នគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត បានបន្ថែមការប្រុងប្រយ័ត្ន និងវិធានការរឹតបន្តឹងការចេញ-ចូល របស់ជនបរទេស និងប្រជាពលរដ្ឋខ្មែរដែលវិលត្រឡប់មកពីប្រទេសថៃចូលកម្ពុជាវិញ ដោយកម្លាំងសមត្ថកិច្ច និងមន្ត្រីសុខាភិបាល ធ្វើការត្រួតពិនិត្យ វិភាគរកមើលវីរុសកូវីត-១៩ យ៉ាងខ្ជាប់ខ្ជួន និងប្រសិទ្ធភាព បន្ទាប់ពីទទួលបានបទបញ្ជាពីសម្ដេចតេជោ ហ៊ុនសែន នាយករដ្ឋមន្ត្រី បញ្ជាឲ្យមានការប្រុងប្រយ័ត្ន និងអំពាវនាវដល់ពលរដ្ឋខ្មែរដែលចង់វិលត្រឡប់មកពីប្រទេសថៃ ចូលកម្ពុជាវិញ សូមកុំទាន់អាលចេញ-ចូល ខណៈអាជ្ញាធរថៃដាក់បម្រាម បន្ទាប់ពីមានការផ្ទុះការរាតត្បាតជំងឺកូវីដ-១៩ នៅខេត្តសាមុតសាខន ប្រទេសថៃ ។
មន្ត្រីផ្នែកអន្តោប្រវេសន៍ប្រចាំច្រកអន្តរជាតិប៉ោយប៉ែត បានឲ្យ CEN ដឹងនៅរសៀលថ្ងៃទី០២ ខែមករា ឆ្នាំ២០២១ ថា នាយឧត្ដមសេនីយ៍ ឃុន សំបូរ អគ្គនាយករងអន្តោប្រវេសន៍ បានរៀបចំពិធីសំណេះសំណាលជាមួយនាយប៉ុស្តិ៍នាយនគរបាលច្រកទ្វាអន្តរជាតិប៉ោយប៉ែត ដើម្បីដាក់ចេញបទបញ្ជាណែនាំបន្ថែមដល់កម្លាំងនគរបាល សំដៅពង្រឹងការទប់ស្កាត់ការរីករាលដាលជំងឺ-១៩នេះ ឱ្យមានប្រសិទ្ធភាពខ្ពស់ ដោយក្នុងនោះ ពង្រឹងការងារសន្តិសុខ កិច្ចសហការល្អៗរវាងនគរបាលអន្តោប្រវេសន៍កម្ពុជា និងភាគីថៃ ដើម្បីទប់ស្កាត់ការឆ្លងរាតត្បាតនៃកូវីដ-១៩ តាមការណែនាំរបស់រាជរដ្ឋាភិបាលនៃប្រទេសទាំងពីរ។
បើតាម លោកឧត្តមសេនីយ៍ត្រី អ៉ី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានប្រាប់អំពីស្ថានភាពទូទៅ ដែលបានអនុវត្តក្នុងរយៈពេលកន្លងមក នៅក្រុងប៉ោយប៉ែតថា ទំនាក់ទំនងរវាងសមត្ថកិច្ចកម្ពុជា និងសមត្ថកិច្ចថៃមានភាពល្អប្រសើរ ដោយប្រជាពលរដ្ឋខ្មែរដែលវិលត្រឡប់ពីប្រទេសថៃចូលមកកម្ពុជាតាមច្រករបៀងផ្សេងៗ គឺមន្ត្រីជំនាញត្រួតពិនិត្យវាស់កម្ដៅ រួចបញ្ជូនទៅមន្ទីរពេទ្យក្រុងប៉ោយប៉ែត ដើម្បីធ្វើចត្តាឡីស័ករយៈពេល ១៤ ថ្ងៃ។ លោកឧត្តមសេនីយ៍ត្រី ឲ្យដឹងទៀតថា ប្រជាពលរដ្ឋកម្ពុជាដែលចេញពីទឹកដីថៃ ក្រោយពិនិត្យរួច ត្រូវបានបញ្ជូនទៅកន្លែងពិនិត្យសំណាក និងធ្វើចត្តាឡីស័កចំនួន ៤ ទីតាំង ដែលអាជ្ញាធរខេត្ត-ក្រុងបានរៀបចំរួចជាស្រេច រួមមាន ៖ ១- នៅមន្ទីរពេទ្យបង្អែកប៉ោយប៉ែត (ដីថ្មី) , ២- មណ្ឌលសុខភាពប៉ោយប៉ែត១ , ៣- សាលាព្រហ្មនិម្មិត , ៤- វិទ្យាល័យនិម្មិតថ្មី ។
ដោយឡែក លោកអគ្គនាយករងអន្តោប្រវេសន៍ នាយឧត្ដមសេនីយ៍ ឃុន សំបូរ ឲ្យដឹងផងដែរថា ពលរដ្ឋដែលចេញមកពីទឹកដីថៃរយ:ពេលកន្លងមក ក៏ដូចជាពេលនេះ គឺភាគច្រើន ជួបបញ្ហាដោយសារដាច់ប៉ាស្ព័រ អត់មានការងារធ្វើ និងមានធុរៈក្នុងគ្រួសារចាំបាច់ ។ ទោះជាយ៉ាងណា លោកអគ្គនាយករងអន្តោប្រវេសន៍ បានជំរុញឲ្យកម្លាំងជំនាញរបស់លោក ត្រូវសហការជាមួយប្រទេសជិតខាងបន្ថែមទៀត ដើម្បីឲ្យមានភាពស្និទ្ធស្នាល ក្នុងការអនុវត្តច្បាប់ឲ្យមានប្រសិទ្ធភាព ជាពិសេស ទប់ស្កាត់បទល្មើសឆ្លងដែនខុសច្បាប់ និងចូលរួមអនុវត្តវិធានការរបស់រាជរដ្ឋាភិបាល ក៏ដូចជា ក្រសួងសុខាភិបាល ឲ្យបានតឹងរ៉ឹង ៕ រក្សាសិទ្ធិដោយ ៖ពិសិដ្ឋ CEN
