ភ្នំពេញ៖ ចាប់តាំងពីថ្ងៃ១ដល់ថ្ងៃទី១៩ ខែតុលា ឆ្នាំ២០២០នេះ ប្រទេសកម្ពុជាបានទទួលរងនូវជំនន់ទឹកភ្លៀង ដែលធ្វើឱ្យប៉ះពាល់ដល់១៩រាជធានី-ខេត្ត ក្រុង ស្មើ៩១ខណ្ឌ-ស្រុក។ ប្រជាជនកម្ពុជាប្រមាណ៧៨.០៥៦គ្រួសារ ស្មើប្រមាណ ៣១២,២២៤នាក់ ក្នុងនោះប្រជាពលរដ្ឋចំនួន២៥នាក់បានស្លាប់ ហេដ្ឋារចនាសម្ពន្ធ័មួយចំនួនដូចជា ផ្លូវថ្នល់ ប្រពន្ធ័ធារាសាស្ត្រ សាលារៀន មន្ទីរពេទ្យ រោងចក្រ ទេសចរបានទទួលរងនូវផលប៉ះពាល់ពីជំនន់ទឹកភ្លៀងដ៏ធំនាឆ្នាំ២០២០នេះ។ នេះបើតាមការផ្សាយរបស់រាជបណ្ឌិត្យសភាកម្ពុជា។
១-ជំនន់ទឹកភ្លៀងឆ្នាំ២០២០
ចាប់តាំងពីថ្ងៃ១ដល់ថ្ងៃទី១៩ ខែតុលា ឆ្នាំ២០២០នេះ ប្រទេសកម្ពុជាបានទទួលរងនូវជំនន់ទឹកភ្លៀងដែលធ្វើឱ្យប៉ះពាល់ដល់១៩រាជធានី-ខេត្ត ក្រុង ស្មើ៩១ខណ្ឌ-ស្រុក។ ប្រជាជនកម្ពុជាប្រមាណ៧៨.០៥៦គ្រួសារ ស្មើប្រមាណ ៣១២.២២៤នាក់ ក្នុងនោះប្រជាពលរដ្ឋចំនួន២៥នាក់បានស្លាប់ ហេដ្ឋារចនាសម្ពន្ធ័មួយចំនួនដូចជា ផ្លូវថ្នល់ ប្រពន្ធ័ធារាសាស្ត្រ សាលារៀន មន្ទីរពេទ្យ រោងចក្រ ទេសចរណ៍បានទទួលរងនូវផលប៉ះពាល់ពីជំនន់ទឹកភ្លៀងដ៏ធំនាឆ្នាំ២០២០នេះ។
រាជរដ្ឋាភិបាលកម្ពុជាទទួលបានជំនួយថវិកាសរុបប្រមាណ៧.១៦៣.៥៧៣ដុល្លារសហរដ្ឋអាមេរិកនិងការបន្តជួយជាសម្ភារ ថវិកា បច្ចេកទេសពីសប្បុរសជននានា (ប្រសាសន៍សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា ថ្ងៃទី១៩តុលាឆ្នាំ២០២០)។
២-ផលប៉ះពាល់ផ្ទាល់ដល់សង្គម-សេដ្ឋកិច្ចនាពេលបច្ចុប្បន្ន
ប្រជាពលរដ្ឋនៅតាមតំបន់រងគ្រោះទាំងនោះ ជាពិសេសប្រជាពលរដ្ឋក្រីក្រនិងជនងាយរងគ្រោះរួមមានចាស់ជរា ជនពិការនិងកុមារទទួលរងផលប៉ះពាល់ផ្ទាល់ខ្លាំងជាងគេ។ ផ្ទះសម្បែង សាលារៀន មន្ទីរពេទ្យ ផ្លូវថ្នល់និងប្រព័ន្ធគមនាគមន៍ត្រូវរអាក់រអួលក្នុងអំឡុងពេលជំនន់ទឹកភ្លៀង។ជីវភាពរស់នៅប្រចាំថ្ងៃ ការរកចំណូលចិញ្ចឹមគ្រួសារ សុខមាលភាពប្រជាពលរដ្ឋ ការស្វែងរកសេវាសាធារណៈ សាលារៀន មន្ទីរពេទ្យ សាលាឃុំ។ល។ត្រូវបានរំខាន។
