កណ្តាល ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមឆ្លើយតបចំពោះ គណនីហ្វេសបុកឈ្មោះ Chhoun Chann Asda Mpn ដែលបានខមមិន (Comment) ក្នុងPages ការពិត GCNP នៃអគ្គស្នងការដ្ឋាននគរបាលជាតិ នៅថ្ងៃទី៧ ខែមករា ឆ្នាំ២០២១ មានខ្លឹមសារថា «សូមឯកឧត្តមមេត្តា ជួយមើលសំណុំរឿងបោកប្រាស់ យកម៉ូតូបង់រំលស់ ទៅលក់នៅភូមិក្រចាប់ត្បូង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល បានអូសបន្លាយរយៈពេលជិត១ឆ្នាំ នៅតែដោះស្រាយអត់ចេញ ដោយសារជនល្មើសត្រូវរ៉ូវគ្នាជាមួយសមត្ថកិច្ចមូលដ្ឋាន ម៉ូតូអត់ឯកសារផង ប៉ូលិសមូលដ្ឋានចូលរួមស៊ីញ៉េដឹងឮ ឱ្យជនល្មើសលក់ទៅឱ្យអ្នកដទៃ ទាំងដែលម្ចាស់បង់ពីអង្គការមិនទាន់ដាច់ផង ហើយម្ចាស់ម៉ូតូជាជនក្រីក្រមានប័ណ្ណក្រីក្រ កូនធ្វើចុងភៅឱ្យគេ ឪពុកផ្សំថ្នាំខ្មែរលក់យកលុយទិញអង្ករ ពេលនេះជំពាក់គេវ័ណ្ឌក ហើយដោយសារបង់រំលស់ម៉ូតូហើយម៉ូតូត្រូវគេបោកទៀត»។
ក្រោយពីទទួលដំណឹងភ្លាម ដោយមានការចង្អុលបង្ហាញពីក្រុមការងារប្រតិកម្មរហ័ស នៃអគ្គស្នងការដ្ឋាននគរបាលជាតិ ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានជូនដំណឹងនេះ ដល់អធិការនគរបាលស្រុកខ្សាច់កណ្តាល ធ្វើការស្រាវជ្រាវចំពោះខ្លឹមសារដែលបានរាយការណ៍ខាងលើ។ ជាលទ្ធផលអធិការនគរបាលស្រុកខ្សាច់កណ្តាល បានឱ្យដឹងថា៖
ជាករណីរំលោភលើទំនុកចិត្តដែលកើតហេតុថ្ងៃ៦ ខែកុម្ភៈ ឆ្នាំ២០២១ ម៉ោង១៦និង០០នាទី នៅចំណុចភូមិបឹងក្រចាប់ត្បូង ឃុំព្រែកតាមាក់ ស្រុកខ្សាច់កណ្តាល ខេត្តកណ្ដាល។
ជនរងគ្រោះឈ្មោះ អឿន សំអាត ភេទប្រុស អាយុ៥១ឆ្នាំ ជនជាតិខ្មែរ មុខរបរ កសិករមានទីលំនៅភូមិបឹងក្រចាប់ត្បូង ឃុំព្រែកតាមាក់ ស្រុកខ្សាច់កណ្តាល ខេត្តកណ្ដាល។ ចំណែកជនសង្ស័យឈ្មោះ ចំរើន សុខលី ភេទប្រុស អាយុ៤៥ឆ្នាំ ជនជាតិខ្មែរមុខរបរ កសិករ មានទីលំនៅភូមិបឹងក្រចាប់ត្បូង ឃុំព្រែកតាមាក់ ស្រុកខ្សាច់កណ្តាល ខេត្តកណ្ដាល។
