ភ្នំពេញ៖ នាព្រឹកថ្ងៃសៅរ៍ ទី២៤ ខែតុលា ឆ្នាំ២០២០ សហព័ន្ធកីឡាវាយកូនឃ្លីលើតុកម្ពុជា បានប្រារព្ធពិធីបិទការប្រកួតកីឡាវាយកូនឃ្លីលើតុ ជ្រើសរើសជើងឯកថ្នាក់ជាតិ និងពានរង្វាន់សហព័ន្ធកីឡាវាយកូនឃ្លីលើតុកម្ពុជា លើកទី១ ប្រចាំឆ្នាំ ២០២០ ក្រោមអធិបតីភាព ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ ជាប្រធានសហព័ន្ធកីឡាវាយកូនឃ្លីលើតុកម្ពុជា និងឯកឧត្តម អ៊ុក សិទ្ធិជាតិ អគ្គនាយក នៃអគ្គនាយកដ្ឋានអប់រំកាយ និងកីឡា។
នៅក្នុងពិធីបិទការប្រកួតនេះដែរ ឯកឧត្តម ប្រធានសហព័ន្ធ ក៏បានប្រគល់លិខិតតែងតាំង លោក XU THOMAS អគ្គនាយក ក្រុមហ៊ុន លីស៊ីនគ្រុប (LIXIN GROUP) ជាទីប្រឹក្សាជាន់ខ្ពស់សហព័ន្ធកីឡាវាយកូនឃ្លីលើតុកម្ពុជា និងប្រគល់លិខិតថ្លែងអំណរគុណ ជូនដល់បណ្ដាលសមាគម ក្លិប រាជធានី-ខេត្ត ដែលបានមកចូលរួមក្នុងការប្រកួតនេះ។
ការប្រកួតនេះ បានប្រព្រឹត្តទៅរយៈពេល ០៦ថ្ងៃ គិតចាប់ពីចាប់ពីថ្ងៃទី១៩ ដល់ថ្ងៃទី២៤ ខែតុលា ឆ្នាំ២០២០ ដែលមានចំនួន ២២សមាគម ក្លិប រាជធានី-ខេត្ត (មាន ០៦ខេត្ត) សរុប ២៤ក្រុម មានប្រតិភូ គ្រូបង្វឹក ចំនួន ៤១នាក់ ស្រី ០១នាក់ កីឡាករ-កីឡាការិនី សរុប ១៣៣នាក់ ស្រី ១៩នាក់ ហើយបែងចែកជា ០២ក្របខណ្ឌ (ក្របខណ្ឌ ក១ អាយុ ១៩ឆ្នាំឡើង និងក្របខណ្ឌ ក២ អាយុ ១៨ឆ្នាំចុះ) និងប្រកួតលើ ០៨វិញ្ញាសា ស្មើនឹង ៤៥៦ប្រកួត។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអគ្គនាយកដ្ឋានអន្តោប្រវេសន៍ បានមានប្រសាសន៍ថា សូមចូលរួមលេងកីឡាវាយកូនឃ្លីលើតុនេះ ឲ្យកាន់តែមានលក្ខណៈផុលផុស នឹងកាន់តែច្រើនថែមទៀត ដែលជាឱកាសដើម្បី បង្កើតនូវបរិយាកាស ប្រកួតប្រជែងកាន់តែទូលំទូលាយ។ ម្យ៉ាងវិញទៀតដើម្បីលើកកម្ពស់សមត្ថភាព នៅកម្ពស់បច្ចេកទេស ក្នុងការប្រកួតកីឡាវាយកូនឃ្លីលើតុរបស់យើង ឲ្យកាន់តែមានការរីកចម្រើន។ ជាមួយនោះកម្មវិធីប្រកួតរបស់យើងក៏ជាឱកាស ដើម្បីឲ្យសហព័ន្ធរបស់យើង គណៈកម្មការរបស់យើង ក្នុងវិស័យកីឡាវាយកូនឃ្លីលើតុ បានរកឃើញកីឡាករ កីឡាការិនីឆ្នើមៗរបស់យើង