ភ្នំពេញ៖គណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានឲ្យដឹងថា ការអនុវត្តការងារក្នុងខែតុលា ឆ្នាំ២០២០ មានរថយន្តត្រួតពិនិត្យសរុបចំនួន ១៣៩ ៥៧៦ គ្រឿង មានរថយន្តលើសទម្ងន់កម្រិតកំណត់ចំនួន ៤០ ២១១ គ្រឿង ស្មើនឹង ២៨.៨១% ក្នុងនោះ ការពិន័យរថយន្តដឹកលើសទម្ងន់សរុបមានចំនួន ១៩៩គ្រឿង ដែលមានទឹកប្រាក់ពិន័យចំនួន ៤៨៦ ៨៤៩ ៥០០រៀល។
នៅ ថ្ងៃទី២ ខែវិច្ឆិកា ឆ្នាំ២០២០ ក្រោមអធិបតីភាពឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ បានដឹកនាំការប្រជុំបូកសរុបលទ្ធផលការងារដែលសម្រេចបានក្នុងខែតុលា ក្នុងឆ្នាំ២០២០។
កិច្ចប្រជុំនេះមានការចូលរួមពី ឯកឧត្តមអនុរដ្ឋលេខាធិការទទួលបន្ទុក ប្រធាន សមាជិក សមាជិកាលេខាធិការដ្ឋាន និងប្រធាន អនុប្រធានស្ថានីយជញ្ជីងទាំង ២៨។
តាមរបាយការណ៍នៃការអនុវត្តការងារក្នុងខែតុលា ឆ្នាំ២០២០ មានរថយន្តត្រួតពិនិត្យសរុបចំនួន ១៣៩ ៥៧៦ គ្រឿង មានរថយន្តលើសទម្ងន់កម្រិតកំណត់ចំនួន ៤០ ២១១ គ្រឿង ស្មើនឹង ២៨.៨១% ដែលក្នុងនោះ៖
– រថយន្តផ្ទុកលើសទម្ងន់ក្រោម ៥% ចំនួន ៤០ ០១២គ្រឿង ប្រហែល ២៨.៦៧%
– រថយន្តផ្ទុកលើសទម្ងន់ពី ៥% – ១០% ចំនួន ៧គ្រឿង ប្រហែល ០.០១%
– រថយន្តផ្ទុកលើសទម្ងន់ពី ១០% – ២០% ចំនួន ១០៥គ្រឿង ប្រហែល ០.០៨%
– រថយន្តផ្ទុកលើសទម្ងន់លើសពី ២០% ចំនួន ៨៧គ្រឿង ប្រហែល ០.០៦%
ការពិន័យរថយន្តដឹកលើសទម្ងន់សរុបមានចំនួន ១៩៩គ្រឿង ដែលមានទឹកប្រាក់ពិន័យចំនួន ៤៨៦ ៨៤៩ ៥០០រៀល។ តាមរបាយការណ៍ ចំនួនរថយន្តដែលចាប់បានមានការថយចុះចំនួន ៣៦គ្រឿង បើប្រៀបធៀបទៅនឹងតួលេខខែកញ្ញា ឆ្នាំ២០២០ ដែលមានចំនួន ២៣៥គ្រឿង។
ឯកឧត្តមប្រធានអង្គប្រជុំបានអនុញ្ញាតឱ្យធ្វើការផ្សព្វផ្សាយលើសេចក្តីជូនដំណឹងលេខ ០៤៩ សជណ សក.គតលទ ចុះថ្ងៃទី២៨ ខែតុលា ឆ្នាំ២០២០ ស្តីអំពីការពង្រឹងវិធានការយ៉ាងតឹងរឹងបន្ថែមចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ ដែលនឹងត្រូវអនុវត្តចាប់ពីថ្ងៃទី១៦ ខែវិច្ឆិកា ឆ្នាំ២០២០ តទៅ។
ជាទីបញ្ចប់ ឯកឧត្តមរដ្ឋលេខាធិការ បានណែនាំដល់មន្ត្រីតាមស្ថានីយ ឱ្យពង្រឹងការអនុវត្តការងារឱ្យបានកាន់តែប្រសើរ និងមានប្រសិទ្ធភាព ប្រកាន់ភ្ជាប់នូវក្រមសីលធម៌ការងារ និងសហការល្អជាមួយដៃគូពាក់ព័ន្ធ។
សូមបងប្អូនម្ចាស់អាជីវកម្ម ម្ចាស់យានយន្តដឹកជញ្ជូនធន់ធ្ងន់ត្រូវអនុវត្ត និងពង្រឹងការអនុវត្តដឹកជញ្ជូនឱ្យបានត្រឹមត្រូវ តាមបទប្បញ្ញត្តិដូចចែងក្នុងមាត្រា៦០ នៃច្បាប់ផ្លូវថ្នល់ និងក្នុងករណីយានយន្តដឹកលើសកម្រិតកំណត់ ២០% ត្រូវធ្វើការដកបណ្ណបើកបរ និងព្យួរទុកចំនួន ២ឆ្នាំ ឃាត់យានយន្តទុកចំនួន ១ឆ្នាំ និងបញ្ឈប់អាជីវកម្មមួយឆ្នាំប្រសិនបើនៅតែបន្តបទល្មើស៕ ដោយ៖បញ្ញាស័ក្តិ
