ភ្នំពេញ៖ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីប្រកាសព័ត៌មានកិច្ចប្រជុំកិច្ចប្រជុំកំពូលអាស៊ាន-ចិន លើកទី ២៣ស្តីពី “ការត្រួតពិនិត្យឡើងវិញនៃកិច្ចសហប្រតិបត្តិការ និង ទិសដៅអនាគតអាស៊ាន-ចិន”នារសៀលថ្ងៃទី ១២ ខែ វិច្ឆិកា ឆ្នាំ ២០២០ ។
រសៀលថ្ងៃទី ១២ ខែ វិច្ឆិកា ឆ្នាំ ២០២០ នេះដែរ , ក្នុងនាមជាតំណាង ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់ពីកិច្ចប្រជុំកំពូលអាស៊ានពេញអង្គ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានដឹកនាំ គណៈប្រតិភូជាន់ខ្ពស់ ចូលរួមកិច្ចប្រជុំកិច្ចកំពូល អាស៊ាន -ចិន លើកទី ២៣” តាមប្រព័ន្ធវីដេអូ នៅទីស្តីការក្រសួង សេដ្ឋកិច្ច និងហិរញ្ញវត្ថុ ។ កិច្ចប្រជុំនេះដឹកនាំដោយឯកឧត្តម ង្វៀន សួនហ្វ៊ុក (Nguyen Xuan Phuc) នាយករដ្ឋមន្ត្រីនៃសាធារណៈរដ្ឋសង្គមនិយមវៀតណាម ។
ក្រោមប្រធានបទ “ការត្រួតពិនិត្យឡើងវិញនៃកិច្ចសហប្រតិបត្តិការ និងទិសដៅអនាគតអាស៊ាន កិច្ចប្រជុំកំពូលអាស៊ាន -ចិន -ចិន លើកទី ២៣ នេះ បានផ្តោតកិច្ចពិភាក្សាជាចម្បង លើបញ្ហាប្រឈម ដែលរួមមានបញ្ហាសុខភាពសាធារណៈ និង ស្ថានភាពសង្គម សេដ្ឋកិច្ច ដែលបណ្តាលមកពីវិបត្តិនៃជំងឺកូវីដ-១៩ នៅក្នុងតំបន់ទាំងពីរជាដើម ។ អង្គប្រជុំ បានសង្កត់ធ្ងន់ អំពីភាពចាំបាច់នៃការបង្កើនកិច្ចសហការរវាងអាស៊ាន និងចិន ក្នុងការពង្រឹង សាមគ្គីភាព និងកិច្ចសហប្រតិបត្តិការរួមគ្នា ក្នុងការឆ្លើយតបទៅនឹង ជំងឺរាតត្បាត និងក្នុងការស្តារស្ថេរភាព និងងើបឡើងវិញនូវស្ថានភាព សង្គម -សេដ្ឋកិច្ច បន្ទាប់ពីវិបត្តិនេះ ត្រូវបានបញ្ចប់ តាមរយៈយន្តការដែលមានស្រាប់ រួមមាន “ផែនការអនុវត្ត ២០១៦-២០២០” និង “ កិច្ចព្រមព្រៀងពាណិជ្ជកម្មសេរីអាស៊ាន- ចិន (ACFTA)” ក៏ ដូចជា ស្វែងរកនូវយន្តការសហប្រតិបត្តិការថ្មីៗបន្ថែមទៀត ។
ថ្នាក់ដឹកនាំនៃប្រទេសអាស៊ាន ស្វាគមន៍ និងវាយតម្លៃខ្ពស់ចំពោះការចូលរួមចំណែករបស់ប្រទេសចិន ក្នុងការពង្រឹង និងលើកកម្ពស់ចំណងមិត្តភាពអាស៊ាន – ចិន ព្រមទាំង ក្នុងការជំរុញគំនិតផ្តួចផ្តើម “ភាពជាដៃគួអាស៊ាន ស្តីពីសេដ្ឋកិច្ចពណ៌ខៀវ និងចក្ខុវិស័យភាពជាដៃគូយុទ្ធសាស្ត្រអាស៊ាន – ចិន ឆ្នាំ ២០៣០ ។ ថ្នាក់ដឹកនាំនៃប្រទេសអាស៊ាន-ចិន បានប្តេជ្ញាបន្តគាំទ្រគោលការណ៍ពហុភាគីនិយម និងបានស្នើឱ្យមានការបង្កើនកិច្ចសហប្រតិបត្តិការនៅក្នុងតំបន់ទៅលើការកសាងជំនឿទុកចិត្ត និងរក្សាភាពធន់នៃសង្គម-សេដ្ឋកិច្ចនាពេលអនាគត ការបើកចំហររំហូរពាណិជ្ជកម្មសេរី, ការតភ្ជាប់ខ្សែច្រវាក់ផ្គត់ផ្គង់ ក្នុងតំបន់, និងការអនុវត្តសេដ្ឋកិច្ចឌីជីថល ។
ថ្នាក់ដឹកនាំនៃប្រទេសអាស៊ាន បានសំដែងការស្វាគមន៍និងគាំទ្រ ចំពោះការប្រកាសរបស់ប្រទេសចិន ដែលបានចាត់ទុក វ៉ាក់សាំងប្រឆាំងនឹងជំងឺកូវីដ-១៩ ជា “ទំនិញសាធារណៈ និងការបន្ដផ្គត់ផ្គង់ ថ្នាំ និងបរិក្ខារពេទ្យក្នុងតំបន់អាស៊ាន សម្រាប់ការសង្គ្រោះបន្ទាន់ លើកកម្ពស់សុខភាពសាធារណៈ ព្រមទាំងជំនួយដទៃទៀតសម្រាប់ការស្តារ និងងើបឡើង វិញ នៃសង្គម-សេដ្ឋកិច្ចនៅក្នុងតំបន់អាស៊ាន ក្រោយកូវីដ-១៩ ។ ជាមួយគ្នានេះ ថ្នាក់ដឹកនាំនៃប្រទេសអាស៊ាន ក៏បានសំដែងការពេញចិត្ត និងគាំទ្រចំពោះការប្តេជ្ញាចិត្តរបស់ ឯកឧត្តម លី ខឺឈាង (Li Kequiang) នាយករដ្ឋមន្ត្រីនៃសាធារណរដ្ឋប្រជាមានិតចិន ក្នុងការបង្កើនកិច្ចសហប្រតិបត្តិការ, ការជួយដល់តំបន់អាស៊ាន និងការដោះស្រាយបញ្ហាផ្សេងៗទៀត តាមយន្តការសន្តិវិធី ដោយឈរលើស្មារតីសាមគ្គីភាព និងវិបុលភាពដល់ប្រជាជនទាំងអស់នៃតំបន់ទាំងពីរ ៕ដោយ៖បញ្ញាស័ក្តិ
