ភ្នំពេញ ÷ជនជាតិម្នាក់បើករថយន្តក្នុងស្ថានភាពស្រវឹងស្រាជោកជាំក្នុងល្បឿនយ៉ាងលឿនជ្រុលទៅបុករថយន្ត high landerពីក្រោយពេញទំហឹងរួចជ្រុលទៅបុករថយន្ត starex មួយគ្រឿងទៀតបណ្ដាលរងការខូចខាតរថយន្តទាំងបីគ្រឿង ស្ទើទាំងស្រុង ។ សំណាងល្អមិនមានអ្នករងរបួសទៅដល់ម្ចាស់រថយន្តទាំងសងខាងនោះទេ។
ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង១០និង៣០នាទីយប់ ថ្ងៃសុក្រទី១ ខែមករា ឆ្នាំ២០២១ ស្ថិតនៅតាមបណ្ដោយផ្លូវ២១៧ ចំណុចជិតស្តុបផ្សារដើមគរ ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។
បើយោងតាមប្រភពព័ត៌មានពីប្រជាពលរដ្ឋ នៅកន្លែងកើតហេតុបានឲ្យដឹងថា មុនពេលកើតហេតុគេឃើញជនជាតិចិនបើករថយន្ត rangerover មួយគ្រឿងពណ៌ ស ពាក់ផ្លាកលេខភ្នំពេញ 2M 5279 ធ្វើដំណើរក្នុងទិសដៅពីលិចទៅកើតក្នុងល្បឿនលឿនដូចហោះខណៈមកដល់ចំណុចកើតហេតុខាងលើ ជ្រុលចង្កូតទៅបុករថយន្ត highlander ពណ៌ទឹកប្រាក់ពាក់ផ្លាកលេខភ្នំពេញ 2BA 7807 បើកដោយបុរសម្នាក់ស្របគ្នាប្រុងបត់ទៅខាងឆ្វេងចំពីក្រោយពេញទំហឹងបណ្ដាលឲ្យរថយន្ត highlander ជ្រុលទៅបុករថយន្ត starex ពណ៌ទឹកប្រាក់ពាក់ផ្លាកលេខភ្នំពេញ2AV 2158 បើកដោយជនជាតិចិនពីរនាក់ប្ដីប្រពន្ធនិងកូនតូចធ្វើដំណើរក្នុងទិសដៅពីកើតទៅលិចចំពាក់កណ្តាលទ្វារពេញទំហឹងបណ្ដាលរងការខូចខាតរថយន្តទាំងបីគ្រឿងយ៉ាងដំណំ។ ចំណែកឯជនជាតិចិនជាអ្នកបង្កវិញបម្រុងនឹងរត់គេចខ្លួនតែត្រូវបានប្រជាពលរដ្ឋ ឃាត់បានប្រគល់ឲ្យសមត្ថកិច្ច។
ក្រោយពេលកើតហេតុសមត្ថកិច្ចមូលដ្ឋានសហការជាមួយនឹងខាងចរាចរណ៍ខណ្ឌបឹងកេងកងប្រគល់ទូនាទីនេះទុកឱ្យខាងចរាចរណ៍ជំនាញក្រុងចុះមកវាស់វែងនិងយករថយន្តទាំង ៣ គ្រឿងទៅរក្សាទុកនៅចរាចរណ៍ក្រុងរង់ចាំដោះស្រាយនៅពេលក្រោយ៕រក្សាសិទ្ធិដោយ៖ សា មេត
