ខេត្តស្វាយរៀង ៖ សមត្ថកិច្ចចាប់ខ្លួនជនសង្ស័យម្នាក់ករណីលួចមានស្ថានទម្ងន់ទោស (ឆក់ទូរស័ព្ទ) និងប្រើប្រាស់ដោយខុសច្បាប់នូវសារធាតុញៀន កាលពីថ្ងៃទី១១ ខែវិច្ឆិកា ឆ្នាំ២០២០ វេលាម៉ោង ១៨និង៤០នាទី ល្ងាចនៅចំណុចភូមិព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង
សមត្ថកិច្ចបានឲ្យដឹងថា ករណីខាងលើនេះបង្កដោយជនសង្ស័យឈ្មោះ ហួន បញ្ញា (អ្នកឆក់) ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅភូមិថ្មី ឃុំចំបក់ ស្រុកស្វាយជ្រំ ខេត្តស្វាយរៀង និងឈ្មោះ ស្វិត (អ្នកឌុប) មិនស្គាល់អត្តសញ្ញាណ បានធ្វើសកម្មភាពជិះម៉ូតូឌុបគ្នាតាមពីក្រោយឈ្មោះ សែម សក្ខិណា ភេស្រី អាយុ១៦ឆ្នាំ មុខរបរសិស្ស មានទីលំភូមិអណ្តូងតាសី សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង រហូតមកដល់ភូមិ-សង្កាត់កើតហេតុខាងលើ ជនសង្ស័យទាំងពីរបានឆក់យកទូរស័ព្ទពីជនរងគ្រោះតែមិនបានសម្រេច ក៏បានធាក់ម៉ូតូជនរងគ្រោះផ្តួល ហើយជិះរត់គេចខ្លួនមកទិសខាងត្បួង។
ប្រភពដដែលបានឲ្យដឹងទៀតថា ខណៈនោះក៏មានប្រជាពលរដ្ឋនៅក្បែរនោះជិះម៉ូតូដេញតាមពីក្រោយ ហើយក៏បានជូបសមត្ថកិច្ចយើងកំពុងល្បាតចល័ត ក៏ជួយដេញតាមរហូតមកដល់ខាងជើងផ្សារវាលយន្ត ជនសង្ស័យទាំងពីរបានជិះម៉ូតូទៅបុកម៉ូតូប្រជាពលរដ្ឋដួល ហើយក៏ត្រូវបានសមត្ថកិច្ចយើងឃាត់ខ្លួនបានឈ្មោះ ហួន បញ្ញា ចំណែកឯឈ្មោះ ស្វិត បានលើកម៉ូតូជិះរត់គេចខ្លួនបាត់។ បន្ទាប់មកសមត្ថកិច្ចយើងក៏បាននាំខ្លួនឈ្មោះហួន បញ្ញា មកអធិការដ្ឋាននគរបាលក្រុងស្វាយរៀង ដើម្បីធ្វើការសាកសួរ។
ប្រភពខាងលើបានឲ្យដឹងបន្ថែមទៀតថា នៅចំពោះសមត្ថកិច្ចឈ្មោះ ហួន បញ្ញាបានឆ្លើយសារភាពថា ខ្លួននិងឈ្មោះ ស្វិត ពិតជាធ្វើសកម្មភាពឆក់ទូរស័ព្ទគេ តែមិនបានសម្រេច ក៏ធាក់ម៉ូតូគេផ្តួល រួចជិះម៉ូតូរត់គេចខ្លួន និងបានដួលចំនួនពីរដង បណ្តាលអោយរងរបួសដៃនិងជើង ប្រាកដមែន។ បច្ចុប្បន្នជនសង្ស័យឈ្មោះ ហួន បញ្ញា កំពុងឃាត់ខ្លួននៅអធិការដ្ឋាននគរបាលក្រុងស្វាយរៀង ដើម្បីកសាងសំណុំរឿងបញ្ជូនទៅការិយាល័យជំនាញចាត់ការតាម។ ចំណែកឈ្មោះ ស្វិត ដែលរត់គេចខ្លួន សមត្ថកិច្ចយើងកំពុងស្រាវជ្រាវរកចាប់ខ្លួន ដើម្បីកសាងសំណុំរឿងចាត់ការតាមច្បាប់៕ដោយ៖វ៉ៃកូ
