ស្ទឹងត្រែង: អ្នកចិញ្ចឹមបង្កងមួយកន្លែង បានជំរុញឲ្យកសិករនាំគ្នាចិញ្ចឹមបង្កងលក់ ដើម្បីតម្រូវការទីផ្សារ។ មុខរបរមួយនេះបានជួយបង្កើនប្រាក់ចំណូលដល់ក្រុមគ្រួសារ ឲ្យកាន់តែប្រសើរឡើង។
លោកសុទ្ធ ភិរម្យ អាយុ៣៩ឆ្នាំ អ្នកចិញ្ចឹមបង្កងលក់នៅភូមិបាចុង សង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង បានរៀបរាប់ឲ្យដឹងថា លោកធ្លាប់បានបម្រើការងារ នៅជាមួយក្រុមហ៊ុនចិញ្ចឹមបង្កង លក់ដ៏ធំក្នុងប្រទេសកម្ពុជាមួយកន្លែង ព្រមទាំងការសិក្សាស្រាវជ្រាវតាមឯកសារមួយចំនួន និងមើលពីវិធីសាស្ត្រចិញ្ចឹមបង្កងតាមរយៈ youtube បន្ថែមធ្វើឲ្យលោកមានគំនិត បង្កើតអាជីវកម្មកសិដ្ឋានចិញ្ចឹមបង្កងលក់ ដោយខ្លួនឯង។
លោកសុទ្ធ ភិរម្យ បានបន្តទៀតថា មុខរបរមួយនេះ ងាយស្រួល ឬពិបាកក៏ថាបាន។ បើសិនជាដាក់ចិត្តចាប់យកមុខរបរមួយនេះហើយយើងត្រូវតស៊ូព្យាយាម ស្វែងយល់ពីបច្ចេកទេសឲ្យបានច្បាស់ជាមុនសិន ដូចជាការរៀបចំជាប្រព័ន្ធអាងតាមបច្ចេកទេស ឲ្យបានត្រឹមត្រូវ។ ប្រើប្រាស់អុកស៊ីសែន កំហាត់ទឹកជាដើម។ ជាសំខាន់ធ្លាប់បានសិក្សាលើបច្ចេកទេស ក្នុងការចិញ្ចឹមបង្កងជាមុន ឬក៏ជួបសាកសួរអ្នកធ្លាប់មានបទពិសោធន៍ដោយផ្ទាល់ ដើម្បីចៀសវាងនាំឲ្យខាតបង់។
លោកថា បង្កងដែលលោកចាប់អារម្មណ៍ គឺប្រភេទបង្កងអូស្ត្រាលី ក្នុងចំណោមបង្កងច្រើនប្រភេទទៀត នៅលើទីផ្សារសព្វថ្ងៃនេះ។ លោកបានអនុវត្តចិញ្ចឹមបង្កងអស់រយៈពេលជាងមួយឆ្នាំ ហើយហើយក្នុងនោះអតិថិជនក៏ចាប់ផ្ដើមស្គាល់ទំនាក់ទំនងទិញពូជបង្កងពីលោកតាមប្រព័ន្ធ facebook និងខ្លះទៀតចុះទៅទិញដោយផ្ទាល់។
ចំពោះការប្រមូលផលមួយរដូវកាលក្នុងរយៈពេល 3 ខែកន្លះ គឺប្រមូលផលម្ដង។ លោកអាចលក់កូនបានដល់ទៅ10000គ្រាប់ បានទឹកប្រាក់ចន្លោះពី 5000 ទៅ 8 ពាន់ដុល្លារ។ សម្រាប់ការលក់ចេញនៃកូនបង្កង1 ម៉ឺនក្បាល តែត្រូវចំណាយដើមទុនអស់ 3 ពាន់ដុល្លារយ៉ាងតិច ហើយប្រមូលផលវិញបាន 9000 ដុល្លារ ចំពោះបង្កងសាច់។ បង្កងសាច់លក់លើទីផ្សារចាប់ពី 25 ទៅ 30 ដុល្លារក្នុងមួយគីឡូក្រាម៕ រក្សាសិទ្ធិដោយ៖សំណាង
