តាកែវ៖ ផ្លូវក្រុងដូនកែវលេខ២៦ត្រូវបានប្រជាពលរដ្ឋដែលធ្វើតំណើរឆ្លងកាត់នាំគ្នាហៅឈ្មោះផ្លូវនោះជាផ្លូវអេតចាយវិញហើយ ព្រោះមានគេស្គាល់ជាង ដោយសារតែទីតាំងស្តុកនិងចែកចាយ សំភារៈអេតចាយក្នុងខេត្តតាកែវមួយនេះ បានយកផ្លូវថ្នល់ធ្វើជាអាជីវកម្មយ៉ាងអាណាធិបតេយ្យ ដោយគ្មានអាជ្ញាធររៀបចំសណ្តាប់ធ្នាប់នៅទីនោះបានឡើយ ព្រោះថៅកែចែកចាយសំភារៈកាកសំណល់ ដែលហៅថា អេតចាយទាំងនោះ គេមានខ្សែធំៗណាស់ ខណៈដែលទីតាំង មានអភិបាលក្រុងដូនកែវ ២ជំនាន់ហើយ ដែលកោះហៅថៅកែស្តុកអេតចាយនោះមកធ្វើកិច្ចសន្យាបញ្ឈប់ និងថែមទាំងធ្លាប់ដកហូតដឹកយកសំភារៈអេត ចាយ ទាំងនោះយកមកទុកនៅសាលាក្រុងថែមទៀត តែដូចចាក់ទឹកដាកលើក្បាលទាអញ្ចឹង ចំពោះបញ្ហានេះប្រជាពលរដ្ឋក្នុងក្រុងដូនកែវនាំគ្នានិយាយថា បើអាជ្ញាធរក្រុងដូនកែវ មិនមានលទ្ធភាពដល់រៀបចំរបៀបរយទៅលើទីតាំងអេតចាយនោះ គឺប្រហែលមានតែឯកឧត្តម អ៊ូច ភា អភិបាលខេត្តតាកែវជាអ្នកចេញមុខហើយមើលទៅ ទើបអាចទៅរួច ។
សូមបញ្ជាក់ផងដែរ លោក បាន ភារៈ អភិបាលរងក្រុងដូនកែវ បានធ្លាប់និយាយហើយ ថាទីតាំងស្តុកសំភារៈអេតចាយ នេះគឺអាជ្ញាធរក្រុងបានធ្លាប់ដកហូតនៅសំភារៈអេតចាយទាំងនោះ និងកោះហៅមកធ្វើកិច្ចសន្យានឹងណែនាំរាប់ភ្លេចហើយ ក្នុងគោលបំណងចង់រៀបចំសណ្តាប់ផ្លូវនៅកណ្តាលក្រុងអោយសភាពល្អប្រសើរ តែផ្ទុយទៅវិញម្ចាស់ទីតាំងខាងលើ នៅតែផ្គើនមិនខ្លាចរអាការណែនាំអាជ្ញាធរដដែល ព្រោះគេមានខ្សែធំចាំជួយអន្តរាគមន៍នៅពីក្រោយខ្នង ។
ចំណែកលោក កង អាណាន់ អភិបាលក្រុងដូនកែវវិញបាននិយាយថា អាជ្ញាធរក្រុងបាននាំគ្នាខិតខំណាស់ក្នុងការរៀបចំសោភ័ណ្ឌភាពក្នុងក្រុងឲមានសណ្តាប់ធ្នាប់ល្អ តែបែជាមានអ្នកមានអំណាចមកកាងទីតាំងស្តុកអេតចាយនៅចំកណ្តាលក្រុងដូនកែវបែបនេះទៅវិញ តែបើមិនស្តាប់មានតែអនុវត្តលើផ្លូវច្បាប់ហើយ ។
ប្រជាពលរដ្ឋដែលធ្វើតំណើរនៅទីនោះ នាំគ្នាទទូចស្នើសុំឲឯកឧត្តម អ៊ូច ភា អភិបាលខេត្តតាកែវមានចំណាត់ការលើទីតាំងស្តុកអេតចាយនៅចំកណ្តាលក្រុងដូនកែវនេះផង ដើម្បីសោភ័ណ្ឌភាពក្នុងក្រុងដូនកែវ ក៏ដូចជាភាពល្អប្រសើសម្រាប់ខេត្តតាកែវផងដែរ ៕ ដោយ៖តាកែវ
