ភ្នំពេញ ៖ ក្រសួងកសិកម្ម បានសម្តែងការសោកស្តាយយ៉ាងខ្លាំង និងប្រកាសបដិសេធទាំងស្រុងចំពោះការចោទប្រកាន់គ្មានហេតុផលរបស់ឈ្មោះ ខៀវ ដារ៉ា និងការផ្សព្វផ្សាយព័ត៌មានមិនពិត របស់វិទ្យុអាស៊ីសេរី ដែលមានលក្ខណៈញុះញង់ ដោយគ្មានការវិភាគប្រកបដោយវិជ្ជាជីវៈទាល់តែសោះ ដែលបង្កឧបសគ្គដល់ការរីកចម្រើន នៃវិស័យកសិកម្មកម្ពុជា។
ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៨ ខែវិច្ឆិកា ឆ្នាំ២០២០នេះ បានចេញសេចក្តីប្រកាសព័ត៌មាន ដោយច្រានចោលទាំងស្រុងនូវព័ត៌មានមិនពិត ដែលផ្សាយដោយ វិទ្យុអាស៊ីសេរី ពាក់ព័ន្ធនឹងការចោទប្រកាន់ថា ការផលិតស្រូវ និងការនាំចេញអង្ករពីប្រទេសកម្ពុជា ទៅកាន់ប្រទេសអូស្ត្រាលី មានការសង្ស័យជាប់ពាក់ព័ន្ធនឹងការរំលោភសិទ្ធិមនុស្ស។
ក្រសួងកសិកម្ម បានបញ្ជាក់ជូនថា រដ្ឋាភិបាលអូស្ត្រាលី និងរាជរដ្ឋាភិបាលកម្ពុជា បាននិងកំពុងអនុវត្ត កិច្ចសហប្រតិបត្តិការទ្វេភាគី យ៉ាងល្អប្រសើរ ដែលមានលក្ខណៈជាប្រវត្តិសាស្ត្រ ដើម្បីលើកស្ទួយការអភិវឌ្ឍវិស័យ កសិកម្មកម្ពុជាចាប់តាំងពីឆ្នាំ១៩៨៧ រៀងរហូតមកទល់ពេលនេះ ដោយបានផ្តល់ជំនួយហិរញ្ញប្បទាន ឥតសំណង យ៉ាងច្រើនដល់កម្ពុជា ក្នុងការអភិវឌ្ឍសមត្ថភាពបច្ចេកទេសវិជ្ជាជីវៈលើកកម្ពស់ការស្រាវជ្រាវ និងផ្សព្វផ្សាយកសិកម្មផងដែរ។
បើតាមសេចក្តីប្រកាសព័ត៌មានរបស់ក្រសួងកសិកម្ម ប្រមាញ់ និងនេសាទស្តីពីការផលិតស្រូវ និងការនាំចេញអង្កររបស់កម្ពុជាទៅកាន់ប្រទេសអូស្ត្រាលី។ យោងតាមការចេញផ្សាយរបស់វិទ្យុអាស៊ីសេរី (RFA Khmer) កាលពីថ្ងៃទី១៣ ខែវិច្ឆិកា ឆ្នាំ២០២០ ពាក់ព័ន្ធ នឹងការចោទប្រកាន់ថា ការផលិតស្រូវ និងការនាំចេញអង្ករពីប្រទេសកម្ពុជាទៅកាន់ប្រទេសអូស្ត្រាលី មានការសង្ស័យ ជាប់ពាក់ព័ន្ធនឹងការរំលោភសិទ្ធិមនុស្សនៅក្នុងប្រទេសកម្ពុជា។ ការផ្សាយនេះ ជាព័ត៌មានមិនពិត។ ក្នុងន័យនេះ ក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា សូមជម្រាបជូនសាធារណជនឱ្យបានជ្រាបថា រដ្ឋាភិបាលនៃប្រទេសអូស្ត្រាលី និងរាជរដ្ឋាភិបាលនៃព្រះរាជាណាចក្រកម្ពុជា បាននិងកំពុងអនុវត្ត កិច្ចសហប្រតិបត្តិការទ្វេភាគីយ៉ាងល្អប្រសើរ ដែលមានលក្ខណៈជាប្រវត្តិសាស្ត្រ ដើម្បីលើកស្ទួយការអភិវឌ្ឍវិស័យ កសិកម្មកម្ពុជាចាប់តាំងពីឆ្នាំ១៩៨៧ រៀងរហូតមកទល់ពេលនេះ ដោយបានផ្តល់ជំនួយហិរញ្ញប្បទានឥតសំណង យ៉ាងច្រើនដល់កម្ពុជាក្នុងការអភិវឌ្ឍសមត្ថភាពបច្ចេកទេសវិជ្ជាជីវៈ លើកកម្ពស់ការស្រាវជ្រាវ និងផ្សព្វផ្សាយរកសិកម្ម រួមមាន ការកសាងហេដ្ឋារចនាសម្ព័ន្ធពិសោធន៍ស្រាវជ្រាវកសិកម្ម ការកសាងធនធានមនុស្សក្នុងជំនាញកសិកម្មជូន ប្រជាជនកម្ពុជាតាមរយៈកម្មវិធីជំនួយអភិវឌ្ឍន៍អន្តរជាតិមានជាអាទិ៍ AusAID, ACIAR គម្រោងកម្ពុជា-អ៊ីរី-អូស្ត្រាលី (CIAP) ដែលគម្រោងនេះបានជួយប្រទេសកម្ពុជាបង្កើតពូជស្រូវដែលមានទិន្នផលខ្ពស់និងគុណភាពល្អសម្រាប់បង្កើន ផលិតកម្មក្នុងស្រុក និងការ នាំចេញរហូតជួយប្រទេសកម្ពុជាឱ្យមានកេរ្តិ៍ឈ្មោះល្បីលើឆាកអន្តរជាតិ ដោយទទួលបាន ចំណាត់ថ្នាក់លេខ១ ជាអង្ករល្អជាងគេលើពិភពលោក នៅឆ្នាំ២០១២, ២០១០, ២០១៤ និងឆ្នាំ២០១៨ទៀតផង។ ជាមួយគ្នានេះដែរ តាមរយៈ ACIAR រដ្ឋាភិបាលអូស្ត្រាលីបានជួយលើកកម្ពស់លើពិសោធន៍ ស្រាវជ្រាវ និងអភិវឌ្ឍន៍ បច្ចេកវិទ្យាលើប្រធានបទកសិ-ធុរកិច្ច ផលិតកម្មដំណាំ ជលផល ការចិញ្ចឹមសត្វ ការគ្រប់គ្រងធនធានជីកសិកម្ម សេដ្ឋកិច្ចសង្គមនិងកសិកម្ម ព្រៃឈើ និងប្រព័ន្ធសុខភាពនិងសេដ្ឋកិច្ច។ លើសពីនេះទៀត កម្មវិធីខ្សែច្រវាក់តម្លៃកសិកម្ម កម្ពុជា-អូស្ត្រាលី (CAVAC) បានចូលរួមចំណែកយ៉ាងច្រើនក្នុងការអភិវឌ្ឍវិស័យកសិកម្មដូចជា ការជំរុញកសិ-ធុរកិច្ច ការកសាងប្រព័ន្ធធារាសាស្ត្រ ការបង្កើនផលិតភាពនិងគុណភាពផលិតកម្មដំណាំដែលមានតម្លៃខ្ពស់សម្រាប់ការប្រកួត ប្រជែងទីផ្សារក្នុងស្រុកនិងអន្តរជាតិ និងបង្កើនប្រាក់ចំណូលរបស់កសិករខ្នាតតូចនិងពាណិជ្ជករផ្នែកស្រូវអង្ករ និង ដំណាំផ្សេងៗ។ មិនតែប៉ុណ្ណោះ តាមរយៈកម្មវិធីមួយរបស់រដ្ឋាភិបាលនៃប្រទេសអូស្ត្រាលី គឺបានគាំទ្រដល់ការធ្វើ កសិកម្មតាមកិច្ចសន្យារវាងសហគមន៍កសិកម្មជាមួយក្រុមហ៊ុន Amru Rice ជំរុញការអនុវត្តបច្ចេកទេសដាំដុះស្រូវ តាមបែបទំនើប និងជំរុញការប្រើប្រាស់គ្រាប់ពូជស្រូវដែលមានគុណភាពល្អ។ យន្តការនេះបានជួយបង្កើនទំនុកចិត្ត