ភ្នំពេញៈ នៅក្នុងយុទ្ធនាការបបង្ក្រាបគ្រឿងញៀនខុសច្បាប់រយៈពេល ១៥ថ្ងៃ គិតពីថ្ងៃទី១ ដល់ថ្ងៃទី១៥ ខែមករា ឆ្នាំ២០២១ សមត្ថកិច្ចបង្ក្រាបបានចំនួន ៣២៥ករណី ឃាត់ខ្លួនមនុស្សចំនួន ៨៤៨នាក់ (ស្រីចំនួន ២៦នាក់) និងដកហូតសារធាតុញៀនគ្រប់ប្រភេទចំនួន ៦Kg ១០៥,៤០g និង ៤៦១កញ្ចប់តូច។ នេះបើយោងតាមរបាយការណ៍របស់គណៈកម្មការទី៣ នៃយុទ្ធនាការប្រឆាំងគ្រឿងញៀនខុសច្បាប់ ដែលសារព័ត៍មាន CEN ទទួលបាននៅល្ងាចថ្ងៃទី១៦ ខែមករា ឆ្នាំ២០២១។
របាយការណ៍បានបន្តថា ករណីជួញដូរ រក្សាទុក កែឆ្នៃ ចាត់ចែង និងដាំដុះ បង្ក្រាបបានចំនួន ១៩៩ករណី ឃាត់ខ្លួនមនុស្ស ៤៤៤នាក់ (ស្រីចំនួន ២២នាក់)។ ករណីប្រើប្រាស់បង្ក្រាបបានចំនួន ១២៦ករណី ឃាត់ខ្លួនមនុស្ស ៤០៤នាក់ (ស្រី ៤នាក់) និងអនុវត្ដន៍ដីកាចំនួន ៨ដីកា ឃាត់មនុស្ស ៨នាក់។
សម្រាប់ការបង្ក្រាបនៅថ្ងៃទី១៥ ខែមករា ឆ្នាំ២០២១ សមត្ថកិច្ចបង្ក្រាបករណីជួញដូរ រក្សាទុក ដឹកជញ្ជូន ដាំដុះ ផលិតកែឆ្នៃ ចាត់ចែង ផ្ដល់ទីតាំង និងប្រើប្រាស់ បានចំនួន ៣១ករណី ឃាត់ខ្លួនមនុស្សចំនួន ៦៣នាក់ (ស្រី ៤នាក់) ។ វត្ថុតាងចាប់យកមេតំហ្វេតាមីន(Ice) ទម្ងន់ ៣០,៦៦ក្រាម និង ៥៥កញ្ចប់តូច។
ប្រភេទបទល្មើស៖ ជួញដូរ ១៤ករណី ឃាត់ខ្លួនមនុស្សចំនួន ៣៤នាក់ (ស្រី ២នាក់) និងករណីប្រើប្រាស់ ១៧ករណី ឃាត់ខ្លួនមនុស្សចំនួន ៣៩នាក់៕ រក្សាសិទ្ធិដោយៈ ចេស្តារ