បុរសវ័យជាង៥០ឆ្នាំម្នាក់ រស់នៅគល់ស្ពានលេខ១ ភូមិកសិណ ឃុំថ្មពួក ស្រុកថ្មពួក ខេត្តបន្ទាយមានជ័យ ដែលបានបាត់ខ្លួនដោយសារទឹកជំនន់កាលពីម្សិលមិញ ត្រូវបានរកឃើញសាកសពហើយ នៅព្រឹកថ្ងៃទី២០ ខែតុលា ឆ្នាំ២០២០ នេះ។
គួររម្លឹកថា សពបុរសចំណាស់ខាងលើដែលមានឈ្មោះ ណាត លន អាយុជាង ៥០ ឆ្នាំ មុនពេលជួបគ្រោះថ្នាក់ត្រូវទឹកកួចយកទៅបាត់ គឺដោយសារតែនៅេវលាម៉ោងប្រមាណ ១១ ថ្ងៃត្រង់ គាត់បាននាំកូនប្រុស២នាក់ ទៅមេីលផ្ទះ និងចង់យកឥវ៉ាន់ខ្លះៗនៅក្នុងផ្ទះ ប៉ុន្តែ ដោយសារផ្ទះគាត់នៅជាប់គល់ស្ពាន ស្របពេលទឹកកំពុងហក់ឡេីងយ៉ាងខ្លាំងក្លាផងនោះ ក៏ធ្វើឲ្យបាក់ដីជាប់ផ្ទះ ធ្លាក់គាត់និងកូនម្នាក់ទៅក្នុងទឹកតែម្តង។ ហើយដោយឃើញកូនត្រូវទឹកគួច គាត់ក៏ស្រវ៉ាស្ទុះទៅជួយកូន តែជាអកុលសគាត់ក៏ត្រូវទឹកគួចវិញ បន្ទាប់ពីបានប្រាប់ និងរុញកូនឲ្យតោងដើមឈើ ដើម្បីរួចផុតពីគ្រោះថ្នាក់។
តែយ៉ាងណា អ្វីដែលកាន់តែខ្លោចចិត្តទៀតនោះ គឺជីវភាពគ្រួសាររបស់គាត់ ពិតជាមហាសែនលំបាកខ្លាំងណាស់ ព្រោះមានកូនច្រើនក្នុងបន្ទុក ហើយប្រពន្ធរបស់គាត់ក៏ពុំមានថវិកាក្នុងធ្វើការបុណ្យសពឲ្យប្តីនោះទេ។ ហេតុនេះ សូមសប្បុរសជនមេត្តាជួយឧបត្ថម្ភដល់គ្រួសារគាត់ផង ព្រោះពេលនេះបង្គោលគ្រួសារត្រូវបានបាត់បង់ ដោយមិនដឹងថាតទៅមុខខ្សែជីវិតកូនប្រពន្ធរបស់គាត់នឹងទៅជាយ៉ាងណា៕ ដោយ៖ លឹម ហុង