ដើម្បីត្រៀមឈានឆ្ពោះទៅវគ្គបំប៉ន បណ្ដុះបណ្ដាលថែមទៀត ដើម្បីត្រៀមទៅប្រកួតស៊ីហ្គេម នៅប្រទេសវៀតណាម ឆ្នាំ២០២១ខាងមុខនេះ ក៏ដូចជាយើងត្រៀមសម្រាប់ស៊ីហ្គេមលើកទី២៣។ ជាមួយគ្នានោះដែរ យើងក៏បានផ្តល់ឱកាស ដើម្បីឲ្យកីឡាករ កីឡាការនី របស់យើង ដូចជាគណៈកម្មការរបស់យើង បានដកពិសោធន៍ ទាំងការប្រកួត បច្ចេកទេសប្រកួត ក៏ដូចជាដកពិសោធន៍ នៅការរៀបចំព្រឹត្តិការណ៍ប្រកួត ដើម្បីតៀមធ្វើជាម្ចាស់ផ្ទះនៅពេលខាងមុខនេះ។
នាឱកាសដ៏ថ្លៃថ្លានោះ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ ប្រធានសហព័ន្ធ ជំនួសមុខឲ្យសមាជិកសមាជិកាទាំងអស់ នៃសហព័ន្ធកីឡាវាយកូនឃ្លីលើតុ ថ្ងៃនេះសូមសំដែងនូវការអបអរសាទរ ដ៏ជ្រាលជ្រៅបំផុត នឹងមានសេចក្តីសោមនស្សរីករាយបំផុត ចំពោះជ័យលាភីដែលបាន ឆ្លងកាត់ការប្រកួត ក្នុងរយៈពេល ០៥ថ្ងៃកន្លងមកនេះ ទទួលបានជោគជ័យ ដែលពិសេសទៀត គណៈកម្មការជាតិក្នុងការប្រកួត ប្រកាសជ័យលាភីអញ្ជើញជ័យលាភីទាំងអស់ទទួលយករង្វាន់។
តាងនាមប្រធានសហព័ន្ធ បានសង្កេតឃើញថាតាមការឆ្លងកាត់ នៃការប្រកួតនេះ បានបង្ហាញពីសមត្ថភាពរបស់កីឡាករ កីឡាការិនី របស់យើង បើប្រៀបធៀបទៅនឹងការប្រកួតលើកមុន យើងឃើញថាសមត្ថភាព ហាក់បីដូចជាមានការប្រែប្រួលច្រើនជាងមុន ជាមួយគ្នានេះយើងក៏ឃើញទាំងអស់គ្នាថា ការចូលរួមលើកនេះ ក៏សកម្មភាពផុលផុសជាងមុនបើយើងប្រៀបធៀបកាលពីដើមឆ្នាំ កាលយើងរៀបចំការប្រកួតលើកទី១។
ឯកឧត្តម នាយឧត្តមសេនីយ៍ ប្រធានសហព័ន្ធសង្ឃឹមថា ការប្រកួតលើកក្រោយនឹងមានចំនួនក្រុមកើនឡើង កាន់តែច្រើនថែមទៀត។ ឯកឧត្តម ក៏បានចាត់ទុកថាលទ្ធផលនៃការប្រកួតដែលបានឆ្លងកាត់រយៈពេលប៉ុន្មានថ្ងៃកន្លងមកនេះ យើងសម្រេចជោគជ័យល្អបែបនេះ គឺជាសមិទ្ធផលថ្មីមួយទៀត សម្រាប់កីឡាវាយកូនឃ្លីលើតុកម្ពុជារបស់យើង។ ម្យ៉ាងវិញទៀតគឺជាការរួមចំណែក ក្នុងការអភិវឌ្ឍ កីឡាជាតិរបស់យើង ក្នុងនោះកីឡាវាយកូនឃ្លីលើតុ បានចាប់ផ្ដើមដំណើរការ បោះជំហានទៅមុខ ក៏ដូចអ្នកទាំងអស់គ្នាបានឃើញហើយ។ ហើយម្យ៉ាងវិញទៀតយើងក៏បានឆ្លើយតប ក្រសួងផងដែរ ការទទួលខុសត្រូវរបស់រាជរដ្ឋាភិបាលរបស់យើងកែទម្រង់ និងការយកចិត្តទុកដាក់ ចំពោះវិស័យកីឡា។
