ត សូមស្នើឲ្យបងប្អូនផ្សព្វផ្សាយព័ត៌មានឲ្យបានត្រឹមត្រូវ មានមូលដ្ឋានច្បាស់លាស់ ដោយហេតុថា ការផ្សព្វផ្សាយព័ត៌មានមិនពិត ឬមានចេតនាបង្ករការយល់ច្រឡំ ឬអសណ្តាប់សង្គម គឺអាចប្រឈមចំពោះមុខច្បាប់៕ដោយ៖បញ្ញាស័ក្តិ
កាលពីថ្ងៃទី ១៦ ខែតុលា ឆ្នាំ២០២០ ម្ចាស់គណនីហ្វេសបុកមួយឈ្មោះ Mai Muon ដែលបានបង្ហោះផ្សព្វផ្សាយ ដោយយករូបភាព២០១៧ ខុសពីភាពជាក់ស្តែង ព្រមទាំងសរសេរខ្លឹមសារបំភាន់សាធារណមតិ និងធ្វើឲ្យមានការយល់ច្រឡំពីសំណាក់ប្រជាពលរដ្ឋ និងអ្នកលេងបណ្ដាញទំនាក់សង្គម បានចេញមកសុំទោសជាសាធារណៈដោយមានសំឡេងនិងវីដេអូដូចខាងក្រោម ៖
