ស្ទឹងត្រែង៖ ចៅក្រមស៊ើបសួរនៃសាលាដំបូងខេត្តស្ទឹងត្រែងបានសម្រេចឃុំខ្លួនអតីតមេបញ្ជាការរងយោធាស្រុកបុរីអូរស្វាយសែនជ័យ ពីបទជួញដូរគ្រឿងញៀនដាក់ក្នុងពន្ធនាគារ ជាបណ្ដោះអាសន្ន កាលពីថ្ងៃទី ២ ខែវិច្ឆិកា ឆ្នាំ ២០២០។
សូមបញ្ជាក់ថា កម្លាំងនគរបាលប្រឆាំងគ្រឿងញៀន នៃស្នងការដ្ឋានខេត្តស្ទឹងត្រែង បានឃាត់ខ្លួនយោធាម្នាក់ ជាមួយថ្នាំញៀន ២ គីឡូក្រាម រថយន្ត lexus RX 300 មួយគ្រឿង និងកាំភ្លើងមួយដើម នៅចំណុចអាហារដ្ឋានម្លប់ត្នោត ស្ថិតក្នុងភូមិស្ពានថ្ម សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង វេលាម៉ោង៩ យប់ថ្ងៃទី៣០ ខែតុលា ឆ្នាំ ២០២០។
ករណីខាងលើនេះពាក់ព័ន្ធទៅនឹងសំណុំរឿងប្រទះឃើញគ្រឿងញៀន ៤២ ដុំដែលយោធាម្នាក់ ល្បាតនៅតំបន់ព្រំដែនកម្ពុជាឡាវ ក្បែរបន្ទាយរបស់ខ្លួន ស្ថិតនៅក្នុងភូមិសាស្ត្រ ឃុំអូរស្វាយ ស្រុកបុរីអូរស្វាយសែនជ័យ។
ពេលនោះយោធាដើរល្បាតបានប្រទះឃើញ ជនសង្ស័យម្នាក់ ជិះម៉ូតូមួយគ្រឿងដឹកគ្រឿងញៀនចំនួន២ការ៉ុង ស្មើនឹង៤២កញ្ចប់ កាលពីរំលងអធ្រាត្រឈានចូលថ្ងៃទី២៣ ខែតុលា ឆ្នាំ២០២០។ ជនសង្ស័យបានជិះម៉ូតូដួលហើយទុកចោលរួចគេចខ្លួន។ អ្នកឃើញម៉ូតូនិងការ៉ុងច្រកថ្នាំញៀនដ៏ច្រើនសន្ធឹកសន្ធាប់ គឺជាមេបញ្ជាការរងតំបន់ប្រតិបត្តិការសឹករងស្រុកបុរីអូរស្វាយសែនជ័យ។ បន្ទាប់មកគាត់រាយការណ៍ជូនថ្នាក់លើអំពីគ្រឿងញៀន ដែលរើសបានចំនួន ៤២ដុំ និងម៉ូតូមួយគ្រឿង។
ក្រោយមកទៀតគ្រឿងញៀនទាំងអស់នោះ ក៏បានប្រគល់ឱ្យទៅកងរាជអាវុធហត្ថខេត្ត និងមានការចូលរួមពីតំណាងអយ្យការអមសាលាដំបូងខេត្តទៀតផង។ ក៏ប៉ុន្តែគ្រឿងញៀនចំនួន ៤២ កញ្ចប់មានទម្ងន់ប្រមាណជាង ៤១គីឡូក្រាម ត្រូវបានកសាងសំណុំរឿងបញ្ជូនទៅតុលាការ តាមនីតិវិធីច្បាប់ បែរជាសមត្ថកិច្ចបើកការស្រាវជ្រាវបន្ត រហូតឈានដល់ការបង្ក្រាប និងឃាត់ខ្លួនជនសង្ស័យម្នាក់ រួមជាមួយវត្ថុតាងថ្នាំញៀន ចំនួន២កញ្ចប់ធំ ប្រភេទកេតតាមីនបន្ថែមទៀត។
សមត្ថកិច្ចបានបញ្ជាក់ថា ជនសង្ស័យខាងលើនេះ គឺជាមេបញ្ជាការរងយោធាស្រុកបុរីអូរស្វាយសែនជ័យ ដែលបានដឹងហេតុការណ៍គ្រឿងញៀនមុនគេ ហើយបានដកហូតគ្រឿងញៀនចំនួន ២ ដុំស្មើ ២ គីឡូក្រាមក្នុងចំណោមគ្រឿងញៀន ៤២ ដុំដែលប្រទះឃើញ។
លោកចែម ផានិត នាយការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត បានឲ្យដឹងថា ដោយមានការចង្អុលបង្ហាញប្រតិបត្តិការ បង្ក្រាបឃាត់ខ្លួនមេខ្លោងជួញដូរថ្នាំញៀនម្នាក់ និងថ្នាំចំនួន ២កញ្ចប់ធំ ប្រភេទកេតមីន។ ជនសង្ស័យគឺជាមេបញ្ជាការរងយោធាស្រុកបុរីអូរស្វាយសែនជ័យ ឈ្មោះអ៊ុក ដំកើង ភេទប្រុសអាយុ៤៤ឆ្នាំ បានរក្សាទុកគ្រឿងញៀនចំនួន ២ ដុំមានទម្ងន់២គីឡូក្រាម ដែលបានដកចេញចេញក្នុងចំណោមគ្រឿងញៀន ៤២ ដុំមានទម្ងន់ប្រមាណជាង ៤១ គីឡូក្រាម៕ ដោយ៖សុខុម
