ភ្នំពេញ ៖ យោងតាមកម្មវិធីសម្រាប់ព្រឹកថ្ងៃសៅរ៍ ទី១៩ ខែធ្នូ ឆ្នាំ២០២០ ឯកឧត្តមរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ វេង សាខុន អមដំណើរជាមួយដោយឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ និងសហការី អញ្ជើញមកពិនិត្យ និងវាយតម្លៃលើវឌ្ឍនភាព របស់ក្រុមហ៊ុនចំនួន ៤ ដែលកំពុងត្រៀមលក្ខណសម្បត្តិលើការងារបច្ចេកទេស បានត្រឹមត្រូវឆ្លើយតបតាមលក្ខខណ្ឌតម្រូវភូតគាមអនាម័យ សម្រាប់នាំចេញស្វាយកែវរមៀតស្រស់ ពីកម្ពុជាទៅកាន់សាធារណរដ្ឋប្រជាមានិតចិន។
ក្រុមហ៊ុនទាំងនោះគឺ៖ ទី១- ក្រុមហ៊ុន Green Centric Farm Co., Ltd ទី២- ក្រុមហ៊ុន បឹងកេត ហ្វេសហ្រ៊ូត ឯ.ក ទី៣- ក្រុមហ៊ុន Long Wo Agriculture (Cambodia) និងទី៤- ក្រុមហ៊ុន បាមីន អេហ្គ្រីខលឈ័រ ហាយ-ថេក ឌីវេឡុបមិន ឯ.ក ។
ឯកឧត្តមរដ្ឋមន្ត្រីក្រសួងកសិកម្ម បានអញ្ជើញមកពិនិត្យចម្ការស្វាយកែវរមៀតរបស់ក្រុមហ៊ុន Green Centric Farm Co., Ltd ស្ថិត នៅស្រុកថ្ពង ខេត្តកំពង់ស្ពឺ។ លោក សឿង សុខឃាង អ្នកគ្រប់គ្រងទូទៅបានឲ្យដឹងថា ចម្ការបានចាប់ផ្តើមរៀបចំនៅឆ្នាំ២០១០ បច្ចុប្បន្នមានផ្ទៃដី ២៧០ហ.ត មានស្វាយចំនួនជាង ៤៦ ៣៥៦ ដើម និងចំនួនជាង ៣០០០ហ.ត ទៀតបានចុះកិច្ចសន្យាជាមួយប្រជាកសិករនៅក្នុងតំបន់នេះ។ ក្រុមហ៊ុនបានសាងសង់ បន្ទប់ត្រជាក់ ឃ្លាំងត្រជាក់ បន្ទប់សម្ងួតត្រជាក់។ល។ កន្លងមកក្រុមហ៊ុនបានផលិតជាដំណាប់ស្វាយធម្មជាតិ (១៣% ស្ករ) ការ៉េមស្វាយ និងលក់ផលិតផលស្រស់សម្រាប់តែទីផ្សារក្នុងស្រុក។ ប្រើកម្មករ ៥០នាក់ សម្រាប់មើលថែទាំចម្ការ កែច្នៃ និងវេចខ្ចប់ស្វាយ។ សរុបមក ក្រុមហ៊ុនបានត្រៀមលក្ខណសម្បត្តិរួចរាល់ដើម្បីធ្វើការនាំចេញទៅកាន់ទីផ្សារចិន នាពេលអនាគត។ ឯកឧត្តមរដ្ឋមន្ត្រីបានវាយតម្លៃខ្ពស់ចំពោះឆន្ទ:វិនិយោគរបស់ជនជាតិកូរ៉េ ពីរនាក់ប្តីប្រពន្ធដែលមានអាយុ ៩០ឆ្នាំហើយ សម្រេចទទួលបានលទ្ធផលល្អប្រសើរលើការងារ បច្ចេកទេស ឆ្លើយតបតាមលក្ខខណ្ឌតម្រូវភូតគាមអនាម័យរបស់ប្រទេសចិន។ ឯកឧត្តមរដ្ឋមន្ត្រី សង្ឃឹមថាផលិតផលស្វាយរបស់ក្រុមហ៊ុននឹងមានឱកាសបង្ហាញខ្លួននៅលើទីផ្សារចិននាពេលឆាប់ៗខាងមុខ។
ចេញពីស្រុកថ្ពង ឯកឧត្តមរដ្ឋមន្ត្រី និងសហការី បានបន្តដំណើរមកពិនិត្យរោងចក្រប្រព្រឹត្តិកម្ម សម្លាប់សមាសភាពសត្វចង្រៃដោយប្រើទឹកក្តៅ (Hot Water Treatment, HWT) របស់ក្រុម ហ៊ុន បឹងកេត ហ្វ្រេសហ្វ្រូត ឯ.