ខេត្តព្រះសីហនុ ៖ កម្លាំងនគរបាល និងកងរាជអាវុធហត្ថ ខេត្តព្រះសីហនុ បានរួមសហការគ្នាចុះដាក់បុស្តិ៍ត្រួតពិនិត្យជនបរទេស ពិសេសជនជាតិចិន ដែលប្រើប្រាស់ ឬបើកបររថយន្តពាក់ស្លាកលេខ ខ.ម និង ន.ប នៅតាមផ្លូវសាធារណៈនាទីប្រជុំជនក្នុងក្រុងព្រះសីហនុ ដើម្បីពង្រឹងការអនុវត្តច្បាប់ចរាចរណ៍ផ្លូវគោកឲ្យបានត្រឹមត្រូវ។
យុទ្ធនាការនេះបានធ្វើឡើង កាលពីរសៀលកាលពីរសៀលថ្ងៃអង្គារ ទី២១ ខែកុម្ភៈ ឆ្នាំ២០១៨ ហើយសមត្ថកិច្ច បានឃាត់រថយន្តពាក់ស្លាកលេខ ខ.ម និង ន.បមួយចំនួន ដែលបើកបរដោយជនជាតិចិនមួយចំនួន ដើម្បីត្រួតពិនិត្យឯកសារពាក់ព័ន្ធ ការប្រើស្លាកលេខ របស់ស្ថាប័នមានសមត្ថកិច្ច បើកបរដោយជនស៊ីវិល ពិសេសជនបរទេស។
សមត្ថកិច្ចនគរបាល និងកងរាជអាវុធហត្ថ បានឲ្យដឹងនៅកន្លែងត្រួតពិនិត្យថា រថយន្តពាក់ផ្លាកលេខ ខ.ម និង ន.ប របស់ស្ថាបន័មានសមត្ថកិច្ច ទោះបីជាពួកគេមានកាតគ្រី ឬអត្តសញ្ញាណត្រឹមត្រូវបែបណាក៏ដោយ ប៉ុន្តែបើអ្នកបើកបររថយន្តទាំងនោះជាជនបរទេស ឬជាជនស៊ីវិល សមត្ថកិច្ចនឹងឃាត់ទុក ជាបណ្តោះអាសន្ន ដើម្បីដោះស្រាយតាមនីតិវិធីច្បាប់។
ទោះជាបែបនេះក្តី សាធារណៈជន បានកត់សម្គាល់ថា រថយន្តពាក់ស្លាកលេខ ខ.ម និង ន.ប បើកបរដោយជនបរទេស ពិសេសជនជាតិចិន គឺកំពុងធ្វើចរាចរណ៍រាល់ថ្ងៃនាទីប្រជុំជនក្រុងព្រះសីហនុ ហើយភាគច្រើន នៃជនជាតិចិត ដែលជាអ្នកបើករថយន្តពាក់ស្លាកលេខ ខ.ម និង ន.ប ទាំងនោះ មិនញញើតកម្លាំងសមត្ថកិច្ចប្រចាំការនៅតាមគោលដៅនីមួយៗនោះទេ។
ត្រង់ចំណុចនេះ កម្លាំងសមត្ថកិច្ចមានឋានៈតូចទាប និងប្រជាពលរដ្ឋរស់នៅខេត្តព្រះសីហនុ បានអះអាងថា ជនបរទេស ពិសេសជនជាតិចិន ដែលបើកបររថយន្តពាក់ស្លាកលេខ ខ.ម និង ន.បទាំងអស់ ដែលធ្វើចរាចរណ៍តាមផ្លូវសាធារណៈនាទីប្រជុំជនក្នុងក្រុងព្រះសីហនុ គឺពួកគេមានខ្នងបង្អែកជាមន្ត្រីមានអំណាច ឬមានឋានៈខ្ពស់ មួយចំនួនកំពុងបំរើការងារនៅក្នុងជួរកងកម្លាំងប្រដាប់អាវុធថ្នាក់ជាតិ និងមន្ត្រីខ្លះទៀត គឺជាថ្នាក់ដឹកនាំស្ថាប័នមានសមត្ថកិច្ច នាខេត្តព្រះសីហនុតែម្តង ជាអ្នកកាងការពារ ឬមានរថយន្តពាក់ស្លាកលេខ ខ.ម និង ន.បឲ្យជនបរទេស ពិសេសជនជាតិចិនតែម្តង ដែលកំពុងបើកបរតាមផ្លូវសាធារណៈរាល់ថ្ងៃនេះ៕ ដែន សីមា