ខេត្តស្វាយរៀង ៖ កងរាជអាវុធហត្ថខេត្តស្វាយរៀង នៅថ្ងៃ ទី១៣ ខែធ្នូ ឆ្នាំ២០២០ បានឲ្យដឹងថា សមត្ថកិច្ចជំនាញ នៃការិយាល័យបទល្មើសគ្រឿងញៀន បានបញ្ជូនជនសង្ស័យប្រុសស្រីចំនួន ៤នាក់ ទៅតុលាការដើម្បីផ្ដន្ទាទោសតាមច្បាប់ពាក់ព័ន្ធករណីរក្សាទុក ឬជួញដូរដោយខុសច្បាប់នូវសារធាតុញៀន។
សមត្ថកិច្ចបានឲ្យដឹងថា: កាលពីវេលាម៉ោង២៤និង១៥នាទី ថ្ងៃទី៦ ខែធ្នូ ឆ្នាំ ២០២០ កម្លាំងមូលដ្ឋានកងរាជអាវុធហត្ថក្រុងបាវិត និងកម្លាំងមូលដ្ឋានកងរាជអាវុធហត្ថស្រុកស្វាយទាប បានធ្វើការល្បាតតាមដងផ្លូវ រហូតដល់ម៉ោង ១និង៣០ឈានចូល ថ្ងៃទី៧ ខែធ្នូ ឆ្នាំ២០២០ កម្លាំងល្បាតមកដល់ចំណុចផ្សារប្រសូត្រ ស្ថិតនៅភូមិប្រសូត្រ១ ឃុំកណ្តៀងរាយ ស្រុកស្វាយទាប ខេត្តស្វាយរៀង។
ដោយកម្លាំងល្បាតមានការសង្ស័យបុរសម្នាក់ដែលជិះម៉ូតូ មានការ៉ុងពណ៌សជិះសំដៅទៅត្បូងតាមផ្លួវ ៣១៤ D ផ្លូវទៅស្រុកកំពង់រោទិ៍ ពេលនោះសមត្ថកិច្ចក៏តាមដេញពីក្រោយ ជនសង្ស័យដឹងខ្លួនក៏ផ្តួលម៉ូតូរត់គេចខ្លួនចោលម៉ូតូចំនួន ១គ្រឿង និងការ៉ុងចំនួន ១ ក្រោយពីសមត្ថកិច្ចឆែរឆេរក្នុងការ៉ុងរកឃើញមានម្សៅក្រាមពណ៌សថ្លាចំនួន ៩ កញ្ចប់ធំមានទម្ងន់ ៩,០៨២ ក្រាម (គិតទាំងសំបកវេចខ្ចប់) (ជនសង្ស័យរត់គេចខ្លួន) ។
បន្ទាប់មកសមត្ថកិច្ចស្រាវជ្រាវតាមរយៈម៉ូតូបានដឹងថា ម្ចាស់ម៉ូតូឈ្មោះ សុខ យ៉ាវ ដែលជាភ្នាក់ងារ របស់សមត្ថកិច្ចកងរាជអាវុធហត្ថក្រុងបាវិត បន្ទាប់មកសមត្ថកិច្ចក៏បានសាកសួរឈ្មោះ សុខ យ៉ាវ ក៏បានរាយការណ៍ប្រាប់សមត្ថកិច្ចថា ឈ្មោះ ង្វៀង យ៉ាងហាយ (ហៅវៀង) បានពឹងឲ្យខ្លួនទៅរំលោះម៉ូតូឲ្យ ហើយយកម៉ូតូឲ្យឈ្មោះ ង្វៀង យ៉ានហាយ (ហៅវៀង) នៅចំណុចផ្សារប្រសូត្រ ក្រោយមកឈ្មោះ សុខ យ៉ាវ ជិះម៉ូតូមកដល់ចំណុចផ្សារប្រសូត្រ ក៏ឃើញឈ្មោះ វៀង ចុះពីលើរថយន្តឈ្មួល កាន់ការ៉ុងមួយយកមកលើកដាក់ម៉ូតូ រួចជិះទៅត្បូងបាត់ ចំណែកឈ្មោះ សុខ យ៉ាវ ក៏ឡើងជិះរថយន្តឈ្នួលទៅក្រុងបាវិត ហើយឈ្មោះ សុខ យ៉ាវ បានសហការជាមួយសមត្ថកិច្ចថា៖ ខ្លួនស្គាល់ឈ្មោះ វៀង ស្នាក់នៅបន្ទប់ជួលលេខ៣០២ អាគារអូឡាំព្យាC2 បន្ទាប់មកឈ្មោះ សុខ យ៉ាវ ក៏នាំសមត្ថកិច្ចទៅចាប់ខ្លួនឈ្មោះ វៀង នៅរាជធានីភ្នំពេញ ។
