ស្ទឹងត្រែង៖ប្រតិបត្តិការបង្ក្រាបគ្រឿងញៀនឃាត់ខ្លួនបានជនសង្ស័យចំនួន ២ នាក់និងដកហូតបានថ្នាំញៀន ៤ គីឡូក្រាមនៅម៉ោង ៣និង៣០នាទីរសៀលថ្ងៃទី ១៨ ខែតុលាឆ្នាំ២០២០។
កម្លាំងប្រឆាំងគ្រឿងញៀនខេត្ត ចាប់ឃាត់ខ្លួនបន្តបន្ទាប់ដកហូតបានវត្ថុតាងគ្រឿងញៀន ៤កញ្ចប់ធំ(ស្មើនិងជិត៤គីឡូក្រាម)និងគ្រវីចំនួន២ថង់តូច។
សមត្ថកិច្ចបានឃាត់ខ្លួនជនសង្ស័យម្នាក់ នៅចំណុចភូមិលើ សង្កាត់ស្រះឬស្សី ក្រុងស្ទឹងត្រែង និងនៅថ្ងៃទី១៨តុលា នេះបានបន្តស្រាវជ្រាវចុះគាត់ខ្លួនជនសង្ស័យម្នាក់ទៀត នៅជិតច្រកអន្តរជាតិត្រពាំងក្រៀល។
លោកវរសេនីយ៍ទោ ចែម ផានិតនាយការិយាល័យប្រឆាំងគ្រឿងញៀនខេត្ត បានឲ្យដឹងថាជនសង្ស័យដែលសមត្ថកិច្ចចាប់ខ្លួនទី១- ឈ្មោះអ៊ិន ថាភេទស្រី អាយុ ៤៧ឆ្នាំ ជនជាតិ ខ្មែរ ភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។ ទី២.ឈ្មោះវ៉ាន ភូរ ភេទប្រុស អាយុ ២៧ឆ្នាំមានទីលំនៅភូមិស្ដៅ ឃុំស្ដៅ ស្រុកសេសាន ខេត្តស្ទឹងត្រែង។
លោកវរសេនីយ៍ទោបានបន្តឲ្យដឹងទៀតថា ស្ថិតការក្រោមបញ្ជាផ្ទាល់ពីលោក ឧត្តមសេនីយ៍ត្រីអូត ស៊ីវត្ថាស្នងការនគរបាលខេត្ត និងមានការសម្របសម្រួលពីព្រះរាជអាជ្ញាអមសាលាដំបូងខេត្តស្ទឹងត្រែង កម្លាំងជំនាញបានចុះដល់ចំណុចខាងលើ ឃាត់ខ្លួនបានជនសង្ស័យម្នាក់ ដកហូតគ្រឿងញៀនចំនួន ៣កញ្ចប់ធំ សាកសួរ និងបន្តនីតិវិធីឈានដល់ឃាត់ខ្លួនជនសង្ស័យម្នាក់ទៀត នៅជិតព្រំដែនឡាវរួមជាមួយថ្នាំគ្រវីចំនួន ២ថង់តូច និងនាំមកកាន់ស្នងការដ្ឋាននគរបាលខេត្តសាកសួរ។
ជនសង្ស័យទាំង ២នាក់បានឆ្លើយសារភាព ចំពោះមុខសមត្ថកិច្ចថា គ្រឿងញៀនខាងលើនេះ ពិតជារបស់ខ្លួនពិតប្រាកដមែន ។ ទាំង ២នាក់ខាងលើ សមត្ថកិច្ចជំនាញកំពុងធ្វើការសាកសួរ កសាងសំណុំរឿង រួមទាំងវត្ថុតាមបញ្ជូនខ្លួន ទៅកាន់តុលាការ ដើម្បីចាត់ការបន្តតាមនីតិវិធី៕ ដោយ៖សុខុម
