កំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា កម្លាំងនគរបាលផ្នែកគ្រឿងញៀន នៃអធិការដ្ឋាននគរបាលស្រុកបសេដ្ឋ កាលពីថ្ងៃទី៤ ខែមករា ឆ្នាំ២០២១វេលាម៉ោង១៧និង៣០នាទីបានល្បាតមកដល់ចំណុចភូមិចំរើនផល ឃុំពោធិម្រាល ឃើញមុខសញ្ញាសង្ស័យ បីនាក់ កំពុងជុំគ្នារួចបានហៅសួរនាំ ស្រាប់តែជនសង្ស័យឈ្មោះ នូ សារ៉េត ភេទប្រុស អាយុ៣៦ឆ្នាំ ស្ទុះមកដាល់នគរបាលទាំងកម្រោលត្រូវចំផ្ទៃមុខយ៉ាងដំណំ បណ្តាលឲ្យដួលនិងរងរបួស រួចជនសង្ស័យបានរត់គេចខ្លួនបាត់ ។
សមត្ថកិច្ចបានបន្ដឆែកឆេរនិងឃាត់ខ្លួនបក្ខពួកម្នាក់ចំណោម ៣នាក់ មានឈ្មោះ ម៉ន សុភាក់ ភេទប្រុស អាយុ២៥ឆ្នាំ រកឃើញ ចម្ពាមកៅស៊ូ មួយនិងគ្រាប់ថ្មមួយចំនួន តាមចម្លើយសារភាពថា ពួកគេបានប្រើប្រាស់គ្រឿងញៀនមុនពេលសមត្ថកិច្ចមកដល់ បញ្ជាក់ កន្លងមកមានករណីគប់ បាញ់កញ្ចក់រថយន្ដជាញឹកញាប់ ដែលចំណុចនេះអាចជាប់ពាក់ព័ន្ធនិងក្រុមក្មេងទំនើងដែលតែងតែប្រើប្រាស់គ្រឿងញៀនរួចចេញធ្វើសកម្មភាព ។
ករណីខាងលើសមត្ថកិច្ចបានបញ្ជូនជនសង្ស័យ មកកាន់អធិការដ្ឋាននគរបាលស្រុក ដើម្បីសាកសួរ តេស្តទឹកនោម រកសារធាតុញៀន(+) និងចំណាត់ការតាមនីតិវិធី បន្ដស្រាវជ្រាវរកជនដៃដល់បក្ខពួក ក្នុងករណីប្រើហឹង្សាដោយចេតនាមកលើសមត្ថកិច្ច៕រក្សាសិទ្ធិដោយ៖បញ្ញាស័ក្តិ