មន្រ្តីនគរបាលយុត្តិធម៌កងរាជអាវុធហត្ថខេត្តស្វាយរៀង ស្នើសុំលោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ដេីម្បីឲ្យមន្រ្តីនគរបាលយុត្តិធម៌ពន្លាតដែនសមត្ថកិច្ចទៅរាជធានីភ្នំពេញ ដោយសហការជាមួយ កម្លាំងកងរាជអាវុធហត្ថលើផ្ទៃប្រទេស ជាមួយកម្លាំងបញ្ជាការដ្ឋានកងរាជអាវុធហត្ថរាជធានីភ្នំពេញ និងកម្លាំងកងរាជអាវុធហត្ថខណ្ឌ៧មករា។
ក្រោមការដឹកនាំដោយ លោកឧត្តមសេនីយ៍ត្រី អ៊ុង ដេប៉ូ ស្នងការរង នៃស្នងការដ្ឋានស្រាវជ្រាវ និងបង្រ្កាបបទល្មើស លោកវរសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀង លោកវរសេនីយ៍ទោ អ៊ួង វិរៈរ័ត្នមុន្នី នាយការិយាល័យប្រឆាំងគ្រឿងញៀន អ.ហ.ផ.ទ និងដោយមានការសម្របសម្រួល ពីឯកឧត្តម ខាំ សុផារី ព្រះរាជអាជ្ញា នៃអយ្យការអមសាលាដំបូងខេត្តស្វាយរៀង និងលោក ស៊ិន វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ រហូតដល់ម៉ោង ១៤និង១៥នាទី ថ្ងៃទី៨ ខែធ្នូ ឆ្នាំ២០២០ កម្លាំងកងរាជអាវុធហត្ថ បានចុះឆែរឆេរបន្ទប់លេខ៣០២ ក្នុងអាគារអូឡាំព្យាC2 ស្ថិតនៅផ្លូវ២១៧ (មហាវិធីហ្សាដឺហ្គូ) ភូមិលេខ៧ សង្កាត់វាលវង់ ខណ្ឌ៧មករា រាជធានីភ្នំពេញ កម្លាំងកងរាជអាវុធហត្ថ បានឃាត់ខ្លួនជនសង្ស័យចំនួន ៣ នាក់ស្រី ០១ នាក់ គឺ១.ឈ្មោះ កាវ គ័រវ៉ៃ ភេទប្រុស អាយុ ៥៩ ឆ្នាំ ជនជាតិចិន មុខរបរបុគ្គលិកកាស៊ីណូណាហ្គា ទីលំនៅបច្ចុប្បន្នស្នាក់នៅអាគារអូឡាំព្យាC2 ផ្លូវលេខ ២១៧ ភូមិ៧ សង្កាត់វាលវង់ ខណ្ឌ៧មករា រាជធានីភ្នំពេញ ។ ២.ឈ្មោះ ង្វៀង យ៉ានហាយ (ហៅវៀង ឬ ទី) ភេទប្រុស អាយុ ៣៦ឆ្នាំ ជនជាតិវៀតណាម ទីលំនៅបច្ចុប្បន្ន ស្នាក់នៅអគារអូឡាំព្យា ផ្លូវលេខ ២១៧ ភូមិ ៧ សង្កាត់វាលវង់ ខណ្ឌ៧មករា រាជធានីភ្នំពេញ ។ ៣.ឈ្មោះ ចឹង ធីវី ភេទស្រី អាយុ ២៩ ឆ្នាំ មុខរបរមិនពិតប្រាកដ មានទីលំនៅបច្ចុប្បន្នស្នាក់នៅអាគារ អូឡាំព្យា ផ្លូវលេខ ២១៧ ភូមិ ៧ សង្កាត់វាលវង់ ខណ្ឌ៧មករា រាជធានីភ្នំពេញ ។
វត្ថុតាងដកហូតរួមមាន ៖ ម្សៅក្រាមពណ៌សថ្លា ៣ កញ្ចប់(តូច) ពុំទាន់ថ្លឹង, ថ្នាំគ្រាប់ពណ៌ស្វាយខ្ចីចំនួន ៤ គ្រាប់, ជញ្ជីងសម្រាប់ថ្លឹងគ្រឿងញៀនចំនួន ២ គ្រឿង, ប្រាក់ដុល្លារក្រដាស100 ចំនួន ៣០៣សន្លឹក, ក្រដាស20 ចំនួន ១សន្លឹក, ក្រដាស៥ដុល្លារ ចំនួន ១សន្លឹក, ប្រាក់អឺរូក្រដាស១០ ចំនួន ១សន្លឹក, ប្រាក់សាំងហ្កាពួរ២$ ចំនួន១សន្លឹក, ប្រាក់ចិន ១០យ័ន១សន្លឹក, ប្រាក់រុស្សីក្រដាស៥០ ចំនួន ១សន្លឹក និងក្រដាស១០ចំនួន១សន្លឹក, ប៉ាស្ព័រចំនួន ២, នាឡិកាដៃ ៣ គ្រឿង, ទូរស័ព្ទ ៨ គ្រឿង, លោហៈធាតុពណ៌សខ្សែដៃ១ ខ្សែក ២ ចិញ្ចៀន២វង់ , អត្តសញ្ញាណប័ណ្ណ៤សន្លឹក, សោម៉ូតូ២ , បារីម៉ាក Double Happiness ២ប្រអប់, ម្សៅក្រាមពណ៌សថ្លា ២ ស្បោង សង្ស័យជាសារធាតុញៀន, ដបកែច្នៃសម្រាប់ប្រើប្រាស់គ្រឿងញៀនចំនួន១ , ថង់សម្រាប់វេចខ្ចប់គ្រឿងញៀនមួយចំនួន។
ក្រោយពីឃាត់ខ្លួនជនសង្ស័យទាំង ៣នាក់ គឺ ជនសង្ស័យឈ្មោះ ង្វៀង យ៉ានហាយ (ហៅវៀង ឬ ទី) ភេទប្រុស អាយុ ៣៦ ឆ្នាំ បានសារភាពថា ឈ្មោះ ណាម ដែលរស់នៅក្នុងក្រុងបាវិត ជាកូនចៅរបស់ឈ្មោះ កាវ គ័រវ៉ៃ និងមានទំនាក់ទំនង់ទិញថ្នាំញៀន និងមានថ្នាំញៀនចំនួន ១កញ្ចប់ទៀត ដាក់នៅក្រោមឡាវ៉ាបូលាងដៃក្នុងបន្ទប់ទឹក ដែលខ្លួនឃើញឈ្មោះ សឺ បានយកទុកពេលព្រឹកថ្ងៃទី៨ ខែធ្នូ ឆ្នាំ២០២០ មុនពេលសមត្ថកិច្ចចូលមកដល់ ពេលដាក់ថ្នាំញៀនហើយឈ្មោះ សឺ ក៏ចុះទៅក្រោមបាត់ ។
រហូតដល់ម៉ោង ២០និង០០ នាទី ថ្ងៃទី១១ ខែធ្នូ ឆ្នាំ២០២០ កម្លាំងកងរាជអាវុធហត្ថ បានចុះទៅដល់ចំណុចខាងមុខកាស៊ីណូវីអាយភី ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ឃាត់ខ្លួនជនសង្ស័យចំនួន ១ នាក់ ភេទប្រុស ឈ្មោះ តាម សុធាណា ហៅ ណាម អាយុ ២៨ ឆ្នាំ មុខរបរកម្មករ ជនជាតិខ្មែរ ទីលំនៅបច្ចុប្បន្នភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។
ប្រភពខាងលើបានឲ្យដឹងទៀតថា រហូតដល់ម៉ោង ៩និង០០ នាទី ថ្ងៃទី១២ ខែធ្នូ ឆ្នាំ២០២០ កម្លាំងកងរាជអាវុធហត្ថ បាននាំខ្លួនជនសង្ស័យឈ្មោះ ង្វៀង យ៉ានហាយ និងជនសង្ស័យឈ្មោះ កាវ គ័រវ៉ៃ ទៅចង្អុលបង្ហាញថ្នាំញៀនចំនួន ១កញ្ចប់ ទៀតដែលឈ្មោះ សឺ លាក់ទុកក្រោមឡាវ៉ាបូលាងដៃ នៅបន្ទប់ទឹកក្នុងបន្ទប់ជួលលេខ ៣០២ ក្នុងអាគារអូឡាំព្យាC2 ឆែកឆេររកឃើញ៖
ម្សៅសចំនួន ២ ដុំ (ហេរ៉ូអ៊ីន ) មានទម្ងន់ ៧១៤.៤ ក្រាម (គិតទាំងសម្បកវិចខ្ចប់) ថ្នាំសុទ្ធចំនួន ៧១១.២ ក្រាម និងសៀវភៅចំនួន ២ ក្បាល។
បច្ចុប្បន្ន ជនសង្ស័យរួម នឹងវត្ថុតាង ត្រូវបានកម្លាំងជំនាញ បញ្ជាការដ្ឋានកងរាជអាវុធហត្ថខេត្តស្វាយរៀង កសាងសំណុំរឿង បញ្ជូនទៅអយ្យការអមសាលាដំបូងខេត្តស្វាយរៀង ៕ រក្សាសិទ្ធិដោយ៖វ៉ៃកូ
