ភ្នំពេញ៖ កសិករដាំអំពៅ នៅតាមខ្សែបន្ទាត់ព្រំដែនកម្ពុជា បានអះអាងថា អំពៅកំពុងមានតម្លៃខ្ពស់ ក្នុងការនាំចេញទៅប្រទេសថៃ។ ប្រជាកសិករនៅខេត្តបន្ទាយមានជ័យ លោក អ៊ុ ម៉ាប់ បានឱ្យដឹងថា តម្លៃអំពៅឆ្នាំនេះ កំពុងមានទីផ្សារល្អ និងមានតម្លៃខ្ពស់។
លោកបានបន្តថា កសិករបាននាំគ្នា ដាំដើមអំពៅជាច្រើន សម្រាប់នាំចេញទៅកាន់ប្រទេសថៃ ដែលស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ហើយកំពុងសប្បាយចិត្តនឹងតម្លៃអំពៅឆ្នាំនេះ ដោយ អំពៅក្នុងមួយតោន លក់បានតម្លៃ ១,០០០បាត (ប្រាក់ថៃ) ស្មើនឹង ១៣០,០០០រៀល ដោយតម្លៃឆ្នាំនេះ ខ្ពស់ជាងឆ្នាំមុន ដែលក្នុងមួយតោន នៅដើមដៃ ដូចគ្នា លក់បានតម្លៃតែ ៨,០០០បាត ឬស្មើនឹង ១០៥,០០០រៀល ប៉ុណ្ណោះ។
លោក អ៊ុ ម៉ាប់ កសិកររស់នៅក្នុងភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានឱ្យដឹងថា ការប្រមូលផល អំពៅឆ្នាំនេះ មានទីផ្សារល្អ ដែលអំពៅប្រភេទ (ខេ២១) ជាអំពៅសម្រាប់លក់ក្នុងស្រុក (កិនជាទឹកអំពៅផ្អែម) និងនាំចេញទៅប្រទេសថៃ ចូលរោងចក្រផលិតជាស្ករស ដោយសារអំពៅប្រភេទនេះ មានរសជាតិផ្អែមល្អ កំពុងមានតម្លៃខ្ពស់ ក្នុងការនាំចេញទៅថៃ។
កសិកររូបនេះ បានបញ្ជាក់ថា អំពៅប្រភេទ ខេ២១នេះ មានប្រវែងចាប់ពី ២ទៅ២.៥ម៉ែត្រ។ ចំពោះការដាំដុះវិញ គ្រាន់តែដាក់ជី ភ្ជួរដីលុបគល់ និងបាញ់ថ្នាំសម្លាប់ស្មៅ ឬសត្វល្អិតប៉ុណ្ណោះ។ ក្នុងទំហំដីមួយរ៉ៃ អាចប្រមូលផលអំពៅ បានពី ២៥តោន ទៅ ៣០តោន។ ចំពោះ ការដាំម្ដង អាចប្រមូលផលបានពី ៣ ទៅ៤លើក និងប្រើរយៈពេល ៩ខែប៉ុណ្ណោះ សម្រាប់ការប្រមូលផលម្ដង។
បើយោងតាមបទពិសោធនៃការដាំអំពៅរបស់កសិករខាងលើ ដែលចំណាយពេលអស់រយៈពេលជិត ៦ឆ្នាំមកនេះ បានឱ្យដឹងថា ការធ្លាក់ថ្លៃ ឬឡើងថ្លៃ គឺអាស្រ័យលើគុណភាព រសជាតិអំពៅ ដោយនៅដើមដៃមួយតោនតម្លៃ ១០០០បាត អាចឡើងថ្លៃដល់មួយតោនតម្លៃ ១៣០០បាត ក៏មាន។ តម្លៃអំពៅបច្ចុប្បន្ន គឺនៅថេរនៅឡើយ។ ហើយអំពៅដើមកាន់តែចំណាស់បន្តិចកាន់តែផ្អែម និងមានតម្លៃកាន់តែខ្ពស់៕
រក្សាសិទ្ធិដោយ៖CEN
