ភ្នំពេញៈ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាឲ្យអធិការដ្ឋាននគរបាលខណ្ឌទាំង១៤ ត្រូវយកចិត្តទុកដាក់ខ្ពស់បំផុតទៅលើការងារគ្រប់គ្រងមុខញ្ញាក្មេងទំនើង និងដាក់បទបញ្ជាឱ្យមានការទប់ស្កាត់ក្មេងទំនើងឱ្យមានប្រសិទ្ធភាព។ ក្នុងករណីក្មេងទំនើងបង្កជាបទល្មើសព្រហ្មទណ្ឌត្រូវយកទៅចាត់ការតាមផ្លូវច្បាប់ដោយមិនគិតថាក្មេងទំនើងនោះជាកូនអ្នកណានោះឡើយ។
ការបញ្ជានេះ បានធ្វើឡើងនៅក្នុងកិច្ចប្រជុំអនុវត្តការងារពង្រឹងសន្តិសុខ សណ្តាប់ធ្នាប់សាធារណៈដាក់ចេញនូវវិធានការបង្ការទប់ស្កាត់និងបង្ក្រាបក្មេងទំនើង ដែលបង្កឱ្យប៉ះពាល់អសន្តិសុខសង្គម កាលពីថ្ងៃទី២៨ ខែធ្នូ ឆ្នាំ២០២០។
លោកឧត្តមសេនីយ៍ឯក ស ថេត ក៏បានណែនាំលោកស្នងការរងទទួលផែនការងារសេនាធិការនិងលោកស្នងការរងទទួលផែនការងារព្រហ្មទណ្ឌត្រូវចុះតាមដានត្រួតពិនិត្យពង្រឹងការងារនៅតាមអធិការដ្ឋាននគរបាលខណ្ឌទាំង១៤ ស្តីពីការគ្រប់គ្រងមុខសញ្ញាក្មេងទំនើងឱ្យបានត្រឹមត្រូវចៀសវាងការធ្វើរបាយការណ៍ភូតកុហកពីមុខសញ្ញាក្មេងទំនើងនេះ។
ពាក់ព័ន្ធនិងវិធានការបង្ការទប់ស្កាត់និងបង្ក្រាបក្មេងទំនើងនៅក្នុងរាជធានីភ្នំពេញបើយោងតាមរបាយការណ៍របស់ស្នងការដ្ឋាននគរបាលរាជធានៅភ្នំពេញរយៈពេល០១ឆ្នាំ គឺឆ្នាំ២០២០ កម្លាំងនគរបាលរាជធានីភ្នំពេញបង្ក្រាបក្មេងទំនើ ង៦៨១ករណី ឃាត់ខ្លួន១០៣៩នាក់។ ក្នុងនោះ ពាក់ព័ន្ធនិងបទល្មើសព្រហ្មទណ្ឌ៥០៦ករណីនិងករណីបង្កការអុកឡុកនៅក្នុងមូលដ្ឋាន១៧៣ករណី។
សូមជម្រាបថា កាលពីពេលថ្មីៗកន្លងមកនេះ សកម្មភាពក្រុមក្មេងទំនើងនៅក្នុងរាជធានីភ្នំពេញហាក់បីដូចជាកំរើកឡើងវិញបន្ទាប់ពីរយៈពេលចុងក្រោយគេមើលឃើញថាក្មេងទំនើងបានធ្វើសកម្មភាពវាយតប់គ្នា និងឈានទៅធ្វើអំពើឆក់ប្លន់យកទ្រព្យសម្បត្តិប្រជាពលរដ្ឋទៀតនោះផង។ ដូចជាករណីមានក្មេងទំនើង០១ក្រុមគ្នា១០នាក់ កាលពីយប់ថ្ងៃទី២៦ ខែធ្នូ ឆ្នាំ២០២០ នៅចំណុចផ្លូវសុធារសភូមិ២ សង្កាត់ចតុមុខ ខណ្ឌដូនពេញ បានធ្វើសកម្មភាពយកដាវសាំម៉ូរ៉ៃកាប់ទៅលើជនរងគ្រោះ០២នាក់ជិះម៉ូតូ០១គ្រឿងឌុបគ្នាបណ្តាលឱ្យរងរបួសយ៉ាងធ្ងន់និងប្លន់យកម៉ូតូជនរងគ្រោះ ខណៈដែលជនរងគ្រោះគ្រាន់តែជិះម៉ូតូមើលមុខក្រុមជនសង្ស័យ។ ក្រោយពីធ្វើសកម្មភាពនោះភ្លាមជនសង្ស័យ០២នាក់ត្រូវបាននគរបាលប៉ុស្ថិ៍រដ្ឋបាលចតុមុខបង្ក្រាបចាប់ខ្លួន។ ចំណែកបក្ខពួក០៨នាក់ទៀតរត់គេចខ្លួន សមត្ថកិច្ចកំពុងបន្តស្វែងរកចាប់ខ្លួន៕រក្សាសិទ្ធិដោយ៖CEN
