ស្ទឹងត្រែង ៖ ករណីគោយន្តបើកបរតាមដងផ្លូវពេលយប់ អត់ដាក់ស្លាកសញ្ញាចំណាំងផ្លាត ជាសម្គាល់ តែងតែបង្កគ្រោះថ្នាក់ចរាចរណ៍ បណ្ដាលឲ្យមានអ្នកស្លាប់និងរបួសជាញឹកញាប់។
លោក សរ គឹមណាត ប្រធានមន្ទីរសាធារណការ និងដឹកជញ្ជូនខេត្តស្ទឹងត្រែង និងជាប្រធានលេខាធិការដ្ឋានសុវត្ថិភាពចរាចរណ៍ផ្លូវគោក នៅយប់ថ្ងៃទី ៥ ខែមករា ឆ្នាំ២០២១ បានដឹកនាំក្រុមលេខាធិការដ្ឋាន ចុះចែកបិទស្ទិកឃ័រចំណាំងផ្លាត ដល់គោយន្តកន្ត្រៃ និងណែនាំពួកគាត់ឲ្យយល់ដឹងពីច្បាប់ចរាចរណ៍ផ្លូវគោក ដើម្បីជួយកាត់បន្ថយគ្រោះថ្នាក់ចរាចរណ៍ផ្លូវគោក នៅតាមបណ្តោយផ្លូវជាតិលេខ៩។
លោកវរសេនីយ៍ទោ ឈឿន ម៉េង នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តស្ទឹងត្រែង បានប្រាប់ឲ្យដឹងនៅព្រឹកថ្ងៃទី ៦ ខែមករាថា យុទ្ធនាការចុះអប់រំផ្សព្វផ្សាយស្លាកសញ្ញាចរាចរណ៍ ដល់បងប្អូនប្រជាពលរដ្ឋដែលធ្វើដំណើរពេលយប់ នៅក្នុងភូមិសាស្ត្រផ្លូវជាតិលេខ ៩ ក្នុងស្រុកថាឡាបរិវ៉ាត់បានចំនួន ៧ គ្រឿង។ យុទ្ធនាការនេះ ធ្វើឡើងបន្តបន្ទាប់នៅថ្ងៃមុខទៀត ដើម្បីផ្សព្វផ្សាយអប់រំដល់ប្រជាពលរដ្ឋ ឲ្យយល់ដឹងកាន់តែច្បាស់ដើម្បីបញ្ចៀសកាត់បន្ថយគ្រោះថ្នាក់ចរាចរណ៍នៅតាមដងផ្លូវ។
លោកឈឿន ម៉េង បានបន្ថែមឲ្យដឹងផងដែរថា កន្លងមកគោយន្តកែច្នៃដែលបើកបរនៅតាមដងផ្លូវពេលយប់ ពុំមានដាក់ស្លាកសញ្ញាជាសម្គាល់ តែងតែបង្កឲ្យមានគ្រោះថ្នាក់ចរាចរណ៍ស្លាប់និងរបួស។ បែបនេះទើបមន្ត្រីសាធារណការនិងដឹកជញ្ជូន និងមន្ត្រីនគរបាលចរាចរណ៍ ចុះធ្វើការឃាត់អប់រំដាក់ស្លាកសញ្ញាសម្គាល់ ដល់បងប្អូនប្រជាពលរដ្ឋ ដែលមានគោយន្តបើកបរមិនទាន់បាត់ដាក់សញ្ញា ឲ្យយល់ដឹងកាន់តែច្បាស់បន្ថែមទៀត៕ រក្សាសិទ្ធិដោយ៖សំណាង
