ភ្នំពេញ៖សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដាក់ចេញសរាចរណែនាំស្តីពីការពង្រឹងការអនុវត្តវិធានការប្រយុទ្ធប្រឆាំងគ្រឿងញៀនខុសច្បាប់។
ក្នុងអំឡុងពេលប៉ុន្មានឆ្នាំចុងក្រោយនេះ និន្នាការនៃការផលិត ចរាចរ ដឹកជញ្ជូនគ្រឿងញៀន លើសកលលោកបន្តមានកំណើនឥតឈប់ឈរ ជាពិសេសការផលិតអាភៀនមួយភាគធំត្រូវបានប្តូរមក ផលិតគ្រឿងញៀនសំយោគ ដែលប្រភេទសារធាតុញៀនទាំងនេះងាយស្រួលក្នុងការផលិត កែច្នៃ ងាយរក សារធាតុគីមីផ្សំ និងឧបករណ៍ផលិត ព្រមទាំងមិនរើសភូមិសាស្ត្រ ឬទីតាំងផលិត។ ការប្រែប្រួលនេះ បានក្លាយជាកត្តាជំរុញធ្វើឱ្យទីផ្សារគ្រឿងញៀនសំយោគរីកកាន់តែធំទាំងក្នុង និងក្រៅតំបន់ ដែលក្នុងនោះ ព្រះរាជាណាចក្រកម្ពុជាក៏បាន និងកំពុងទទួលរងគ្រោះដោយសារឥទ្ធិពលនៃបទឧក្រិដ្ឋដែលមានលក្ខណៈ ជាសកលនេះដែរ។
តាមរយៈការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល ចំនួន ៥លើកជាបន្តបន្ទាប់ បណ្តាកងកម្លាំងអនុវត្តច្បាប់ អាជ្ញាធរមានសមត្ថកិច្ច និងស្ថាប័នពាក់ព័ន្ធ បានសហការគ្នាបង្កើតបានជាចលនាជាតិប្រយុទ្ធប្រឆាំងគ្រឿងញៀនយ៉ាងសស្រាក់សស្រាំ និងទទួល បានលទ្ធផលជាវិជ្ជមាន។ ប៉ុន្តែប្រការដែលត្រូវបានកត់សម្គាល់ឃើញនោះគឺ សកម្មភាពលបលួចនាំចូល ដឹកជញ្ជូនគ្រឿងញៀនឆ្លងកាត់ ការលួចលាក់កែច្នៃសារធាតុញៀននៅតែកើតមានឡើងជាបន្តបន្ទាប់ និងមានរូបភាពកាន់តែធំ ហើយការជួញដូរ និងការប្រើប្រាស់សារធាតុញៀនបាន និងកំពុងរីករាលដាល ដល់តំបន់ជនបទមួយចំនួន។
ឆ្លើយតបទៅនឹងសភាពការណ៍ខាងលើ និងក្នុងគោលបំណងធានាប្រសិទ្ធភាពអនុវត្តកម្មវិធី នយោបាយ និងយុទ្ធសាស្ត្រចតុកោណដំណាក់កាល ទី៤ ក៏ដូចជាការបញ្ចៀសឱ្យបាននូវហានិភ័យ ដែលបណ្តាលមកពីគ្រឿងញៀន ព្រមទាំងដោះស្រាយនូវការព្រួយបារម្ភ និងការពារសុខុមាលភាព ជូនប្រជាពលរដ្ឋ ធានាបាននូវស្ថិរភាព សន្តិសុខ សណ្តាប់ធ្នាប់ និងសុវត្ថិភាពសង្គម រាជរដ្ឋាភិបាល សូមធ្វើការណែនាំដល់អាជ្ញាធរជាតិប្រយុទ្ធប្រឆាំងគ្រឿងញៀន ក្រសួងមហាផ្ទៃ ក្រសួង -ស្ថាប័នពាក់ព័ន្ធ ជាពិសេសគណៈបញ្ជាការឯកភាពរដ្ឋបាលរាជធានី ខេត្ត ក្រុង ស្រុក ខណ្ឌ ដូចខាងក្រោម ៖
១.បន្តខិតខំចាត់តាំងអនុវត្តឱ្យបានម៉ឺងម៉ាត់តាមបទបញ្ជាលេខ ០១ប. ប ចុះថ្ងៃទី ០១ ខែកុម្ភៈ ឆ្នាំ២០១៦ របស់រាជរដ្ឋាភិបាល ស្តីពីការពង្រឹងវិធានការប្រយុទ្ធប្រឆាំងគ្រឿងញៀន។
២.បង្កើនសកម្មភាពអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៥ ឱ្យបានសកម្មភាពផុលផុស និងត្រូវបន្តកសាងផែនការយុទ្ធនាការជាបន្តបន្ទាប់ប្រកបដោយនិរន្តរភាព។
