ភ្នំពេញ៖ រហូតដល់ម៉ោង១២ថ្ងៃត្រង់ថ្ងៃទី៨ ខែមករា ឆ្នាំ២០២១ បានប្រទះឃើញសពបុរសខាងលើ អណ្តែតទឹកទន្លេ ក្រុមគ្រួសារក៏ជួលខ្មែរឥស្លាម ស្រង់ដាក់លើគោក និងដឹកតាមរថយន្តយកទៅវត្តព្រែកលៀប ដើម្បីធ្វើបុណ្យតាមប្រពៃណី។
គួររំលឹកថា ហេតុការណ៍ភ្ញាក់ផ្អើលនៃការលោតទឹកសម្លាប់ខ្លួននេះ ដែលបានកើតឡើង កាលពីវេលាម៉ោង 7 និង50នាទីយប់ ថ្ងៃទី6 ខែ មករា ឆ្នាំ 2021 នៅលើស្ពានជ្រោយចង្វាថ្មី សង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីបងប្រុសបង្កើតឈ្មោះ សំ ឧត្ដម បានប្រាប់ឲ្យដឹងថា បុរសដែលលោតទឹកសម្លាប់ខ្លួននោះ ត្រូវជាប្អូនប្រុសបង្កើតរបស់គាត់ ឈ្មោះ សំ បញ្ញា អាយុ 24ឆ្នាំមុខរបររត់ម៉ូតូកង់បីឥណ្ឌា បច្ចុប្បន្នស្នាក់នៅផ្ទះជួលនៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញជាមួយប្រពន្ធ ។ មានស្រុកកំណើតនៅភូមិព្រៃតាបេស ឃុំពោធិ៍ ស្រុកស្រីសន្ធរ ខេត្តកំពង់ចាម។ ប្រភពដដែលបានបន្តថា មុនកើតហេតុ គឺបុរសគិតខ្លីខាងលើ និងប្រពន្ធបានទៅផឹកស៊ីនៅផ្ទះគាត់នៅសង្កាត់ព្រែកលៀប ដើម្បីពិភាក្សាគ្នារឿងធ្វើបុណ្យខួបគម្រប់3ឆ្នាំ ឲ្យម្តាយនៅថ្ងៃទី7 ខែមករា ឆ្នាំ២០២១ ខណៈពេលហូបចុកស្រវឹង ស្រាប់តែប្អូនប្រុសគាត់បានឈ្លោះប្រកែកពាក្យសម្តីគ្នា ជាមួយប្រពន្ធគាត់ ហើយប្អូនប្រុសគាត់ខឹង ក៏ឡើងបើកម៉ូតូកង់បីចេញទៅបាត់ ដោយមិនប្រាប់អ្នកណាឡើយ លុះរំលងដល់ម៉ោង 9យប់ ក៏មានសមត្ថកិច្ចទាក់ទងទៅប្រពន្ធបុរសរង គ្រោះប្រាប់ថា បុរសនោះបានលោតទឹកសម្លាប់ខ្លួនបាត់ទៅហើយ ។
យោងតាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានប្រាប់ឲ្យដឹងថា មុនកើតហេតុ គឺពួកគាត់ឃើញបុរសខាងលើជិះម៉ូតូកង់មួយគ្រឿង ពណ៌សលាយក្រហម ពាក់ផ្លាកលេខ ភ្នំពេញ 1HJ-8498 ធ្វើដំណើរឡើងស្ពាន ជ្រោយចង្វា ទិសដៅពីកើតទៅលិច មកដល់ពាក់កណ្តាលស្ពានក៏ឈប់ម៉ូតូកង់បីអែបកៀន រួចក៏លោតចុះតែម្តង ដោយបន្សល់ទុកស្បែកស៊កមួយគូរ នៅក្បែរបង្កាន់ដៃស្ពាន និងម៉ូតូកង់បីមួយគ្រឿង ។
ក្រោយកើតហេតុនៅសល់ម៉ូតូកង់បី ត្រូវបានសមត្ថកិច្ចយកទៅរក្សាទុកបណ្តោះអាសន្ន នៅប៉ុស្តិ៍នគរបាលស្រះចក រង់ចាំសាច់ញាតិយក ឯកសារមកបញ្ជាក់ ដើម្បីយកម៉ូតូកង់បីនោះត្រឡប់ទៅវិញ ចំណែកប្រពន្ធនិងសាច់ញាតិបុរសខាងលើបានត្រឹមស្តាយស្រណោះ និង ជួលទូកគេស្វែងរកសពបុរសនោះ មកធ្វើបុណ្យតាមប្រពៃណីតែប៉ុណ្ណោះ ៕ រក្សាសិទ្ធិដោយ៖ ពន្លឺ