ក នៅតាមបណ្តោយផ្លូវជាតិលេខ ៤ គីឡូម៉ែត្រលេខ ៨២ ក្នុងឃុំត្រែងត្រយឹង ស្រុកភ្នំស្រួច។ បច្ចុប្បន្ន ក្រុមហ៊ុនបានតម្លើងប្រព័ន្ធខ្សែច្រវាក់ជ្រើសរើស សំរិតសំរាំងគុណភាពផ្លែស្វាយ ទំហំតូចធំ និងសម្លាប់សមាសភាពសត្វចង្រៃដោយប្រើ HWT ដើម្បីឲ្យត្រូវតាមស្តង់ដារទីផ្សារ។ ដំណើរការសាងសង់រោងចក្រសម្រេចបានជាង ៨០% ប៉ុន្តែជាបឋមដើម្បី ឲ្យទាន់រដូវប្រមូលផលស្វាយ រោងចក្របានដាក់ឲ្យដំណើរការបណ្តោះអាសន្នសិន ដោយធ្វើការប្រមូលទិញផលិតផលស្វាយ ពីប្រជាកសិករដែលបានចុះកិច្ចសន្យាជាមួយក្រុមហ៊ុន។ បន្ទាបពី់រោងចក្រសាងសង់រួច វាមានលទ្ធភាពសម្រិតសម្រាំងគុណភាព និងទំហំផ្លែស្វាយបានចំនួន ១៥០- ២០០ តោន/ថ្ងៃ។ ទោះជាយ៉ាងណា ក្រុមហ៊ុនកំពុងញាប់ដៃញាប់ជើងធ្វើយ៉ាងណាឲ្យដំណើរ ការសាងសង់រោងចក្រសម្រេចឲ្យទាន់តាមផែនការ មុនក្រុមបច្ចេកទេសអញ្ជើញ មកពីអគ្គនាយកដ្ឋានគយចិនចុះមកពិនិត្យ និងវាយតម្លៃចុងក្រោយក្នុងពេលឆាប់ៗខាងមុខ។
ឯកឧត្តមរដ្ឋមន្ត្រី បានពិនិត្យទិដ្ឋភាពជារួមឃើញថា ក្រុមហ៊ុនបានត្រៀមលក្ខណសម្បត្តិរួចរាល់ ហើយក្នុងការនាំចេញផ្លែស្វាយកែវរមៀតទៅកាន់ទីផ្សារចិន នៅតែការងារបន្ទាប់បន្សំមួយចំនួនតូច ដែលក្រុមហ៊ុនត្រូវប្រញាប់រួតរះបញ្ចប់ការងារឲ្យហើយ មុនក្រុមជំនាញបច្ចេកទេសមកពីអគ្គនាយកដ្ឋានគយចិនចុះមកវាយតម្លៃចុងក្រោយ។
នៅស្រុកភ្នំស្រួចដដែល ឯកឧត្តមរដ្ឋមន្ត្រីបានបន្តដំណើរមកពិនិត្យខ្សែច្រវាក់ផលិតកម្មស្វាយកែវរមៀត របស់ក្រុមហ៊ុន Long Wo Agriculture (Cambodia)។ ចំពោះហេដ្ឋារចនាសម្ព័ន្ធ មិនខុសពីក្រុមហ៊ុនពីរខាងដើមប៉ុន្មាន គឺស្ទើរតែរួចរាល់ជាស្ថាពរ ប៉ុន្តែប្រុមហ៊ុននេះ ខុសពីក្រុមហ៊ុនមុនត្រង់ថា ប្រព័ន្ធប្រព្រឹត្តិកម្មសម្លាប់សមាសភាពសត្វចង្រៃគឺប្រើទឹកក្តៅ (Hot Water Treatment)។ ក្រោយពេលរៀបចំតម្លើងឧបករណ៍ក្នុងរោងចក្រសព្វគ្រប់ វាអាចសំអាចស្វាយបានចំនួន ១០០តោន/ថ្ងៃ។ ក្នុងដំណាក់កាលដំបូង ឧបករណ៍ និងសម្ភារភាគច្រើនត្រូវបាននាំ ចូលពីចិន ប៉ុន្តែអនាគតក្រុមហ៊ុននឹងតម្លើងរោងចក្រផលិតខ្លួនឯងដើម្បីកាត់បន្ថយថ្លៃដើមមាន លទ្ធភាពប្រកួតប្រជែងក្នុងទីផ្សារ។ បច្ចុប្បន្ន ក្រុមហ៊ុនបានចុះកិច្ចសន្យាជាមួយកសិករ ប្រមូលទិញផ្លែស្វាយបាន ២៥ ០០០ដើម (ប្រហែលជាជាង ១០០ហិកតា) បន្ទាប់ពីរោងចក្រដាក់ឲ្យដំណើរការ និងបាននាំចេញទំហំផ្ទៃដីនឹងមានការកើនឡើងទ្វេដង។
ឯកឧត្តមរដ្ឋមន្ត្រី បានស្នើឲ្យក្រុមហ៊ុនជួយបណ្តុះបណ្តាលបច្ចេកទេសដល់ម្ចាស់ចម្លារ ដើម្បីឲ្យពួកគាត់ទទួលយកបច្ចេកវិទ្យា ទៅអនុវត្តក្នុងចម្ការ ឬអនុវត្ត GAP ធ្វើយ៉ាងណាធានាបាននូវស្តង់ដារចម្ការ មានអនាម័យ គុណភាព និងសុវត្ថិភាពផលិតផលស្វាយ ធានាបានតម្លៃលើវត្ថុធាតុដើមនេះ។ ក្រុមហ៊ុនត្រូវសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តដើម្បីសហការរៀបចំសហគមន៍ ឬបណ្តុំអាជីវកម្មស្វាយ និងការអនុវត្តផលិតកម្មកសិកម្មតាមកិច្ចសន្យាបានត្រឹមត្រូវ ផ្តល់ប្រយោជន៍ឲ្យភាគីទាំងសងខាង៕រក្សាសិទ្ធិដោយ៖បញ្ញាស័ក្តិ