ខាងក្រោមនេះគឺជាទិន្នន័យនៃការទទួលរងផលប៉ះពាល់ផ្ទាល់ដែលគណ:កម្មាធិការជាតិគ្រប់គ្រងគ្រោះមហន្តរាយបានផ្សព្ធផ្សាយថ្ងៃទី១៩ ខែតុលា ឆ្នាំ២០២០៖ ប៉ះពាល់១៩ រាជធានី ខេត្ត ក្រុង។ ប៉ះពាល់ប្រជាជនប្រមាណ៧៨.០៥៦គ្រួសារ ស្មើប្រមាណ៣១២.២២៤នាក់។ ជម្លៀសចេញ៩៣៤៩គ្រួសារស្មើ៣៧.៣៩៦នាក់ ។ មនុស្សស្លាប់២៥នាក់។ ប៉ះពាល់ផ្ទះ៧៣.៧២០ ខូចខាត៥៦ខ្នង។ សាលារៀនលិចទឹក៥៦៨កន្លែង។ ផ្លូវជាតិ ផ្លូវខេត្ត ប្រមាណ៣៩៣គីឡូម៉ែត្រ និងផ្លូវលំជនបទប្រមាណ១៤៦៧គីឡូម៉ែត្រ។ ប្រពន្ធ័ធារាសាស្ត្រនានា-ទំនប់២៤គីឡូម៉ែត្រ ប្រឡាយមេ១៩៧,៣គីឡូម៉ែត្រ ប្រឡាយរង១៤៩,៦គីឡូម៉ែត្រ ប្រឡាយស្រោចស្រព៨៥,៩គីឡូម៉ែត្រ ស្រូវលិចទឹក២១៣.២៨៩ហិកតា ដំណាំរួមផ្សំផ្សេងៗ៧៩.៨៨៨ហិកតា។ល។
តាមទិន្នន័យខាងលើ យើងឃើញថា ផលប៉ះពាល់ដល់សង្គម-សេដ្ឋកិច្ច មានទំហំធំធេងដែលជាបញ្ហាការអភិវឌ្ឍថ្មីបន្ថែម ដល់ការទទួលខុសត្រូវរបស់ប្រជាពលរដ្ឋ រាជរដ្ឋាភិបាល វិស័យឯកជននិងដៃគូអភិវឌ្ឍន៍នានាក្នុងពេលបច្ចុប្បន្ន។
៣-ផលប៉ះពាល់ដល់សង្គម-សេដ្ឋកិច្ចនាពេលអនាគត
បន្ទាប់ពីមានគ្រោះមហន្តរាយធម្មជាតិម្តងៗ កម្ពុជាបានប្រើប្រាស់នូវថវិកាជាតិដែលបានមកពីចំណូលពន្ធគយ ចំណូលពន្ធដារនិងជំនួយបច្ចេកទេស សម្ភារ ថវិកាពីដៃគូអភិវឌ្ឍន៍ វិសយ័ឯកជននិងសប្បុរសជននានា ដើម្បីស្តារហេដ្ឋារចនាសម្ព័ន្ធសារវ័ន្តនិងសង្គម-សេដ្ឋកិច្ចឡើងវិញ។
ជំនន់ទឹកភ្លៀងឆ្នាំ២០២០នេះជាបន្ទុកដ៏ធ្ងន់ធ្ងរមួយទៀតបន្ថែម ពីលើបញ្ហាជំងឺកូវីដ-១៩ ដែលកម្ពុជាកំពុងរងផលប៉ះពាល់ដោយផ្ទាល់ និងប្រយោលរួចស្រេចទៅហើយ (យោងតាមការវាយតម្លៃពីបច្ចុប្បន្នភាព នៃសេដ្ឋកិច្ចកម្ពុជានាឆ្នាំ២០២០ពីរាជរដ្ឋាភិបាលកម្ពុជា(-១,៩%) ធនាគារអភិវឌ្ឍន៍អាសីADB (-៤%) មូលនិធិរូបិយវត្ថុអន្តរជាតិIMF (-២,៨%) និងធនាគារពិភពលោកWB (-២%) ដែលបណ្តាលមកពីជំងឺកូវីដ-១៩)។
