បើយោងតាមរបាយការណ៍ពីស្ថានទូតកម្ពុជាប្រចាំប្រទេសថៃ ទឹកប្រាក់ការដោះដូរពាណិជ្ជកម្មទេ្វភាគីកម្ពុជានិងថៃសម្រេចបាន ៥៧២ លានដុល្លារអាមេរិកនៅក្នុងខែវិច្ឆិកាឆ្នាំ២០២០។
ក្នុងនោះការនាំចេញរបស់កម្ពុជាទៅថៃ មានតម្លៃ ៥៩លានដុល្លារអាមេរិក (ធ្លាក់ចុះ៥៦ភាគរយ) ធៀបនឹងរយៈពេលដូចគ្នានៅក្នុងឆ្នាំ២០១៩ ដែលមានតម្លៃ ១៣៥លានដុល្លារអាមេរិក។ ចំណែកការនាំចូលពីថៃ មានតម្លៃ ៥១៣លានដុល្លារ (ធ្លាក់ចុះ២៨ភាគរយ) ធៀបនឹងរយៈពេលដូចគ្នាកាលពីឆ្នាំមុន ដែលមានតម្លៃ ៧១០លានដុល្លារអាមេរិក។
ដោយឡែក សម្រាប់រយៈពេល១១ នៃឆ្នាំ២០២០ ទឹកប្រាក់នៃការដោះដូរពាណិជ្ជកម្មទ្វេភាគីកម្ពុជា-ថៃសម្រេចបានតម្លៃ ៦,៦ប៊ីលានដុល្លារអាមេរិក (ធ្លាក់ចុះ ២២ភាគរយ) ធៀបនឹងរយៈពេលដូចគ្នាក្នុងឆ្នាំ២០១៩ដែលមានតម្លៃ ៨,៦ប៊ីលានដុល្លារអាមេរិក។
នៅក្នុងនោះការនាំចេញរបស់កម្ពុជាទៅថៃមានតម្លៃជាង ១,១ ប៊ីលានដុល្លារ (ធ្លាក់ចុះ ៥២ភាគរយ) ធៀបនឹងឆ្នាំ២០១៩ ដែលមានតម្លៃ ២,២ប៊ីលានដុល្លារ ចំណែកឯការនាំចូលពីថៃមានតម្លៃ ៥,៦ប៊ីលានដុល្លារ (ធ្លាក់ចុះ១២ភាគរយ) ធៀបនឹងឆ្នាំមុន ដែលមានទឹកប្រាក់ ៦,៣ប៊ីលានដុល្លារ បណ្តាលឲ្យមាន ឱនភាពជញ្ជីងពាណិជ្ជកម្មដល់ ៤,៥ប៊ីលានដុល្លារ៕ រក្សាសិទ្ធិដោយ ៖ CEN