ភ្នំពេពញ៖ លោកច្រឹក សុខនីម ត្រូវបានគាំទ្រ និងជ្រើសរើសជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ជាថ្មីម្តងទៀតដើម្បីបន្តដឹកនាំសមាគមសម្រាប់អាណត្តិទី៧ សម្រាប់ឆ្នាំ២០២១ ដល់ឆ្នាំ២០២២។
ក្នុងអាណត្តិទី៧នេះ មានបេក្ខភាពចំនួនពីររូបដែលបានឈរឈ្មោះជាប្រធានសមាគមរួមមាន លោកច្រឹក សុខនីម នាយ កប្រតិបត្តិក្រុមហ៊ុន Mekong Brokerage Co.,Ltd និងលោក វ៉ន ចាន់ថន នាយកប្រតិបត្តិក្រុមហ៊ុន Town City Real Estate Co., Ltd។
ការបោះឆ្នោតជ្រើសរើសថ្នាក់ដឹកនាំសមាគមសម្រាប់អាណត្តិថ្មីនេះ បានធ្វើឡើងនៅថ្ងៃទី ២៣ ខែធ្នូ ឆ្នាំ២០២០ បន្ទាប់ពីអាណតិ្តទី៦ (ឆ្នាំ២០១៩-២០២០) ដែលដឹកនាំដោយលោក ច្រឹក សុខនីម នឹងត្រូវបញ្ចប់នៅដំណាច់ឆ្នាំ២០២០នេះ ។
សមាជិកសមាគម(CVEA) ចំនួន៩៦ ក្រុមហ៊ុន បានចូលរួមបោះឆ្នោត ក្នុងចំណោមសមាជិកដែលមានសិទ្ធិបោះឆ្នោតសរុបពីតំណាង ១០២ ក្រុមហ៊ុន។ លោកច្រឹក សុខនីមបានទទួលលទ្ឋផលឆ្នោត ផ្តល់សេចក្តីទុកចិត្តចំនួន៤៩សម្លេង នាំមុខលោកវ៉ន ចាន់ថនអគ្គនាយកក្រុមហ៊ុនTown City Real Estate ដែលបានទទួលសម្លេងឆ្នោតចំនួន៤៧សម្លេង។
លោកច្រឹក សុខនីម បានថ្លែងថា ក្នុងអាណត្តិទី៦ សមាគមបានសម្រេចបេសកម្មសំខាន់ៗ ដូចជា ការលើកកម្ពស់ និងពង្រីកសម្ថភាព ធនធានមនុស្សក្នុងវិស័យអចលនទ្រព្យ ហើយលោកនឹងបន្តបេសកម្មថ្មីៗ ដើម្បីភាពរីកចម្រើនរបស់សមាគម ក៏ដូចជា វិស័យអចលនទ្រព្យបន្ថែមទៀត។
លោកថ្លែងថា៖ «សម្រាប់អាណត្តិថ្មីនេះ យើងនឹងផ្តោតលើការលើកកម្ពស់ការអប់រំ សមត្ថភាព គុណភាព និងកម្រិតជីវភាពរបស់សមាជិកឲ្យរឹតតែប្រសើរឡើង និងជាពិសេសជំរុញការធ្វើការងាររួមគ្នា ដើម្បីដឹកនាំ CVEA ឆ្ពោះទៅរកភាពរីកចម្រើនបន្ថែមទៀត ទាំងនៅក្នុងប្រទេស និងនៅលើឆាកអន្តរជាតិ»។
ទន្ទឹម គ្នានេះ លោក លឹម សុជាតិ នាយកប្រតិបត្តិក្រុមហ៊ុន Realtor 168 Co.,Ltd ត្រូវបានជ្រើសតាំងជាប្រធាន ក្រុមប្រឹក្សាភិបាលរបស់សមាគមក្នុងអាណត្តិថ្មីនេះផងដែរ ក្នុងចំណោមបេក្ខភាពឈរឈ្មោះទាំង៦រូប។
គួរបញ្ជាក់ថា គិតមកទល់នឹងបច្ចុប្បន្ននេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានដំណើរការចំនួន៦ អាណត្តិរួចមកហើយ ដោយក្នុងមួយអាណត្តិមានរយៈពេលពីរឆ្នាំ។ ហើយរៀងរាល់ពីរឆ្នាំម្តង សមាគមតែងតែបានរៀបចំឱ្យមានការបោះឆ្នោតជ្រើសរើសប្រធាន សមាគម និងក្រុមប្រឹក្សាភិបាលរបស់ខ្លួន៕
រក្សាសិទ្ធិដោយ៖CEN