៣.លើកកម្ពស់ស្មារតីផ្សព្វផ្សាយ អប់រំឱ្យបានទូលំទូលាយ ស៊ីជម្រៅ ចំគោលដៅ និងមុខសញ្ញាគ្រប់ទីកន្លែង ទាំងក្នុងសហគមន៍ ទាំងក្នុងស្ថាប័នរដ្ឋ ឯកជន និងក្នុងជួរកងកម្លាំងប្រដាប់អាវុធ គ្រប់ប្រភេទ ដោយត្រូវអនុវត្តផ្សារភ្ជាប់ជាមួយខ្លឹមសារទិសស្លោក “បីកុំ ឬរាយការណ៍” គឺ : កុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍ជូនអាជ្ញាធរមានសមត្ថកិច្ចគ្រប់ ករណីបទល្មើសគ្រឿងញៀន។
៤. យកចិត្តទុកដាក់ធាត់វិធានការក្នុងការបង្ការ ទប់ស្កាត់ការនាំចូល ការដឹកជញ្ជូនឆ្លងកាត់ការលួចលាក់កែច្នៃ-ផលិតសារធាតុញៀន និងការជួញដូរ-ប្រើប្រាស់សារធាតុញៀន ជាពិសេសនៅតាមគោលដៅនានា ដោយត្រូវ ៖ – បន្តពង្រឹងការគ្រប់គ្រង ត្រួតពិនិត្យការឆ្លងកាត់ព្រំដែន និងការដឹកជញ្ជូនទំនិញគ្រប់ ប្រភេទ រួមទាំងបរថ្មីប្រៃសណីយ៍ ឱ្យបានហ្មត់ចត់ និងម៉ឺងម៉ាត់ ដើម្បីបង្ការ ទប់ស្កាត់ និងបង្ក្រាបការនាំចូលគ្រឿងញៀនខុសច្បាប់ – ជំរុញការស្រាវជ្រាវ ស៊ើបអង្កេតរកខ្សែរយៈបណ្តាញមេក្លោងជួញដូវសារធាតុញៀន និងធ្វើការបង្ក្រាបឱ្យដល់ឬសគល់ ព្រមទាំងបន្តពន្លាតនីតិវិធីឈានដល់ការបង្ក្រាបបទល្មើស សម្អាតប្រាក់ ដែលជាផលនៃបទល្មើសគ្រឿងញៀន ដោយត្រូវពង្រឹងកិច្ចសហប្រតិបត្តិការ ក្នុងក្របខ័ណ្ឌតំបន់ និងអន្តរជាតិ- អនុវត្តព្រមៗគ្នារវាងវិធានការរដ្ឋបាល និងវិធានការច្បាប់ ធ្វើការបង្ក្រាបដូចភ្លៀងរលឹម សំដៅលុបបំបាត់ការលួចលាក់កែច្នៃ ការជួញដូរ ប្រើប្រាស់សារធាតុញៀន ជាពិសេស នៅតាមគោលដៅដែលងាយកើតមានបទល្មើសគ្រឿងញៀន។
៥. ត្រូវពង្រឹងវិធានការគ្រប់គ្រង ត្រួតពិនិត្យការនាំចូល និងការប្រើប្រាស់សារធាតុគីមីផ្សំ ដោយ អនុវត្តឱ្យបានម៉ឺងម៉ាត់បំផុតទៅតាមវិធានបច្ចេកទេស និងត្រូវដកពិសោធន៍ ធ្វើបច្ចុប្បន្នភាព ជាប្រចាំ សំដៅបង្ការមិនឱ្យសារធាតុគីមីផ្សំធ្លាក់ក្នុងដៃឧក្រិដ្ឋជនយកទៅកែច្នៃធ្វើជាសារធាតុញៀនជាដាច់ខាត។
៦. លើកកម្ពស់គុណភាពក្នុងការអនុវត្តវិធានការព្យាបាល ស្តារនីតិសម្បទា និងសមាហរណកម្ម ដោយខិតខំឱ្យអស់ពីលទ្ធភាពលើកកម្ពស់សមត្ថភាពព្យាបាល ស្តារនីតិសម្បទា និងរៀបចំបន្ថែមនូវមណ្ឌលបណ្តោះអាសន្ននៅតាមរាជធានី ខេត្ត ស្របតាមភូមិសាស្ត្រ និងសំណូមពរ ជាក់ស្តែង។
៧.លើកកម្ពស់គុណភាព សមត្ថភាពមន្ត្រីអនុវត្តច្បាប់ តាមរយៈការបណ្តុះបណ្តាលជំនាញ ប្រតិបត្តិការ និងចំណេះដឹងផ្នែកច្បាប់។ ទន្ទឹមនេះ ត្រូវពង្រឹងការអនុវត្តវិន័យ សីលធម៌ មនសិការវិជ្ជាជីវៈដល់កងកម្លាំងអនុវត្តច្បាប់ប្រយុទ្ធប្រឆាំងគ្រឿងញៀនឱ្យបានល្អប្រសើរ ព្រមទាំងបន្តការគាំទ្រ សរសើជូនរង្វាន់លើកទឹកចិត្តដល់អង្គភាព និងមន្ត្រីដែលមានស្នាដៃ។
អាជ្ញាធរជាតិប្រយុទ្ធប្រឆាំងគ្រឿងញៀន ក្រសួងមហាផ្ទៃ ក្រសួង-ស្ថាប័នពាក់ព័ន្ធ គណៈបញ្ជាការ ឯកភាពរដ្ឋបាលរាជធានី ខេត្ត ក្រុង ស្រុក ខណ្ឌ ត្រូវលើកកម្ពស់ស្មារតីទទួលខុសត្រូវក្នុងការដឹកនាំ ចាត់តាំងអនុវត្តសារាចរណែនាំនេះ ឱ្យមានប្រសិទ្ធភាពខ្ពស់៕ដោយ៖បញ្ញាស័ក្តិ
