ភ្នំពេញ៖ នៅដើមឆ្នាំ២០២១នេះ ទីផ្សារម្រេចកំពត បានចាប់ផ្តើមបង្ហាញសញ្ញាវិជ្ជមានល្អប្រសើរឡើងវិញ បន្ទាប់ពីមានក្រុមហ៊ុនធំៗមួយចំនួន បានបញ្ជាទិញសម្រាប់ឆ្នាំថ្មីនេះ។ សមាគមលើកកម្ពស់ម្រេចកំពត បានឲ្យដឹងនៅថ្ងៃទី០៨ ខែមករា ឆ្នាំ២០២១នេះថា បច្ចុប្បន្នមានក្រុមហ៊ុនធំៗមួយចំនួន បានចាប់ផ្តើមកម្មង់ទិញម្រេចកំពត ពីប្រជាកសិករជាច្រើនរយគ្រួសារ ។ ក្នុងនោះ មានដូចជាក្រុមហ៊ុន EU Land Pepper ជាដើម ដែលជាក្រុមហ៊ុនរបស់ប្រទេសអឺរ៉ុប បានបញ្ជាទិញម្រេចចំនួន ១០ តោន រួចទៅហើយ សម្រាប់ឆ្នាំថ្មី ២០២១នេះ។
សមាគមលើកកម្ពស់ម្រេចកំពត ទិន្នផលម្រេចកំពត ដែលប្រមូលបានក្នុងឆ្នាំ២០២០ មានប្រមាណជាង ៨២តោន ពោលគឺបានធ្លាក់ចុះជាង ២០តោន បើប្រៀបធៀបនឹងទិន្នផលឆ្នាំ២០១៩ ដែលប្រមូលបានក្នុងរង្វង់ប្រមាណ ១០០តោន។ យ៉ាងណាមិញ នៅឆ្នាំ២០២០ កន្លងទៅនេះ ទិន្នផលម្រេចកំពត បានធ្លាក់ចុះក៏ពិតមែន ប៉ុន្តែបរិមាណនៃការនាំចេញនៅរក្សាបានក្នុងរង្វង់ ៧០តោន ដដែល។
បើតាមលោក ងួន ឡាយ បរិមាណនាំចេញទៅក្រៅប្រទេសមិនបានប៉ះពាល់នោះទេ ពោលគឺនៅរក្សាបរិមាណល្អដដែល ទោះបីស្ថិតក្នុងបរិបទកូវីដ-១៩ក៏ដោយ។ ហើយការធ្លាក់ចុះទិន្នផលម្រេចកំពត ឆ្នាំ២០២០ គឺបណ្តាលមកពីកសិដ្ឋានដាំម្រេចធំៗមួយចំនួន នៅខេត្តកំពត បានបោះបង់ចោលការដាំដុះរបស់ខ្លួន និងកសិដ្ឋានខ្លះ ទៀតមិនទទួលបានទិន្នផលច្រើន ដោយខ្វះខាតផ្នែកបច្ចេកទេស និងមិនស្របតាមស្តង់ដារម្រេចកំពត។
លោកបន្តថា ទីផ្សារម្រេចកំពតនៅក្នុងស្រុកវិញ មានការធ្លាក់ចុះគួរសមក្នុងបរិបទនៃជំងឺឆ្លងកូវីដ-១៩ ប៉ុន្តែមិនបានចោទជាបញ្ហាខ្លាំងដល់ប្រជាកសិករនោះទេ។
គួរបញ្ជាក់ថា ចាប់តាំងតែពីមានផ្ទុះជំងឺកូវីដ-១៩នៅទូទាំងពិភពលោក ម្រេចកំពត សូម្បីតែមួយគ្រាប់ក៏មិនបាននាំចេញទៅទីផ្សារក្រៅប្រទេសនោះទេ ខណៈទីផ្សារក្នុងស្រុក គឺពឹងផ្អែកខ្លាំង លើអ្នកទិញជាភ្ញៀវទេសចរ និងភោជនីយដ្ឋានធំៗ៕
រក្សាសិទ្ធិដោយ៖CEN