អធិការនគរបាលស្រុកខ្សាច់កណ្តាល បានបញ្ជាក់ពីសភាពរឿងហេតុនេះថា កាលពីថ្ងៃទី១៨ ខែសីហា ឆ្នាំ២០១៩ ឈ្មោះ អឿន សំអាត បានទិញម៉ូតូមួយគ្រឿងម៉ាក HONDA C125 ពណ៌ខ្មៅ ស៊េរីឆ្នាំ២០១៩ ពាក់ផ្លាកលេខ កណ្ដាល1AF-6797 ពីក្រុមហ៊ុន LOD សាខាក្រុងតាខ្មៅខេត្តកណ្ដាល (ទិញបង់រំលស់តម្លៃ២៥៩០ដុល្លារ)។ លុះដល់ថ្ងៃមិនចាំខែធ្នូ ឆ្នាំ២០១៩ ឈ្មោះ អឿន សំអាត និងកូនស្រីខ្លួនឈ្មោះ សំអាត ចាន់ណារី អាយុ៣០ឆ្នាំ បានយកម៉ូតូនេះទៅដាក់បញ្ចាំឱ្យឈ្មោះ ប៉ត ស្រ៊ិន បានប្រាក់ចំនួន៦០០ដុល្លារ ហើយចំពោះឈ្មោះ ចំរើន សុខលី ភេទប្រុស បានមានទំនាក់ទំនងស្នេហាជាមួយឈ្មោះ សំអាត ចាន់ណារី។
នៅថ្ងៃទី៦ ខែកុម្ភៈ ឆ្នាំ២០២០ វេលាម៉ោង១៦និង០០នាទី ឈ្មោះ សំអាត ចាន់ណារី និងឈ្មោះ ចំរើន សុខលី បាននាំគ្នាទៅលស់ម៉ូតូនេះពីឈ្មោះ ប៉ត ស្រ៊ិន តម្លៃ៧២០ដុល្លារ គិតទាំងការប្រាក់ ដោយឈ្មោះ ចំរើន សុខលី ជាអ្នកចេញប្រាក់ថ្លៃលស់ ពេលលស់ម៉ូតូរួចឈ្មោះ ចំរើន សុខលី បានយកម៉ូតូនេះ ទៅទុកផ្ទះខ្លួន មិនព្រមយកមកឱ្យឈ្មោះ អឿន សំអាត និងឈ្មោះ សំអាត ចាន់ណារី វិញទេ ក្រោយមកឈ្មោះ ឃុត ខន ភេទស្រី ជាប្រពន្ធរបស់ឈ្មោះ អឿន សំអាត បានទៅខ្ចីប្រាក់ពីឈ្មោះ ចំរើន សុខលី ចំនួន ១,០០០,០០០រៀលទៀត បន្ទាប់មកឈ្មោះ ចំរើន សុខលី បានយកម៉ូតូនេះ ទៅដាក់បញ្ចាំឱ្យគេម្នាក់ទៀត។ ក្រោយមកឈ្មោះ អឿន សំអាត និងឈ្មោះ ឃុត ខន បានសុំឱ្យឈ្មោះ ចំរើន សុខលី យកម៉ូតូមកឱ្យពួកខ្លួន ហើយខ្លួននិងសងប្រាក់ទៅឱ្យឈ្មោះ ចំរើន សុខលី វិញ តែឈ្មោះ ចំរើន សុខលី មិនព្រមយកម៉ូតូមកឱ្យឈ្មោះ អឿន សំអាត និងឈ្មោះ ឃុត ខន ទេ។ រហូតដល់ថ្ងៃទី២៨ ខែធ្នូ ឆ្នាំ២០២០ ទើបឈ្មោះ អឿន សំអាត មកដាក់ពាក្យបណ្ដឹង នៅអធិការដ្ឋាននគរបាលស្រុកខ្សាច់កណ្តាល។
ករណីនេះ អធិការនគរបាលស្រុកខ្សាច់កណ្តាល សូមបដិសេធចំពោះគណនីហ្វេសបុកឈ្មោះ Chhoun Chann Asda Mpn ដែលបានសរសេរចោទប្រកាន់ថា «ប៉ូលិសបានចូលរួមស៊ីញ៉េដឹងឮ ឱ្យជនល្មើសលក់ទៅឱ្យអ្នកដទៃ ទាំងដែលម្ចាស់បង់ពីអង្គការមិនទាន់ដាច់» ជាការសរសេរបំផ្លើសការពិត។
សូមបញ្ជាក់ថា ឈ្មោះ ចំរើន សុខលី សមត្ថកិច្ចជំនាញបានកោះមកដោះស្រាយ នៅអធិការដ្ឋាននគរបាលស្រុកខ្សាច់កណ្តាល តែគេចវេសមិនព្រមចូលខ្លួនមកដោះស្រាយទេ។ បច្ចុប្បន្ន សមត្ថកិច្ចជំនាញ កំពុងប្រមូលឯកសារពាក់ព័ន្ធ កសាងសំណុំរឿង តាមនីតិវិធី៕រក្សាសិទ្ធិដោយ៖បញ្ញាស័ក្តិ
