ខេត្តស្វាយរៀង ៖ លោក ម៉ែន វិបុល អភិបាលខេត្តស្វាយរៀង និងជាប្រធានគណៈកម្មាធិការមូលដ្ឋាន សមាគមមន្ត្រីរាជការស៊ីវិលក្រសួងមហាផ្ទៃ នាព្រឹកថ្ងៃ ទី ១៣ ខែមករា ឆ្នាំ២០២១នេះ នៅសាលប្រជុំព្រៃបាសាក់ អគារ ខ សាលាខេត្តស្វាយរៀង បានអញ្ជើញជាអធិបតីក្នុងពិធីសំណេះសំណាល និងប្រគល់ថវិកាសមាគមមន្ត្រីរាជការស៊ីវិល ក្រសួងមហាផ្ទៃ សរុបចំនួន ៧.៥០០.០០០រៀល ជូនគ្រួសារសពសមាជិកសកម្មរួមមាន ផ្ដល់ជូនលោកស្រី ទេព សារួន និងលោកស្រី នួន ថាវរី គ្រួសារសព លោក ងួន ចាន់ ចំនួន ៤.៥០០.០០០រៀល ជូនលោក រស់ ឆាយ ភរិយាទទួលមរណភាព ចំនួន ១.៥០០.០០០រៀល និងជូនលោក ញឹម ឡាស់ ភរិយាទទួលមរណភាព ចំនួន ១.៥០០.០០០រៀល ។
លោក ម៉ែន វិបុល អភិបាលខេត្តស្វាយរៀង បានចូលរួមសោកស្តាយជាមួយឯកឧត្តម លោក លោកស្រី ចំពោះការបាត់បង់សមាជិកគ្រួសារជាទីស្រលាញ់ ដោយឡែកការផ្តល់ថវិការបស់សមាគមនៅពេលនេះ ទោះបីជាមានចំនួនតិចតួចក្ដី ប៉ុន្តែជាការចែករំលែក និងចូលរួមចំណែកសម្រាលការលំបាកជាមួយមន្ត្រីរាជការ និងក្រុមគ្រួសារ ដែលសុទ្ធសឹងជាអ្នកធ្លាប់មានគុណបំណាច់ជូនជាតិមាតុភូមិ។
លោក អភិបាលខេត្ត ក៏បានផ្តាំផ្ញើ និងជូនពរដល់សមាជិកគ្រួសារសពដែលបានចូលរួមទទួលថវិកានូវព្រឹកនេះ សូមថែរក្សាសុខភាពឲ្យបានល្អ ខិតខំបន្តការកសាងជីវភាពគ្រួសារឱ្យមានការរីកចម្រើន និងសូមឱ្យសម្រេចបានជោគជ័យគ្រប់ភារកិច្ចការងារ ៕ រក្សាសិទ្ធិដោយ៖វ៉ៃកូ