មុនពេលជំនន់ទឹកភ្លៀងយើងមានសុទិដ្ធិនិយមថា វិសយ័កសិកម្ម (ការប្រើប្រាស់កសិផលក្នុងស្រុកនិងការនាំចេញ) វិស័យទេសចរណ៍ (ការធ្វើដំណើរកម្សាន្តក្នុងស្រុក) និងវិសយ័សំណង់-អចលនទ្រព្យ (គម្រោងសំណង់ធំៗនៅដំណើរការនិងតម្រូវការអតិថិជនក្នុងស្រុក) ។ល។ អាចជួយសេដ្ឋកិច្ចកម្ពុជា បានខ្លះនាឆ្នាំ២០២០ និងឆ្នាំបន្ទាប់ តែវិស័យទាំងនេះក៏កំពុងទទួលរងផលប៉ះពាល់ ដោយសារជំនន់ទឹកភ្លៀងផងដែរ។ សេដ្ឋកិច្ចកម្ពុជាដែលធ្លាប់ពឹងផ្អែកលើវិស័យកសិកម្ម វិស័យទេសចរណ៍ និងវាយនភណ្ឌក៏ទទួលរងផលប៉ះពាល់ដោយផ្ទាល់ និងប្រយោល។ ប្រជាពលរដ្ឋកម្ពុជាដែលប្រកបរបរក្នុងវិសយ័ទេសចរណ៍ រោងចក្រ វាយនភណ្ឌ សំណង់និងកសិកម្ម ទទួលរងផលប៉ះពាល់ ចំណូលសេដ្ឋកិច្ចគ្រួសារធ្លាក់ចុះ អត្រាភាពក្រីក្រកើនឡើងវិញ សុខភាពផ្លូវចិត្ត ផ្លូវកាយ មានអំពើហិង្សាក្នុងគ្រួសារនិងសង្គម។
ការសម្រេចគោលដៅរបស់កម្ពុជានា២០៣០ ទៅជាប្រទេសមានចំណូលមធ្យមកម្រិតខ្ពស់ និងការធានាស្ថិរភាពម៉ាក្រូសេដ្ឋកិច្ច ក្នុងរង្វង់៧% ក្នុងមួយឆ្នាំ ផែនការអភិវឌ្ឍជាតិនានា ត្រូវជួបការរាំងស្ទះ។ ចំណូលនិងចំណាយថវិកាជាតិមួយផ្នែកធំនឹងត្រូវផ្តោតលើការស្តារហេដ្ឋារចនាសម្ព័ន្ធសារវ័ន្តឡើងវិញ។
ទោះបីយ៉ាងក៏ដោយ ក៏យើងនៅតែមានសុទិដ្ធិនិយមថា នាពេលអនាគត តាមរយៈការស្ថាបនាឡើងវិញ កាន់តែប្រសើរ (Building Back Better-BBB) ពីគ្រោះជំនន់ទឹកភ្លៀងរបស់រាជរដ្ឋាភិបាលកម្ពុជា ដៃគូអភិវឌ្ឍន៍និងវិស័យឯកជន ការកែទម្រង់ផ្ទៃក្នុង ការធ្វើពិពិធកម្មសេដ្ឋកិច្ច និងការអភិវឌ្ឍប្រកបដោយបរិយាប័ន្ន ស្ថិរភាពនិងនិរន្តរភាពជាតិ៕ដោយ៖បញ្ញាស័ក្តិ