រវាងវិស័យឯកជននិងកសិករដោយមានរាជរដ្ឋាភិបាលជាអ្នកគាំទ្រដើម្បីធានាបាននូវសន្តិសុខដីធ្លី គ្មានការរឹបអូសនិង ការកេងប្រវ័ញ្ចផលប្រយោជន៍កសិករ ពោល រួម គឺរក្សាឱ្យមានកិច្ចសហប្រតិបត្តិការល្អរវាងអ្នកផលិតនិងអ្នកទិញ។ កិច្ចសហប្រតិបត្តិការកម្ពុជា-អូស្ត្រាលី ពិតជាបានរួមចំណែកឆ្លើយតបទៅនឹងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦នៃរដ្ឋសភាក្នុងការបង្កើនផលិតភាពពិពិធភាវូបនីយកម្ម និងពាណិជួបនីយកម្មកសិកម្ម ប្រកបដោយប្រសិទ្ធផល តាមអភិក្រម រដ្ឋ-ឯកជន-ដៃគូអភិវឌ្ឍន៍ និងសហគមន៍”។
វិស័យកសិកម្មកម្ពុជាបាននិងកំពុងរីកចម្រើនឥតឈប់ឈរ និងកំពុងដើរតួនាទីដ៏សំខាន់ ទោះបីជាស្ថិតក្នុង ស្ថានភាពនៃការប្រឈមជាច្រើនរួមមានទាំងការប្រែប្រួលអាកាសធាតុ សម្ពាធសេដ្ឋកិច្ចនយោបាយ និងការរាតត្បាត នៃជំងឺកូវីដ-១៩ក៏ដោយ។ បច្ចុប្បន្ននេះ ប្រជាកសិករយើងកំពុងកែប្រែមុខមាត់ពីការអនុវត្តកសិកម្មតាមបែបយថាផល ទៅជាលក្ខណៈប្រពលវប្បកម្ម និងកែប្រែជីវភាពរស់នៅរបស់ខ្លួនទៅជាកសិពាណិជ្ជករវិញ ហើយកម្ពុជាកំពុងតែវិវឌ្ឍ ពីប្រទេសដែលពឹងផ្អែកលើវិស័យកសិកម្ម ទៅជាកសិ-ឧស្សាហកម្មវិញ ក្នុងបរិបទនៃបដិវត្តន៍ឧស្សាហកម្មទី៤។ រីឯ ការនាំចេញផលិតផលកសិកម្មសរុបបានកើនឡើងពី ៤,១៦លានតោន នៅឆ្នាំ២០១៥ ដល់ ៤,៨៨លានតោន នៅ ឆ្នាំ២០១៩ ស្មើនឹង ១៧,៣%។ បរិមាណអង្ករនាំចេញផ្លូវការបានកើនពី ៥៣៨ ០០០តោន ដល់ជាង ៦២០ ០០០តោន ក្នុងឆ្នាំ២០១៩ គិតជាមធ្យមក្នុងរយៈពេល៥ឆ្នាំកន្លងមកនេះ គឺមានកំណើនប្រមាណ ១៥,២៤%។ ក្នុងរយៈពេល១០ខែ ឆ្នាំ២០២០ បរិមាណអង្ករ នាំចេញទៅប្រទេសអូស្ត្រាលីមានចំនួន ២៥ ៩៩៤តោន មានការកើនឡើងចំនួន ៨ ៩៧១តោន (+៥២,៧០%) ធៀបនឹងរយៈពេល១០ខែឆ្នាំ២០១៩។ ប្រជាកសិករផលិតស្រូវកម្ពុជារាប់លាននាក់មានសេចក្តីសោមនស្សរីករាយចំពោះការទទួលបានទីផ្សារនាំចេញអង្ករទៅកាន់ប្រទេសអូស្ត្រាលី ដែលជួយបង្កើនប្រាក់ចំណូល ពីផលិតកម្មស្រូវដើម្បីលើកកម្ពស់ជីវភាពរស់នៅឱ្យកាន់តែល្អប្រសើរ។
