ប៉ៃលិន៖ សម្តេចក្រឡាហោមស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានស្នើដល់ក្រុមប្រឹក្សាខេត្តអភិបាលរងខេត្ត មន្ទីរអង្គភាពជុំវិញខេត្តមន្ត្រីរាជការកងកម្លាំងប្រដាប់អាវុធ អភិបាលក្រុងស្រុកឃុំសង្កាត់ និងប្រជាពលរដ្ឋនៅក្នុងខេត្តប៉ៃលិន ខិតខំរួមគ្នា ដើម្បីថែរក្សាសុខសន្តិភាពនិងការ អភិវឌ្ឍន៍ខេត្តឲ្យកាន់តែរីកចម្រើន។
ការលើកឡើងបែបនេះ ក្នុងពិធីប្រកាសចូលកាន់តំណែងអភិបាលខេត្តប៉ៃលិនថ្មី កាលពីព្រឹកថ្ងៃទី២១ធ្នូ២០២០នៅសាលាខេត្តប៉ៃលិន។
សម្តេចក្រឡាហោមស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានអំពាវនាវដល់មន្ត្រីច្រកទ្វារខេត្ត ដែលជាប់ព្រំដែនកម្ពុជា ថៃ ត្រូវបង្កើនការប្រុងប្រយ័ត្នខ្ពស់ ព្រោះនៅប្រទេសថៃ មានអ្នកឆ្លងជំងឺកូវីដ១៩ កាន់តែច្រើនឡើង ដូច្នេះរាល់ការចេញចូលត្រូវត្រួតពិនិត្យនិងធ្វើចត្តាឡីស័ក ឲ្យបានត្រឹមត្រូវជៀសនាំជំងឺពីគេមកយើងនិងពីយើងទៅគេ។
លោកជំទាវ បាន ស្រីមុំ អភិបាលខេត្តប៉ៃលិនទើបតែងតាំងថ្មី បានប្តេជ្ញាចិត្តខិតខំប្រឹងប្រែងបន្តការអភិវឌ្ឍន៍ រក្សាការពារសុខសន្តិភាព ជូនប្រជាពលរដ្ឋនៅតាមមូលដ្ឋាន បង្កើនកិច្ចសហការ និងសាមគ្គីភាពផ្ទៃក្នុង បង្កើនការការពារនូវវិធានការជំងឺកូវីដ១៩ ដូនដល់ពលរដ្ឋ។ រៀនសូត្របទពិសោធន៍ពីរៀមច្បង អតីតថ្នាក់ដឹកនាំខេត្ត ដើម្បីមកអភិវឌ្ឍន៍ឲ្យកាន់តែរីកចម្រើន។
គួរបញ្ជាក់ផងដែរថា លោកជំទាវ បាន ស្រីមុំ ជាស្ត្រីទីពីរហើយ ដែលមានមុខតំណែងជាអភិបាលខេត្ត ក្នុងសម័យសម្តេចតេជោ ហ៊ុន សែន បន្ទាប់ពីស្ត្រីទីមួយ គឺលោកជំទាវ មិថុនា ភូថង ជាអភិបាលខេត្តកោះកុង។ លោកជំទាវបណ្ឌិត បាន ស្រីមុំ គឺជាស្ត្រីមួយរូប ដែលមានប្រជាប្រិយខ្លាំង និងជាស្ត្រីមួយរូបដែលមានសកម្មភាព ក្នុងកិច្ចការងារមនុស្សធម៌ និងកិច្ចការងារជួយដល់ប្រជាពលរដ្ឋក្នុងខេត្តប៉ៃលិន ពិសេសលោកជំទាវបណ្ឌិតបាន ស្រីមុំ ជាអ្នកតំណាងរាស្ក្រមណ្ឌលប៉ៃលិន និងជាភរិយាឯកឧត្តម អ៊ី ឈាន រដ្ឋលេខាធិការក្រសួងការពារជាតិហើយ ជាប្រធានសាខាកាកបាទក្រហមកម្ពុជាខេត្តប៉ៃលិន និងជាប្រធានសភាពសព័ន្ធយុវជនកម្ពុជាខេត្តប៉ៃលិនផងដែរ៕ រក្សាសិទ្ធិដោយ៖អ៊ុងសារុំ
