ខេត្តស្ទឹងត្រែង៖ បណ្តាញសារព័ត៌មានជាច្រើន បានចុះផ្សាយព័ត៌មានថា លោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង បានកំណត់ ឱ្យមេបញ្ជាការមូលដ្ឋានកងរាជអាវុធហត្ថក្រុង-ស្រុក ត្រូវរកលុយក្នុងម្នាក់ ៨ម៉ឺនដុល្លារ ដើម្បីយកមកកសាងបន្ទាយស្នាក់ការរបស់ខ្លួន។
ពាក់ព័ន្ធករណីចោទប្រកាន់ខាងលើនេះ ឧត្តមសេនីយ៍ត្រី អេង ហ៊ី អ្នកនាំពាក្យ កងរាជអាវុធហត្ថលើផ្ទៃប្រទេស សូមជម្រាបជូនសាធារណជន និងអ្នកសារព័ត៌មាន ជ្រាបថា តាមការរាយការណ៍របស់លោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង បានបញ្ជាក់ថា មិនមានការកំណត់ឱ្យមេបញ្ជាការមូលដ្ឋានកងរាជអាវុធហត្ថក្រុង ស្រុក រកលុយម្នាក់៨ម៉ឺនដុល្លារ ដើម្បីសង់បន្ទាយរបស់ខ្លួននោះទេ។
អ្នកនាំពាក្យ កងរាជអាវុធហត្ថលើផ្ទៃប្រទេសបានបញ្ជាក់បន្ថែមថា ជាគោលការណ៍ កងរាជអាវុធហត្ថទាំងមូល មិនមានការកាត់គោលរបប មិនមានការកំណត់ឱ្យបង់ថវិកាផ្សេងៗនោះទេ។ បើបុគ្គលអាវុធហត្ថណាប្រព្រឹត្តនូវកំហុស ឬល្មើសនឹងច្បាប់ ត្រូវទទួលខុសត្រូវចំពោះមុខច្បាប់។
សូមអរគុណចំពោះការគាំទ្រ និងជឿទុកចិត្តលើកងរាជអាវុធហត្ថ។ បើមានបុគ្គលអាវុធហត្ថណា ប្រព្រឹត្តខុស សូមផ្តល់ព័ត៌មានមក យើងខ្ញុំនឹងធ្វើការត្រួតពិនិត្យរកការពិត។ ប៉ុន្តែសូមគោរពក្រមសីលធម៌ និងកុំបំផ្លើសការពិតឱ្យសោះ៕ រក្សាសិទ្ធិដោយ៖បញ្ញាស័ក្តិ