បច្ចុប្បន្ននេះ ស្ថានភាពនៃការរីកចម្រើនរបស់វិស័យកសិកម្មកម្ពុជាទាំងផ្នែកផលិតកម្ម និងការនាំចេញ ពិតជាបានឆ្លុះបញ្ចាំងយ៉ាងច្បាស់អំពីកិច្ចខិតខំប្រឹងប្រែងរបស់រាជរដ្ឋាភិបាលនៃព្រះរាជាណាចក្រកម្ពុជា ទាំងក្នុងក្របខ័ណ្ឌជាតិ និងអន្តរជាតិ ដោយបានយកចិត្តទុកដាក់ខ្ពស់លើការវិនិយោគលើវិស័យកសិកម្ម ការបញ្ចប់បញ្ហាទំនាស់ដីធ្លីកសិកម្ម ការបង្កើតសហគមន៍កសិកម្ម និងបកសិករផលិត ការផ្សារភ្ជាប់ផលិតផលនិងទីផ្សារ ការលើកកម្ពស់ភាពប្រកួត ប្រជែងលើគុណភាព និងសុវត្ថិភាពផលិតផល និងការបើករបាំងបច្ចេកទេសរនាម័យនិងភូតគាមអនាម័យ សម្រាប់ជំរុញ ការនាំចេញកសិផលកម្ពុជាទៅកាន់ទីផ្សារអន្តរជាតិប្រកបដោយនិរន្តរភាព។ ភាពជឿនលឿននៃវិស័យកសិកម្មកម្ពុជា ដូចជម្រាបជូនខាងលើនេះ គឺសម្រេចបានដោយសារតែប្រទេសជាតិមានសុខសន្តិភាព ស្ថិរភាពនយោបាយ សេដ្ឋកិច្ច បើកចំហរដោយមិនប្រកាន់និន្នាការ និងជាពិសេសកសិករមានសិទ្ធិពេញលេញក្នុងភាពជាម្ចាស់ដីដើម្បីបង្កបង្កើនផល ដោយស្របច្បាប់។ ប្រជាកសិករកម្ពុជារាប់លាននាក់នឹងមិនអនុញ្ញាតឱ្យជនអគតិណាបង្កហេតុធ្វើឱ្យប៉ះពាល់ផលប្រយោជន៍ សេដ្ឋកិច្ចជាតិ ជាពិសេសការប៉ុនប៉ងធ្វើឱ្យបាត់បង់ប្រាក់ចំណូលគ្រួសារ និងជីវភាពរស់នៅរបស់ប្រជាកសិករឡើយ។ ដូច្នេះ តើការផលិតស្រូវ និងការនាំចេញអង្ករនៅកម្ពុជាមានការគាបសង្កត់សិទ្ធិមនុស្សដូចបុគ្គល ខៀវ ដារ៉ា បានចោទប្រកាន់ នោះមែនឬទេ?
ករណីនេះ ក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា សូមសម្តែងនូវការសោកស្តាយ យ៉ាងខ្លាំង និងប្រកាសបដិសេធទាំងស្រុងចំពោះការចោទប្រកាន់គ្មានហេតុផលរបស់ឈ្មោះ ខៀវ ដារ៉ា និងការផ្សព្វផ្សាយ ព័ត៌មានមិនពិតរបស់វិទ្យុអាស៊ីសេរី ដែលមានលក្ខណៈញុះញង់ ដោយគ្មានការវិភាគប្រកបដោយវិជ្ជាជីវៈទាល់តែសោះ ដែលបង្កជាឧបសគ្គដល់ការរីកចម្រើននៃវិស័យកសិកម្មកម្ពុជា ដែលការណ៍នេះបានឆ្លុះបញ្ចាំងឱ្យឃើញយ៉ាងច្បាស់ពី ចេតនាប្រឆាំងនឹងផលប្រយោជន៍ជាតិកម្ពុជា ដោយខ្វះការយល់ដឹងអំពីការពិតនៅកម្ពុជាទាក់ទិននឹងលក្ខខណ្ឌប្រជាសាស្ត្រ សង្គម វប្បធម៌ និងជីវភាពរស់នៅរបស់ប្រជាកសិករផលិតស្រូវ ជាពិសេសលើជីវភាពរស់នៅរបស់ប្រជាកសិករ នឹង ចំណងកិច្ចសហប្រតិបត្តិការដ៏រឹងមាំជាប្រវត្តិសាស្ត្ររបស់ប្រជាជននៃប្រទេសអូស្ត្រាលី និងព្រះរាជាណាចក្រកម្ពុជាដ៏ផូរផង់៕ ដោយ៖បញ្ញាស័ក្តិ