ខេត្តស្វាយរៀង ៖ មានការភ្ញាក់ផ្អើលពីសំណាក់ក្មេងៗ និងអ្នកធ្វើដំណើរតាមផ្លូវក្បែរប្រឡាយ បន្ទាប់ពីពួកគេប្រទះឃើញបុរសម្នាក់ រួមនឹងម៉ូតូដេកដួលស្លាប់កណ្តាលផ្លូវ ដោយមានអាវរហែក ដោយសារតែត្រូវរន្ទះបាញ់ចំមួយគ្រាប់។
ហេតុការណ៍នេះបានកើតឡើងកាលពីវេលាម៉ោង២និង៤៥នាទីរសៀលថ្ងៃទី២០ ខែវិច្ឆិកា ឆ្នាំ២០២០ នៅចំណុចភូមិបឹង ឃុំកំពង់អំពិល ស្រុករំដួល ខេត្តស្វាយរៀង។
មន្ត្រីនគរបាលស្រុករំដួលបានឲ្យដឹងថា បុរសខាងលើមានឈ្មោះ កឹង យ៉ាត អាយុ៤៩ឆ្នាំ មុខរបរកសិករ រស់នៅភូមិព្រៃបឹង ឃុំម៉ឺនជ័យ ស្រុករំដួល ។
បើតាមអ្នកភូមិបានឱ្យដឹងថា មុនពេលកើតហេតុមានភ្លៀងរលឹមស្រិចៗនិងខ្យល់កន្ត្រាក់បោកបក់យ៉ាងខ្លាំង ហើយស្របគ្នានោះ មានបុរសម្នាក់បានជិះម៉ូតូមួយគ្រឿង ម៉ាកហុងដាសេ១២៥ ធ្វើដំណើរកាត់ប្រឡាយទឹក ស្រាប់តែត្រូវរន្ទះបាញ់លាន់ឮសូរឆាំង ក្រោយមកក៏ស្ងាត់ហើយខណៈនោះ ស្រាប់តែឃើញបុរសដែលជិះម៉ូតូនោះ ដេកដួលក្បែរម៉ូតូទើបបង្កការភ្ញាក់ផ្អើលតែម្ដង។
សពត្រូវបានសមត្ថកិច្ចធ្វើកំណត់ហេតុ និងបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីទាំងក្ដុកក្ដួលនិងសោកសង្រេងបំផុត៕ដោយ៖វ៉ៃកូ
