ប្រព័ន្ធផ្សព្វផ្សាយក្នុងស្រុករបស់ប្រទេសចិន បានរាយការណ៍ថា សាកសពរបស់ Kang Cuicui ត្រូវបានគាស់ចេញបីផ្នូរ ដើម្បីយកទៅរៀបការជាមួយសពបុរសម្នាក់ នៅក្នុងពិធីបូរាណមួយនៅក្នុងខេត្ត Hebei។
ទោះបីទំនៀមទម្លាប់របស់ Yin Hun ឬ “រៀបការខ្មោច” គឺចម្លែកសម្រាប់យើងភាគច្រើនក៏ដោយ តែវាពិតជារឿងធម្មតាទៅហើយ ដែលត្រូវបានគេនិយាយថាត្រូវបានអនុវត្តនៅក្នុងប្រទេសនេះរាប់ពាន់ឆ្នាំ ដោយបុគ្គលដែលជឿថាស្លាប់នឹងមិននៅតែឯង។
ពិធីនេះទទួលបានការចាប់អារម្មណ៍ពីសំណាក់សាធារណជន បន្ទាប់ពីសារព័ត៌មានកាលពីសប្តាហ៍មុន បានរាយការណ៍អំពីទំនៀមទម្លាប់បុរាណនេះដែលអនុវត្តដោយអ្នកភូមិនៅ Huanghua ខេត្ត Cangzhou ។
គេបានគេរាយការណ៍ថា នាង Kang បានសម្លាប់ខ្លួនឯងកាលពីឆ្នាំ ២០០៨ បន្ទាប់ពីមានការយល់ច្រឡំជាមួយប្តីរបស់នាងដែលមានឈ្មោះ Li Zhong។
លោក Li Zhong និងក្រុមគ្រួសារបានចំណាយប្រាក់ចំនួន ១០០,០០០ យ័ន ទៅលើការធ្វើពិធីបុណ្យសពដ៏ធំមួយសម្រាប់ភរិយាដែលបានចែកឋាន មុនពេលបញ្ចុះសពនាងនៅក្នុងផ្នូរជាមួយគ្រឿងអលង្ការមាស។
តែយ៉ាងណា Li Zhong ពិតជាមានការភ្ញាក់ផ្អើលយ៉ាងខ្លាំង នៅពេលបានទៅមើលផ្នូរប្រពន្ធរបស់គាត់នៅថ្ងៃទី១៤ ខែវិច្ឆិកា ដោយបានរកឃើញថាផ្នូរនោះត្រូវបានគេជីក ក៏ដូចជាវត្ថុមានតម្លៃរួមទាំងគ្រឿងអលង្ការដែលបំពាក់នៅនឹងសពរបស់នាងត្រូវបានគេលួចគ្មានសល់។
ក្រុមគ្រួសាររបស់លោក Zhong ក្រោយមកបានដាក់របាយការណ៍ប៉ូលិស ហើយការស៊ើបអង្កេតបានរកឃើញថា គ្រួសារផ្ទាល់របស់ Kang ទទួលខុសត្រូវក្នុងការជីកផ្នូរកូនស្រីរបស់ពួកគេបែបនេះ។
សាកសពរបស់ស្ត្រីរូបនេះក៏ត្រូវបានលក់ក្នុងតម្លៃ ៨០,០០០ យ័ន (៤៩.៥៦៣ ដុល្លារ) ដល់ក្រុមគ្រួសារដែលកូនប្រុសរបស់គាត់បានស្លាប់ដោយសារគ្រោះថ្នាក់ចរាចរណ៍។
ម្តាយរបស់ Kang បាននិយាយថា អ្នកស្រីមានអារម្មណ៍ខឹង នៅពេលក្រុមគ្រួសារ Li Zhong ផ្លាស់ប្តូរផ្នូរគ្រួសារពួកគេ ដោយទុកឲ្យសពកូនស្រីគាត់នៅតែឯង។
ស្ត្រីជាម្តាយរូបនោះបានចោទប្រកាន់ថា “អ្នកបានរើផ្នូរគ្រួសាររបស់អ្នក ហើយទុកផ្នូរកូនស្រីខ្ញុំនៅទីនោះ” ។
គាត់ក៏ងនៅបានពន្យល់ថា៖ «ប្រសិនបើខ្ញុំមិនអាចរើផ្នូររបស់នាង ខ្ញុំត្រូវយកនាងចេញពីទីនោះ។ ខ្ញុំមិនអាចទុកឱ្យនាងក្លាយជាខ្មោចឯកោនៅក្នុងព្រៃបានទេ»។
អ្នកផ្គូរផ្គងក្នុងស្រុកម្នាក់ដែលមានជំនាញក្នុងការរៀបអាពាហ៍ពិពាហ៍ខ្មោច បានប្រាប់អ្នកយកព័ត៌មានថា ស្ត្រីដែលបានស្លាប់នៅវ័យក្មេងដោយមិនមានកូនដូចជានាង Kang នឹងត្រូវបានគេចាត់ទុកថាមានប្រជាប្រិយភាពនៅក្នុងទីផ្សារ។
ក្រុមគ្រួសារទាំងពីរដែលពាក់ព័ន្ធ បានធ្វើពិធីរៀបអាពាហ៍ពិពាហ៍នេះ នៅថ្ងៃទី២៣ ខែវិច្ឆិកា និងបានបញ្ចុះសាកសពអ្នកទាំងពីរនៅក្នុងរណ្តៅតែមួយ។
គួរបញ្ជាក់ថា នៅក្នុងរឿងដ៏ចម្លែកនេះ កាលពីឆ្នាំ ២០១៥ បុរសម្នាក់ត្រូវបានចាប់ខ្លួននៅខេត្ត Shanxi បន្ទាប់ពីព្យាយាមលក់សាកសពស្ត្រីម្នាក់ដែលពួកគេបានលួច ដើម្បីធ្វើជា “កូនក្រមុំខ្មោច”៕ រក្សាសិទ្ធិដោយ៖ លឹម ហុង