ក្នុងឱកាសនោះ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ សូមថ្លែងអំណរគុណ ដ៏ជ្រាលជ្រៅ ទី១. ចំពោះកីឡាករកីឡាការិនីទាំងអស់ អញ្ជើញចូលរួមការប្រកួតលើកនេះ ដែលញុំាងឲ្យកម្មវិធីប្រកួតរបស់យើង មានលក្ខណៈផុលផុសជាងលើកមុន ហើយបង្ហាញឲ្យឃើញពីការប្រកួតប្រជែង កាន់តែមានមានកម្រិតខ្ពស់ជាងមុន ទី២. ក៏សូមអរគុណចំពោះ ម្ចាស់ក្លឹប ជាអ្នកគ្រប់គ្រងក្លឹប ប្រធានសមាគមទាំងអស់ដែលបានអញ្ជើញចូលរួម ដែលយើងខ្ញុំចាត់ទុកថា សកម្មភាពនេះ គឺជាការរួមចំណែក ក្នុងការលើកទឹកចិត្តដល់កីឡាករ កីឡាការនី យើងឲ្យចូលមកប្រកួត ក៏ដូចជាលើកទឹកចិត្ត ដល់វិស័យកីឡាវាយកូនឃ្លីលើតុ របស់យើងបានតែមានការរីកចម្រើនថែមទៀត។ ជាមួយគ្នានោះដែរ ឯកឧត្តម ក៏បានអរគុណដល់គណកម្មការទាំងអស់ ដែលបានរៀបចំក្នុងការប្រកួតរបស់យើង រយៈពេលកន្លងទៅនេះ។
ឯកឧត្តម ប្រធានសហព័ន្ធ ក៏បានថ្លែងអំណរគុណ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាល
ជាតិ និងជាប្រធានកិត្តិយស គណៈកម្មការសហព័ន្ធកីឡាវាយកូនឃ្លីលើតុកម្ពុជារបស់យើង ជានិច្ចកាល ឯកឧត្តម នាយឧត្តមសេនីយ៍ តែលើកទឹកចិត្ត ដល់គណៈកម្មការសហព័ន្ធ និងផ្ដល់ឱកាស ដល់បទពិសោធន៍ ជាច្រើនផងដែរ។ ឯកឧត្តម បានថ្លែងអណរគុណដល់សប្បុរជននានា ដែលបានចូលរួមឧបត្ថម្ភដល់ការប្រកួត។
ជាចុងក្រោយ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ និងជាប្រធានសហព័ន្ធកីឡាវាយកូនឃ្លីលើតុ សូមថ្លែងអំណរគុណយ៉ាងជ្រាលជ្រៅ ចំពោះប្រមុខរាជរដ្ឋាភិបាល ដែលដឹកនាំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជានិច្ចកាលតែងតែយកចិត្តទុកដាក់ ចំពោះវិស័យកីឡា អភិវឌ្ឍន៍កីឡា ហើយយើងទាំងអស់គ្នា ឃើញថាប៉ុន្មានឆ្នាំចុងក្រោយនេះ កីឡាលើគ្រប់វិស័យរបស់ប្រទេសកម្ពុជា មានការរីកចម្រើនជាបន្តបន្ទាប់ នៅក្នុងនោះដោយសារ សម្ដេច ទើបមានសន្តិភាព ដោយសារសន្តិភាព ទើបមានការអភិវឌ្ឍ៕
ដោយ៖បញ្ញាស័ក្តិ
